Shashi Tharoor | ‘కేరళం’తో ఒరిగేదేంటి..? ప్రాజెక్టులు ముఖ్యం.. కేంద్ర ప్ర‌భుత్వంపై శ‌శి థ‌రూర్ ఫైర్‌

Shashi Tharoor | కేంద్ర ప్రభుత్వం కేరళ (Kerala) రాష్ట్రం పేరును 'కేరళం'గా (Keralam) మార్చ‌డంపై కాంగ్రెస్ సీనియ‌ర్ నేత‌, తిరువ‌నంత‌పురం ఎంపీ శ‌శి థ‌రూర్ (Shashi Tharoor) స్పందించారు. ఈ మేర‌కు కేంద్ర ప్ర‌భుత్వంపై తీవ్ర విమ‌ర్శ‌లు చేశారు. ప్ర‌భుత్వం కేవ‌లం పేర్లు మార్చ‌డంపైనే దృష్టిపెట్టింద‌ని.. అభివృద్ధి ప్రాజెక్టుల‌పై (No Projects) కాద‌ని మండిప‌డ్డారు. మ‌ల‌యాళంలో ఇప్ప‌టికే కేర‌ళ రాష్ట్రాన్ని కేర‌ళంగా పిలుస్తార‌ని అలాంట‌ప్పుడు పేరు మార్పు వ‌ల్ల వ‌చ్చే ఉప‌యోగం ఏంట‌ని ఆయ‌న ప్ర‌శ్నించారు.

ప్రాజెక్టులు లేవు కానీ పేర్లు మారుస్తున్నారు..

"కేర‌ళ రాష్ట్రం మ‌ల‌యాళంలో "కేర‌ళం"గానే ఉంది. ఇప్పుడు ఒక మ‌ల‌యాళ ప‌దాన్ని ఆంగ్లంలోకి తీసుకొస్తున్నారు. దీనివ‌ల్ల ఉప‌యోగం ఏంటో నాకేం అర్థం కావ‌డం లేదు. కేంద్ర ప్ర‌భుత్వం పేరు మార్పుపై చూపిస్తున్న శ్ర‌ద్ధ రాష్ట్ర అభివృద్ధిపై చూప‌డం లేదు. బ‌డ్జెట్‌లో రాష్ట్రానికి ఒక్క ప్రాజెక్టూ కేటాయించ‌లేదు. ఎయిమ్స్ వంటి విద్యా సంస్థ‌ల‌ను కేటాయించ‌లేదు. కానీ పేరు మార్పు విష‌యంలో మాత్రం చాలా ఉత్సాహంగా ఆమోదం తెలిపింది" అని శ‌శిథ‌రూర్ తీవ్ర స్థాయిలో విమ‌ర్శ‌లు చేశారు.

మ‌రి వాటి సంగ‌తేంటి..?

మ‌రోవైపు కేర‌ళం మార్పు నేప‌థ్యంలో కొన్ని భాషాప‌ర‌మైన చిక్కుల గురించి థ‌రూర్ కొన్ని ప్ర‌శ్న‌లు సంధించారు. రాష్ట్రం పేరు కేర‌ళంగా మారితే.. ఇప్ప‌టికే అక్క‌డ వాడుక‌లో ఉన్న 'కేరళైట్' (Keralite), 'కేరళన్' (Keralan) ప‌దాల ప‌రిస్థితి ఏంటి..? అని ప్ర‌శ్నించారు. 'కేరళమైట్' (Keralamite) అంటే ఏదో ఒక సూక్ష్మజీవి పేరులా అనిపిస్తోందని, 'కేరళమియన్' (Keralamian) అంటే ఏదో అరుదైన ఖనిజం పేరులా ఉంద‌ని ఎద్దేశా చేశారు. ఈ కొత్త ప‌దాల కోసం కేర‌ళ ముఖ్య‌మంత్రి కార్యాల‌యం ఒక పోటీని నిర్వ‌హించాల‌ని అనుకుంటోందేమో అంటూ వ్యంగ్యాస్త్రాలు సంధించారు.

Also Read..

Stress | స్మోకింగ్‌, డ్రింకింగే కాదు.. దీన్ని కూడా వ‌దిలించుకోవాలి.. వైద్యుల సూచ‌న‌..

Road Crash | బారికేడ్ల‌ను త‌ప్పించ‌బోయి.. దుకాణాల‌పై దూసుకెళ్లిన ట్యాంక‌ర్.. వీడియో

Donald Trump | నేను యుద్ధం ఆప‌క‌పోతే పాక్‌లో 3.50 కోట్ల మంది చ‌నిపోయి ఉండేవారు: ట్రంప్