Sunetra Pawar | ఏకగ్రీవానికి తొల‌గిన అడ్డంకులు.. బారామ‌తిలో సునేత్ర ప‌వార్ విజ‌యం లాంఛ‌నమే

Sunetra Pawar | మహారాష్ట్రలోని బారామతి అసెంబ్లీ ఉప ఎన్నికల్లో (Baramati bypolls) కీల‌క ప‌రిణామం చోటు చేసుకుంది. దివంగత నేత అజిత్ పవార్ (Ajit Pawar) సతీమణి, ప్ర‌స్తుత డిప్యూటీ ముఖ్య‌మంత్రి సునేత్ర పవార్ ఏక‌గ్రీవానికి ఏర్ప‌డిన అడ్డంకి తొల‌గిపోయింది. ఈ స్థానం నుంచి కాంగ్రెస్ (Congress) పార్టీ త‌మ అభ్యర్థిని ఉప‌సంహ‌రించుకుంది. దీంతో సునేత్ర ప‌వార్ విజ‌యం లాంఛ‌న‌మైంది. ఏప్రిల్ 23న జ‌ర‌గాల్సిన ఉప ఎన్నిక‌లో సునేత్ర ఎన్నిక ఏక‌గ్రీవం కానుంది.

కాగా, జ‌న‌వ‌రి 28న జ‌రిగిన విమాన ప్ర‌మాదంలో అజిత్ ప‌వార్ ప్రాణాలు కోల్పోయిన విష‌యం తెలిసిందే. ఆయ‌న మ‌ర‌ణం అనంత‌రం ప‌వార్ వార‌సురాలిగా సునేత్ర‌ను నేషనలిస్ట్ కాంగ్రెస్ పార్టీ (ఎన్సీపీ) ఎన్నుకుంది. ఆ త‌ర్వాత డిప్యూటీ ముఖ్య‌మంత్రిగా సునేత్ర ప‌వార్ బాధ్య‌త‌లు చేప‌ట్టారు. ఇక ఈ నెల 23న జ‌ర‌గాల్సిన బారామ‌తి అసెంబ్లీ ఉప ఎన్నిక బ‌రిలో (Baramati By-Election) సునేత్ర పోటీలో నిలిచారు. ఈ స్థానంలో సునేత్ర ఏకగ్రీవంగా ఎన్నికవుతారని అంతా అనుకున్నారు. అయితే కాంగ్రెస్ పార్టీ రంగంలోకి దిగడంతో ఎన్నికలు నిర్వహించడం అనివార్య‌మైంది. ఆమెపై కాంగ్రెస్ తన అభ్యర్థిని బరిలోకి దింపింది. కాంగ్రెస్ అధ్యక్షుడు మల్లికార్జున ఖర్గే న్యాయవాది ఆకాష్ విశ్వనాథ్ మోర్ అభ్యర్థిత్వాన్ని ఖరారు చేశారు. దీంతో కాంగ్రెస్ తీరుపై తీవ్ర విమ‌ర్శ‌లు వ్య‌క్త‌మ‌య్యాయి.

రంగంలోకి దిగిన మ‌హా స‌ర్కార్‌.. సునేత్ర ఎన్నిక ఏక‌గ్రీవం చేసేందుకు ఆ రాష్ట్ర కాంగ్రెస్ యూనిట్‌తో సంప్ర‌దింపులు జ‌రిపింది. స్వ‌యంగా మ‌హారాష్ట్ర ముఖ్య‌మంత్రి దేవేంద్ర ఫ‌డ్న‌వీస్ ఆ రాష్ట్ర కాంగ్రెస్ చీఫ్ హ‌ర్ష‌వ‌ర్ధ‌న్ స‌ప్క‌ల్‌తో ఫోన్‌లో మాట్లాడారు. అభ్య‌ర్థిత్వాన్ని ఉప‌సంహ‌రించుకోవాల‌ని కోరారు. దీంతో అజిత్ ప‌వార్‌కు గౌర‌వ సూచికంగా కాంగ్రెస్ పార్టీ త‌న అభ్య‌ర్థిత్వాన్ని వెన‌క్కి తీసుకుంది. హ‌స్తం పార్టీ నిర్ణ‌యంతో ప‌వార్ కుటుంబానికి కంచుకోట అయిన బారామ‌తిలో సునేత్ర ప‌వార్ ఎన్నిక ఏకగ్రీవం కానుంది.

Also Read..

15,400 టన్నుల LPGతో భార‌త్‌కు చేరుకున్న గ్రీన్ ఆశా

బెంగాల్ అభివృద్ధి చెందాలంటే డ‌బుల్ ఇంజిన్ స‌ర్కార్ అవ‌స‌రం : ప్ర‌ధాని మోదీ

11 వేల లీటర్ల పాలతో న‌ర్మ‌దా న‌దికి అభిషేకం.. నెట్టింట తీవ్ర చ‌ర్చ‌