Actor Ranya Rao | గోల్డ్ స్మ‌గ్లింగ్ కేసు.. ర‌న్యారావుకు షాకిచ్చిన క‌స్ట‌మ్స్ శాఖ‌

Actor Ranya Rao | త్రినేత్ర న్యూస్ : దుబాయ్ నుంచి అక్రమంగా బంగారాన్ని (Gold Smuggling Case) తరలిస్తూ అధికారుల‌కు ప‌ట్టుబ‌డిన‌ కన్నడ నటి రన్యారావు (Actor Ranya Rao)కు కస్టమ్స్ శాఖ గట్టి షాక్ ఇచ్చింది. నిబంధనలను ఉల్లంఘించినందుకు గాను ఆమెకు ఏకంగా రూ. 89 కోట్ల భారీ జరిమానా విధించింది. ర‌న్యారావుతోపాటు ఈ కేసులోని ఇతర నిందితులైన‌ సాహిల్ జైన్‌కు రూ.53.06 కోట్లు, భరత్ కుమార్ జైన్‌కు రూ. 53.06 కోట్లు, తరుణ్ కొండూరు రాజుకు రూ. 49.51 కోట్ల జరిమానా విధించింది. మొత్తంగా ఈ కేసులో నలుగురు నిందితులకు కలిపి రూ. 244 కోట్లకు పైగా ఫైన్ వేసింది.

రన్యా రావు దుబాయ్‌ నుంచి రూ.14 కోట్లకు పైగా విలువైన బంగారం స్మగ్లింగ్‌ చేస్తూ గ‌తేడాది మార్చిలో బెంగళూరు (Bengaluru) అంత‌ర్జాతీయ విమానాశ్రయంలో పట్టుబడిన విషయం తెలిసిందే. ఆమెను అరెస్ట్‌ చేసిన అనంతరం డైరెక్టరేట్‌ ఆఫ్‌ రెవెన్యూ ఇంటెలిజెన్స్‌ (డీఆర్‌ఎస్‌) అధికారులు లావెల్లె రోడ్‌లోని ఆమె ఇంటిలో సోదాలు నిర్వహించగా రూ.2.06 కోట్ల విలువైన బంగారు నగలు, రూ.2.67 కోట్ల నగదు పట్టుబడ్డాయి. దీంతో పట్టుబడిన మొత్తం నగదు, బంగారం విలువ 17.29 కోట్లుగా అధికారులు నిర్ధారించారు. నిందితులు దాదాపు ఏడాది కాలంలో 113 కిలోల బంగారాన్ని రవాణా చేసిన‌ట్లు ద‌ర్యాప్తు అధికారులు గుర్తించారు.

విచారణలో భాగంగా రన్యారావు కీలక విషయాలు వెల్లడించింది. తాను దుబాయ్‌ నుంచి 17 బంగారు కడ్డీలను తీసుకుని వచ్చినట్టు ఆమె రెవెన్యూ అధికారులకు తెలిపింది. తాను దుబాయే కాక మధ్య ప్రాచ్య, యూరప్‌, అమెరికా, సౌదీ అరేబియా దేశాలు పర్యటించినట్టు తెలిపింది. దుబాయ్‌ నుంచి ఆమె బంగారాన్ని తెచ్చినందుకు కేజీకి రూ.4 నుంచి రూ.5 లక్షలు తీసుకుంటుందని అప్ప‌ట్లో వార్త‌లు కూడా వ‌చ్చాయి. ఇక ఈ కేసులో ఆమెకు ఏడాది జైలు శిక్ష ప‌డిన విష‌యం తెలిసిందే. డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ) ఇప్పటికే ఆమెకు రూ. 102 కోట్ల జరిమానా కూడా విధించింది.

Also Read..

బ్యాంకుల‌కు ప్ర‌తి శ‌నివారం సెల‌వు లేదు

అపార్ట్‌మెంట్ల‌లో అక్ర‌మ కార్య‌క‌లాపాలు.. ఆస్తులు జ‌ప్తు చేస్తామ‌ని పోలీసుల హెచ్చ‌రిక‌

విద్య కోసం ఇచ్చే విరాళం ఎప్ప‌టికీ విలువైన‌దే: డీజీపీ సీవీ ఆనంద్‌