Cyberabad | అపార్ట్‌మెంట్ల‌లో అక్ర‌మ కార్య‌క‌లాపాలు.. ఆస్తులు జ‌ప్తు చేస్తామ‌ని పోలీసుల హెచ్చ‌రిక‌

Cyberabad | త్రినేత్ర న్యూస్ : సైబ‌రాబాద్ పోలీసు క‌మిష‌న‌రేట్ ప‌రిధిలో అక్ర‌మ కార్య‌క‌లాపాల‌ను అరిక‌ట్టేందుకు పోలీసులు ప‌టిష్ట చ‌ర్య‌లు తీసుకుంటున్నారు. మ‌రి ముఖ్యంగా స‌ర్వీస్ అపార్ట్‌మెంట్స్ య‌జ‌మానుల‌కు సైబ‌రాబాద్ సీపీ ర‌మేశ్ రెడ్డి గ‌ట్టి హెచ్చ‌రిక‌లు జారీ చేశారు. స‌ర్వీస్ అపార్ట్‌మెంట్ల‌లో వ్య‌భిచారం, జూదం వంటి కార్య‌క‌లాపాలు కొన‌సాగిన‌ట్లు త‌మ దృష్టికి వ‌స్తే.. సంబంధిత ఆస్తి జ‌ప్తు చేస్తామ‌ని హెచ్చ‌రించారు. ఆస్తుల‌ను జ‌ప్తు చేసే అధికారం త‌మ‌కు ఉంద‌ని ఆయ‌న తేల్చిచెప్పారు.

ఎందుకంటే..?

ఇటీవ‌ల మాదాపూర్ ప‌రిధిలోని ప‌లు స‌ర్వీస్ అపార్ట్‌మెంట్ల‌లో జూదం, వ్య‌భిచారం వంటి అసాంఘిక కార్య‌క‌లాపాలు.. పోలీసుల దాడుల్లో వెలుగు చూశాయి. గ‌త నెల 27వ తేదీన అయ్య‌ప్ప సొసైటీలోని వైట్ క్యాజిల్ స‌ర్వీస్ అపార్ట్‌మెంట్‌పై దాడి చేయ‌గా, అక్క‌డ వ్య‌భిచారం నిర్వ‌హిస్తున్న‌ట్లు తేలింది. అదే ఏరియాలో ఉన్న మ‌రో అపార్ట్‌మెంట్‌లో జూదం ఆడుతున్న‌ట్లు పోలీసులు క‌నుగొన్నారు. దీంతో కేసులు న‌మోదు చేసి పోలీసులు ద‌ర్యాప్తు చేప‌ట్టారు.

అద్దెకిచ్చే ముందు ఇది త‌ప్ప‌నిస‌రి

స‌ర్వీస్ అపార్ట్‌మెంట్ల‌ను అద్దెకు ఇచ్చే స‌మ‌యంలో అద్దెకు తీసుకుంటున్న‌వారి వివ‌రాల‌ను తీసుకోవాల‌ని పోలీసులు య‌జ‌మానుల‌కు సూచించారు. అద్దెకు దిగే వారి ఐడీ కార్డులు, ఇత‌ర వివ‌రాల‌ను సేక‌రించాలి. అవ‌స‌ర‌మైతే లిఖిత పూర్వ‌కంగా కార‌ణం రాసివ్వ‌మ‌ని అడ‌గాలి. ఎంత‌మంది వ‌స్తున్నారు..? ఎందుకు వ‌స్తున్నారు..? అనే వివ‌రాల‌ను కూడా లిఖిత‌పూర్వకంగా న‌మోదు చేయించుకోవాలి. ఇలా చేయ‌డం వ‌ల్ల అద్దెకు ఉన్న వారు ఏదైనా త‌ప్పు చేస్తే య‌జ‌మానుల‌కు ఆ అక్ర‌మ కార్యక‌లాపాల‌తో సంబంధం లేద‌ని నిరూపించుకోవ‌డానికి స‌హాయ‌ప‌డుతుంద‌ని పోలీసులు తెలిపారు. ఇక అక్ర‌మ కార్య‌క‌లాపాలు జ‌రుగుతున్నాయ‌ని తెలిసి కూడా అద్దెకు ఇస్తే.. య‌జ‌మానుల‌పై కేసులు త‌ప్ప‌వు.. అంతేకాకుండా ఆ ప్రాప‌ర్టీని సీజ్ చేసే అధికారం పోలీసుల‌కు ఉంటుంద‌ని హెచ్చ‌రించారు.