Israel | హెజ్బొల్లా స్థావరాలే లక్ష్యంగా ఇజ్రాయెల్‌ బాంబుల వర్షం.. 50 గ్రామాల ప్ర‌జ‌ల‌ను ఖాళీ చేయించిన ఐడీఎఫ్‌

Israel | ఇరాన్‌పై ఇజ్రాయెల్‌-అమెరికా దాడులు కొన‌సాగుతున్నాయి. ఇరాన్ సుప్రీంలీడ‌ర్ అయ‌తొల్లా అలీ ఖ‌మేనీ మ‌ర‌ణించిన త‌ర్వాత ఈ దాడులు మ‌రింత తీవ్ర‌మ‌య్యాయి. ఈ క్ర‌మంలో ఈ యుద్ధంలోకి తాజాగా లెబ‌నాన్ (Lebanon) మిలిటెంట్ గ్రూప్ హెజ్బొల్లా ( Hezbollah) ఎంట్రీ ఇచ్చింది. ఖ‌మేనీ హ‌త్య‌కు ప్రతీకారంగా ఇజ్రాయెల్‌పై క్షిప‌ణి దాడుల‌కు దిగింది. అయితే, హెజ్బొల్లా దాడుల‌ను ఇజ్రాయెల్ డిఫెన్స్ ఫోర్స్ తిప్పికొడుతోంది. లెబ‌నాన్ రాజ‌ధాని బీరుట్‌లోని హెజ్బొల్లా స్థావ‌రాల‌పై ఎదురుదాడికి దిగింది. మిలిటెంట్ కీల‌క నేత‌లే ల‌క్ష్యంగా మిస్సైళ్ల‌తో విరుచుకుప‌డుతోంది.

తీవ్ర ప‌రిణామాలు త‌ప్ప‌వు.. హెజ్బొల్లాకు ఐడీఎఫ్ హెచ్చ‌రిక‌లు

లెబనాన్ నుంచి ప్రయోగించిన క్షిపణుల కారణంగా ఉత్తర ఇజ్రాయెల్‌లోని పలు ప్రాంతాల్లో సైరన్లు మోగినట్లు ఇజ్రాయెల్ సైన్యం తెలిపింది. త‌మ దేశంపై రాత్రిపూట హెజ్బొల్లా దాడుల‌ను ప్రారంభించిన‌ట్లు ఐడీఎఫ్ ద‌ళాలు తెలిపాయి. ఈ దాడుల వ‌ల్ల త‌లెత్తే ప‌రిణామాల‌కు ఆ సంస్థే పూర్తి బాధ్య‌త వ‌హించాల్సి ఉంటుంద‌ని పేర్కొన్నాయి. హెజ్బొల్లా భారీ మూల్యం చెల్లించుకోక త‌ప్ప‌ద‌ని హెచ్చ‌రించాయి. ఇజ్రాయెల్ భ‌ద్ర‌త‌కు ముప్పు క‌లిగించే ఏ శ‌త్రువైనా తీవ్ర ప‌రిణామాల‌ను ఎదుర్కోవాల్సి ఉంటుంద‌ని హెచ్చ‌రించారు. ఉత్తర సరిహద్దులోని ఇజ్రాయెల్ పౌరులకు లేదా నివాస ప్రాంతాలకు ఎటువంటి హాని కలగనివ్వబోమని స్పష్టం చేశారు. ఇలాంటి ఉద్రిక్త ప‌రిస్థితులను ఎదుర్కొనేందుకు త‌మ ద‌ళాలు "ఆపరేషన్ రోరింగ్ లయన్" (Operation Roaring Lion) పేరుతో దాడుల‌కు సిద్ధంగా ఉన్న‌ట్లు ఐడీఎఫ్‌ వెల్ల‌డించింది.

50 గ్రామాల ప్ర‌జ‌లను ఖాళీ చేయించిన ఐడీఎఫ్‌..

త‌మ‌పై దాడికి ప్ర‌తీకారంగానే హెజ్బొల్లా స్థావ‌రాల‌పై దాడులు చేప‌ట్టిన‌ట్లు ఐడీఎఫ్ వెల్ల‌డించింది. ఈ క్ర‌మంలో లెబనాన్‌లోని సుమారు 50 గ్రామాల ప్రజలు వెంటనే తమ ఇళ్లను ఖాళీ చేసి సురక్షిత ప్రాంతాలకు తరలివెళ్లాలని ఇజ్రాయెల్ సైన్యం (IDF) సోమవారం హెచ్చరిక జారీ చేసింది. హెజ్బొల్లా ఉగ్రవాదులు తమ సైనిక కార్యకలాపాలను జనావాసాల నుంచే నిర్వహిస్తున్నారని, ఈ కారణంగా సామాన్య పౌరులకు ఎలాంటి ప్రాణనష్టం జరగకూడదనే ఉద్దేశంతోనే ఈ ముందస్తు హెచ్చరికలు జారీ చేస్తున్నట్లు ఐడీఎఫ్ తెలిపింది. ఈ హెచ్చరికలు జారీ చేసిన కొద్దిసేపటికే ఇజ్రాయెల్ యుద్ధ విమానాలు లెబనాన్‌పై విరుచుకుపడ్డాయి. రాజధాని బీరుట్‌తో పాటు దక్షిణ, తూర్పు లెబనాన్‌లోని హెజ్బొల్లా స్థావరాలే లక్ష్యంగా బాంబుల వర్షం కురిపించాయి.

Also Read..

Iran Attacks Oil Tanker In Strait Of Hormuz | భ‌గ్గుమ‌న్న హ‌ర్ముజ్ జ‌ల‌సంధి.. భార‌తీయుల‌తో వెళ్తున్న‌ చ‌మురు నౌక‌పై ఇరాన్ దాడి

Israeli Strikes Hit Tehrans Gandhi Hospital | టెహ్రాన్‌లోని గాంధీ ఆసుప‌త్రిపై ఇజ్రాయెల్ దాడులు

AWS Data Center | యూఏఈలో AWS డేటా సెంట‌ర్‌పై ఇరాన్ దాడి..? వ్యాపించిన మంట‌లు..