AWS Data Center | యూఏఈలో AWS డేటా సెంట‌ర్‌పై ఇరాన్ దాడి..? వ్యాపించిన మంట‌లు..

AWS Data Center | అమెజాన్‌కు చెందిన క్లౌడ్ కంప్యూటింగ్ విభాగం అమెజాన్ వెబ్ స‌ర్వీసెస్‌ (AWS) యునైటెడ్ అరబ్ ఎమిరేట్స్‌లోని తన ఒక డేటా సెంటర్‌లో అగ్నిప్రమాదం సంభవించడంతో తాత్కాలికంగా విద్యుత్ సరఫరా నిలిపివేయాల్సి వచ్చిందని వెల్లడించింది. గుర్తు తెలియని వస్తువులు ఆ కేంద్రాన్ని తాకడంతో మంటలు చెలరేగినట్లు కంపెనీ తెలిపింది. ఈ ఘటన ఇరాన్ ప్రతీకార క్షిపణి, డ్రోన్ దాడుల నేపథ్యంలో గల్ఫ్ ప్రాంతంలో నెలకొన్న ఉద్రిక్తతల మధ్య చోటుచేసుకుంది. అమెరికా-ఇజ్రాయెల్ దాడులకు ప్రతిగా ఇరాన్ గల్ఫ్ దేశాలపై దాడులు జరిపిన తర్వాత యూఏఈలోని విమానాశ్రయాలు, నౌకాశ్రయాలు, నివాస ప్రాంతాలు దెబ్బతిన్నాయి. అయితే ఈ డేటా సెంటర్ ఘటనకు నేరుగా ఆ దాడులతో సంబంధముందా అనే విషయాన్ని AWS ధ్రువీకరించలేదు.

అంత‌రాయం ఆ జోన్‌కే..

ఉదయం సుమారు 4:30 (PST) గంట‌ల సమయంలో మా Availability Zonesలో ఒకటైన mec1-az2 గుర్తు తెలియని వస్తువుల ప్రభావానికి గురై మంటలు చెలరేగాయి.. అని AWS పేర్కొన్న‌ట్లు రాయిటర్స్ తెలిపింది. AWS ప్రకారం, Availability Zone అనేది ఒక ప్రాంతంలో భౌతికంగా వేరు వేరు డేటా సెంటర్ల సమూహం. ఇవి స్వతంత్రంగా పనిచేసేలా రూపొందించబడి ఉంటాయి, తద్వారా ఒక కేంద్రంలో సమస్య వచ్చినా మిగతావి ప్రభావితం కాకుండా ఉండేలా చేస్తాయి. మంటలను అదుపులోకి తీసుకురావడానికి స్థానిక అగ్నిమాపక దళాలు విద్యుత్ సరఫరాను నిలిపివేశాయి. ప్రభావిత జోన్‌లో సేవలు పూర్తిగా పునరుద్ధరించేందుకు కొన్ని గంటలు పట్టవచ్చని AWS తెలిపింది. యూఏఈలోని ఇతర AWS జోన్లు సాధారణంగా పనిచేస్తున్నాయని, అంతరాయం mec1-az2 జోన్‌కే పరిమితమైందని పేర్కొంది.

డేటా సెంట‌ర్ల‌కు మ‌రింత భ‌ద్ర‌త‌..

యూఏఈలోని AWS డేటా సెంటర్లు ప్రాంతీయంగా కీలక మౌలిక సదుపాయాలుగా ప‌నిచేస్తున్నాయి. ప్రభుత్వ సంస్థలు, బ్యాంకింగ్, ఈ-కామర్స్, మీడియా సంస్థలు AWS క్లౌడ్‌పై ఆధారపడుతున్నాయి. mec1-az2 జోన్‌లో తాత్కాలిక అంతరాయం ఏర్పడినా, ఇతర జోన్లు పనిచేస్తున్నందున పెద్ద స్థాయిలో సేవ‌ల‌కు అంతరాయం సంభవించే అవకాశం తక్కువగా ఉందని విశ్లేషకులు భావిస్తున్నారు. పునరుద్ధరణ చర్యలపై నిరంతరంగా అప్‌డేట్లు అందిస్తామని AWS తెలిపింది. ప్రాంతీయ భద్రతా పరిస్థితుల దృష్ట్యా కీలక డిజిటల్ మౌలిక సదుపాయాల భద్రతపై కూడా చర్య‌లు చేప‌డుతున్న‌ట్లు వెల్ల‌డించింది.