Venezuela quake | మిరాకిల్.. 8 రోజులుగా 140 టన్నుల శిథిలాల కిందే.. 100 గంటల ఆపరేషన్‌ తర్వాత సజీవంగా బయటకు

Venezuela quake | జూన్ 24న వెనెజువెలాను వ‌రుస భూకంపాలు (Venezuela quake) వ‌ణికించిన విష‌యం తెలిసిందే. రిక్ట‌రు స్కేలుపై 7.1, 7.5 తీవ్ర‌త‌తో న‌మోదైన ఈ ప్ర‌కంప‌న‌ల ధాటికి అనేక భ‌వ‌నాలు నేల‌మ‌ట్ట‌మ‌య్యాయి. వేలాది మంది ప్రాణాలు కోల్పోయారు. ప్ర‌స్తుతం అక్క‌డ స‌హాయ‌క‌చ‌ర్య‌లు కొన‌సాగుతున్నాయి. ఈ ప్ర‌మాదం జ‌రిగి ఇప్ప‌టికి ఎనిమిది రోజులైపోయింది. అయినా అక్క‌డ‌క్క‌డా శిథిలాల కింద చాలా మంది స‌జీవంగా క‌నిపిస్తున్నారు. అలా 43 ఏళ్ల హెర్నాన్ ఆల్బెర్టో గిల్ ఫ్లోరెస్ (Hernan Alberto Gil Flores) రెస్క్యూ టీమ్‌కి కొన ఊపిరితో క‌నిపించాడు.

140 ట‌న్నుల శిథిలాలు..

ఫ్లోరెస్.. ఓ షాపింగ్ మాల్‌లో సెక్యూరిటీ గార్డ్‌ (security guard)గా ప‌నిచేస్తున్నాడు. భూకంపం ధాటికి ఆ షాపింగ్ మాల్ కూలిపోయింది. ఆ స‌మ‌యంలో అత‌డు నైట్ షిఫ్ట్ డ్యూటీలో ఉన్నాడు. ఒక చిన్న సెక్యూరిటీ క్యాబిన్ లోపల ఉన్నాడు. భూ ప్ర‌కంప‌న‌ల‌కు చుట్టుపక్కల ఉన్న కాంక్రీట్ నిర్మాణం కూలిపోయినప్పటికీ అత‌డి క్యాబిన్ మాత్రం చెక్కు చెద‌ర‌లేదు. దీంతో దాదాపు 140 టన్నుల శిథిలాల కిందే చిక్కుకుపోయాడు. భవనం కూలిపోయినా క్యాబిన్ పూర్తిగా ధ్వంసం కాకపోవడంతో లోపల కొద్దిపాటి గాలి చేరి అతడు ప్రాణాలతో బయటపడగలిగాడు. దాదాపు ఎనిమిది రోజులుగా ఆహారం, నీళ్లు లేక‌ న‌ర‌క‌యాత‌న అనుభ‌వించాడు. కోస్టారికా రెడ్‌క్రాస్ బృందం మొదట అతడి జాడ గుర్తించింది. టెలిస్కోప్ కెమెరాతో అతడితో సంప్ర‌దింపులు జ‌రిపింది.

100 గంటల ఆపరేషన్‌

కుప్ప‌లు తెప్ప‌లుగా ప‌డి ఉన్న భ‌వ‌న శిథిలాలు, వ‌రుస ప్ర‌కంప‌న‌లు, భారీ వ‌ర్షం మ‌ధ్య దాదాపు 100 గంట‌ల‌కుపైగా శ్ర‌మించి రెస్క్యూ టీమ్ చివ‌రికి ఫ్లోరెస్‌ను చేరుకుంది. అత‌డిని సుర‌క్షితంగా బ‌య‌ట‌కు తీసుకొచ్చి ఆక్సిజ‌న్ అందించింది. అనంత‌రం అంబులెన్స్‌లో ఆసుప‌త్రికి తర‌లించింది.

నా భార్య‌కు చెప్ప‌కండి..

ఇక మృత్యుంజ‌యుడిగా బ‌య‌ట‌కు వ‌చ్చిన త‌ర్వాత "నేను బ‌తికి ఉన్న విష‌యం ఇప్పుడే నా భార్య‌కు చెప్ప‌కండి. ఒక‌వేళ నాకు ఏదైనా అయితే త‌ను త‌ట్టుకోలేదు" అంటూ ఫ్లోరెస్ చెప్పిన మాట‌లు అక్క‌డున్న వారంద‌రినీ కంట‌త‌డి పెట్టించాయి.

ఇది మిరాకిల్‌

సాధార‌ణంగా విప‌త్తు స‌మ‌యాల్లో 48 నుంచి 72 గంట‌ల వ్య‌వ‌ధిని అత్యంత కీల‌మైందిగా భావిస్తారు. అంత‌కు మించితే ప్రాణాల‌తో ఉండే అవ‌కాశం చాలా త‌క్కువ‌గా ఉంటుంది. అలాంటిది ఎనిమిది రోజుల త‌ర్వాత కూడా అత‌డు ప్రాణాల‌తో బ‌య‌ట‌ప‌డ‌టం మిరాకిల్ అనే చెప్పాలి.

2,595 మంది మృతి

ఈ జంట భూకంపాలు సృష్టించిన విధ్వంసానికి ఇప్ప‌టి వ‌ర‌కూ 2,595 మంది బ‌ల‌య్యారు. దాదాపు 50,000 మందికిపైగా ఆచూకీ గ‌ల్లంతైంది. వేలాది భ‌వ‌నాలు కూలిపోయాయి. అనేక ఇళ్లు ధ్వంస‌మ‌య్యాయి. ల‌క్ష‌లాది మంది ప్ర‌జ‌ల‌ను నిరాశ్ర‌యుల‌య్యారు.

Also Read..

రొనాల్డోకు ఇదే చివరి ప్రపంచకప్‌..? పోర్చుగల్‌ స్టార్‌ భవిష్యత్‌పై సోదరి కాటియా ఏమన్నదంటే..?

మైదానంలోనే కాదు.. సోష‌ల్ మీడియాలోనూ కింగే.. ఎక్స్‌లో విరాట్ కోహ్లీ అరుదైన రికార్డు

భార‌త్‌-పాక్ యుద్ధాన్ని అలా ఆపాను.. మ‌ళ్లీ పాత‌పాటే ఎత్తుకున్న ట్రంప్‌