US Senate | ఇరాన్‌పై యుద్ధం.. ట్రంప్‌ దూకుడుకు అమెరికా సెనేట్‌ బ్రేక్

US Senate | అమెరికా అధ్యక్షుడు డొనాల్డ్ ట్రంప్ (Donald Trump)కు గట్టి ఎదురుదెబ్బ తగిలింది. ఇరాన్‌పై అధ్య‌క్షుడు అనుసరిస్తున్న దూకుడు (Iran War) వైఖరికి అమెరికా సెనేట్ (US Senate) బ్రేక్ వేసింది. అధ్యక్షుడి యుద్ధ అధికారాలను పరిమితం చేసే తీర్మానానికి సెనేట్‌లో ఆమోదం ల‌భించింది.

ఇరాన్‌పై సైనిక చర్యలకు దిగే విషయంలో అధ్యక్షుడి అధికారాలను నియంత్రించేందుకు ప్ర‌తిప‌క్షాలు గ‌తంలో చాలాసార్లు తీర్మానాన్ని ప్ర‌వేశ‌పెట్టాయి. అయితే, అవి ఆమోదం పొంద‌లేదు. ఈ నేప‌థ్యంలో ఇరాన్‌పై దాడులు ప్రారంభించిన 80 రోజుల త‌ర్వాత ట్రంప్‌కు అమెరికా సెనేట్ (House and Senate) బ్రేక్ వేసింది. అధ్యక్షుడి యుద్ధ అధికారాలను నియంత్రించేందుకు ఉద్దేశించి డెమోక్రటిక్‌ పార్టీకి చెందిన సెనేటర్ టిమ్ కెయిన్ (Tim Kaine) కొత్త తీర్మానాన్ని ప్ర‌వేశ‌పెట్టారు. కాంగ్రెస్‌ స్పష్టమైన అనుమతి లేకుండా ఇరాన్‌లో గానీ, ఇరాన్‌కు వ్యతిరేకంగా గానీ జరిగే ఘర్షణల్లో అమెరికా సైన్యం పాల్గొనరాదని అందులో పేర్కొన్నారు.

100 మంది స‌భ్యులున్న సెనేట్‌లో ఈ తీర్మానానికి ఆమోదం ల‌భించింది. ఓటింగ్‌లో ఈ తీర్మానానికి 50 మంది అనుకూలంగా ఓటు వేయ‌గా.. 47 మంది వ్యతిరేకంగా ఓటు వేశారు. ముఖ్యంగా అధికార రిపబ్లికన్ (Republicans) పార్టీకే చెందిన నలుగురు సభ్యులు కూడా తీర్మానానికి అనుకూలంగా ఓటేయడం చర్చనీయాంశమైంది. త్వరలో ఈ బిల్లుపై తుది ఓటింగ్‌ జరగనుంది. అది చట్టంగా మారితే.. కాంగ్రెస్‌ అధికారిక అనుమతి ఇచ్చే వరకు ట్రంప్‌ ఇరాన్‌పై ఎలాంటి సైనిక దాడులకు ఆదేశాలు ఇవ్వలేరు.

అయితే, రిపబ్లికన్ల ఆధిక్యం ఉన్న హౌస్ ఆఫ్ రిప్రజెంటేటివ్స్ (దిగువ సభ)లో ఈ తీర్మానం తప్పక పాస్ కావాల్సి ఉంటుంది. అంతేకాకుండా, అధ్యక్షుడు ట్రంప్ దీనిని వీటో (తిరస్కరించే అధికారం) చేసే అవకాశం కూడా ఉంటుంది. దీనిని అధిగమించి ఈ తీర్మానం గ‌ట్టెక్కాలంటే హౌస్, సెనేట్ రెండింటిలోనూ మూడింట రెండొంతుల (two-thirds) మెజారిటీ లభించాల్సి ఉంటుంది.

Also Read..

ఏడాది త‌ర్వాత‌.. మ‌ళ్లీ క‌ల‌వ‌బోతున్న మోదీ-ట్రంప్‌..?

మెటాలో మొద‌లైన లేఆఫ్స్‌.. ఉద‌యం 4 గంట‌ల‌కే మెయిల్స్‌

ఇట‌లీలో ప్ర‌ధాని మోదీ.. మ‌రోసారి ట్రెండింగ్‌లో "మెలోడీ" మూమెంట్‌