Mobilization Drill | అత్యవసర సమయాల్లో అప్రమత్తత.. మాసాబ్ ట్యాంక్‌లో మొబిలైజేషన్ డ్రిల్

Mobilization Drill | త్రినేత్ర‌.న్యూస్‌: న‌గ‌రంలో శాంతిభద్రతలను పరిరక్షించడంలో భాగంగా అత్యవసర సమయాల్లో బలగాల సన్నద్ధత, క్షేత్రస్థాయి మోహరింపును పర్యవేక్షించడానికి హైద‌రాబాద్ సిటీ పోలీసులు (Hyderabad City Police) మొబిలైజేష‌న్ డ్రిల్‌ను (Mobilization) నిర్వ‌హించారు. సీపీ స‌జ్జ‌నార్ ఆదేశాల‌తో గోల్కొండ జోన్ డీసీపీ చంద్రమోహన్ ఆధ్వ‌ర్యంలో మాసాబ్ ట్యాంక్ హాకీ గ్రౌండ్స్‌లో అర్ధరాత్రి ప్రత్యేక విన్యాసం (Exercise) నిర్వహించారు.

అత్యవసర పరిస్థితుల్లో పోలీసు యంత్రాంగం వేగంగా స్పందించే సామర్థ్యాన్ని పెంపొందించేందుకు ఈ డ్రిల్‌ను ఏర్పాటు చేశారు. మాసాబ్ ట్యాంక్ సమీపంలోని హాకీ గ్రౌండ్స్‌లో జరిగిన ఈ కార్యక్రమంలో గోల్కొండ జోన్ పరిధిలోని అన్ని పోలీస్ స్టేషన్లకు చెందిన‌ హోంగార్డుల నుంచి ఏసీపీ స్థాయి అధికారుల వరకు సుమారు 650 మంది సిబ్బంది పాల్గొన్నారు.

త్వరితగతిన స్పందన

ఏదైనా అవాంఛనీయ సంఘటనలు లేదా అత్యవసర పరిస్థితులు తలెత్తినప్పుడు, అతి తక్కువ సమయంలో (Quick Response) సిబ్బంది అందరూ నిర్ణీత ప్రదేశానికి ఎలా చేరుకోవాలో వివరించడానికి ఈ మాక్ డ్రిల్ నిర్వహించారు.

సమన్వయం

ఉన్నతాధికారుల ఆదేశాలను పాటిస్తూ, తమకు కేటాయించిన బాధ్యతలను జోనల్ కంట్రోల్ రూమ్‌తో సమన్వయం చేసుకుంటూ ఎలా అమలు చేయాలో సూచనలు ఇచ్చారు. అలాగే అత్యవసర సమయాల్లో అవసరమయ్యే పబ్లిక్ అడ్రస్ సిస్టమ్, అల్లర్ల నియంత్రణ పరికరాలు (Riot Gear), ఫైర్ బాల్స్ వంటి సామగ్రి పనితీరు, లభ్యతను తనిఖీ చేశారు.

క్షేత్రస్థాయి తనిఖీ

అర్ధరాత్రి సమయంలో మాసాబ్ ట్యాంక్ హాకీ గ్రౌండ్స్ వంటి కీలక ప్రాంతాల్లో భద్రతా ఏర్పాట్లను, పోలీసు బలగాల అప్రమత్తతను డీసీపీ స్వయంగా పర్యవేక్షించారు.

ప్రజల భద్రతే పోలీసుల ప్రాథమిక విధి అని గోల్కొండ జోన్ డీసీపీ జీ. చంద్రమోహన్ అన్నారు. క్లిష్ట సమయాల్లో ఏ క్షణంలోనైనా బలగాలు మోహరించడం చాలా కీలక‌మ‌ని చెప్పారు. ఇలాంటి డ్రిల్స్ బలగాల సన్నద్ధతను పెంచడమే కాకుండా, అత్యవసర పరిస్థితుల్లో ప్రజలకు తక్షణ సహాయం అందేలా చూస్తాయ‌ని చెప్పారు. శాంతిభద్రతల పరిరక్షణకు అలుపెరగని కృషి చేస్తున్న గోల్కొండ జోన్ పోలీసులను ఆయన అభినందించారు.

ఇవికూడా చ‌ద‌వండి..

చాట్ జీపీటీని భారీ ఎత్తున బ‌హిష్క‌రిస్తున్న అమెరిక‌న్లు.. కార‌ణం ఏంటంటే..

యష్ ‘టాక్సిక్’కు వార్ సెగ‌.. సినిమా రిలీజ్ పోస్ట్‌పోన్‌

ఓవ‌ర్ స్పీడ్‌.. టీమ్ఇండియా మాజీ కెప్టెన్‌కు ట్రాఫిక్ చాలాన్‌

బంగారం, వెండి ధ‌ర‌ల‌పై యుద్ధం ఎఫెక్ట్ లేదా..? ధ‌ర‌లు త‌గ్గుతూనే ఉన్నాయి..