Kriti Sanon | కృతి స‌న‌న్ దుస్తుల‌పై వివాదం.. రాఖీ యాడ్ వీడియో తొల‌గింపు

Kriti Sanon | త్రినేత్ర‌.న్యూస్ : ప్ర‌ముఖ‌ ఆభరణాల బ్రాండ్ గివా (GIVA) రూపొందించిన రక్షాబంధన్‌ యాడ్‌లో (Rakhi ad outfit) బాలీవుడ్ న‌టి కృతిస‌న‌న్ (Kriti Sanon) వేసుకున్న దుస్తులు వివాదాస్ప‌దమైన విష‌యం తెలిసిందే. ఆ యాడ్‌లో న‌టి బికినీ ధరించి రాఖీ కట్టడంపై తీవ్ర విమ‌ర్శ‌లు వ్య‌క్త‌మ‌వుతున్నాయి. ఈ నేప‌థ్యంలో తాజాగా కీల‌క ప‌రిణామం చోటు చేసుకుంది. రాఖీ యాడ్ వీడియోని GIVA తొల‌గించింది.

ర‌క్షాబంధ‌న్‌ను పుర‌స్క‌రించుకొని ఈ యాడ్‌ను GIVA సంస్థ విడుద‌ల చేసిన‌ప్ప‌టి నుంచే ఇది హెడ్‌లైన్స్‌లో నిలుస్తూ వ‌స్తోంది. యాడ్ వీడియోపై అన్ని వ‌ర్గాల నుంచి వ్య‌తిరేక‌త వ్య‌క్త‌మ‌వుతోంది. ఈ నేప‌థ్యంలోనే సంస్థ ఈ నిర్ణ‌యం తీసుకుంది. భారతీయ సంస్కృతి, సంప్రదాయాల పట్ల తమకు గౌరవం ఉందని గివా తెలిపింది. ఇలాంటి పండుగ‌ల‌ను, ఆనంద‌క‌ర‌మైన క్ష‌ణాల‌ను కుటుంబం మొత్తంతో జ‌రుపుకోవ‌డాన్నే త‌మ సంస్థ న‌మ్ముతుంద‌ని.. ఈసారి వేడుకల్లో పెంపుడు జంతువుల‌ను కూడా భాగం చేయాల‌ని భావించిన‌ట్లు చెప్పింది. ప్రజల మనోభావాలను దెబ్బతీసే ఉద్దేశం తమకు లేదని స్ప‌ష్టం చేసింది. ఈ వివాదం నేపథ్యంలో అందరి మనోభావాలను గౌరవిస్తూ ఆ ప్రకటనను పూర్తిగా ఉపసంహరించుకుంటున్నట్లు కంపెనీ తెలిపింది. ఈ మేర‌కు క్ష‌మాప‌ణ‌లు కోరుతూ ఇన్‌స్టాగ్రామ్‌లో ఓ ప్ర‌క‌ట‌న విడుదల చేసింది.

ఇదీ వివాదం..

ప్ర‌ముఖ‌ ఆభరణాల బ్రాండ్ గివా (GIVA) రూపొందించిన రక్షాబంధన్‌ యాడ్‌లో (Rakhi ad outfit) బాలీవుడ్ న‌టి కృతిస‌న‌న్ (Kriti Sanon) వేసుకున్న దుస్తుల‌పై సోష‌ల్ మీడియాలో పెద్ద ఎత్తున చ‌ర్చ జ‌రుగుతోంది. బ్రాలెట్‌ తరహా బ్లౌజ్‌, కేప్‌, డ్రేప్డ్‌ స్కర్ట్‌తో ఆమె కనిపించిన తీరు సోషల్‌ మీడియాలో చర్చనీయాంశమైంది. రక్షాబంధన్‌ వంటి సంప్రదాయ పండగకు సంబంధించిన ప్రకటనలో ఇలాంటి వస్త్రధారణ ఏంటంటూ కొందరు నెటిజన్లు అభ్యంతరం వ్యక్తం చేస్తున్నారు. మ‌రికొంద‌రేమో మహిళలకు తమకు నచ్చిన దుస్తులు ధరించే హ‌క్కు ఉందంటూ కృతికి మ‌ద్ద‌తుగా నిలుస్తున్నారు.

ట్రోల్స్‌పై కృతి స్పంద‌న ఇదీ..

ఈ విమర్శలపై కృతి తన ఇన్‌స్టాగ్రామ్‌ వేదికగా ఇప్ప‌టికే స్పందించిన విష‌యం తెలిసిందే. రక్షాబంధన్‌ అంటే కేవలం అన్నాచెల్లెళ్ల మధ్య బంధం మాత్రమే కాదని.. పరస్పరం ఒకరికొకరు అండగా నిలిచే అనుబంధానికి ప్రతీక అని పేర్కొంది. తాను, తన సోదరి ప్రతి ఏడాది ఒకరికొకరు రాఖీ కట్టుకుంటామని తెలిపింది. అన్న తనను రక్షించినట్లే తాము కూడా ఒకరినొకరు కాపాడుకోగలమనే నమ్మకం తమకుందని చెప్పింది. తమ ఆరోగ్యం, ఆనందం, దీర్ఘాయుష్షు కోసం పరస్పరం ప్రార్థించుకుంటామని కృతి వెల్లడించింది. తమ పెంపుడు కుక్కలను కూడా కుటుంబంలో భాగంగానే భావిస్తామని.. వాటి కోసం కూడా ప్రార్థిస్తామని పేర్కొంది. మహిళ ఏం ధరిస్తుందనే అంశాన్ని ఆమె సంస్కృతి, సంప్రదాయాల పట్ల ఉన్న గౌరవానికి కొలమానంగా చూడటం సరికాదని కృతి స్పష్టం చేసింది. కాలానుగుణంగా సంప్రదాయ వస్త్రధారణలోనూ ఎన్నో మార్పులు చోటుచేసుకున్నాయని గుర్తుచేసింది. అలాంటప్పుడు మహిళల సంస్కృతిని కేవలం వారి దుస్తులను చూసి ఎందుకు నిర్ణయిస్తున్నారని ప్రశ్నించింది. ‘సంస్కృతి, సంప్రదాయాలు మహిళ హృదయంలో ఉంటాయి.. ఆమె దుస్తుల నెక్‌లైన్‌లో కాదు’ అంటూ విమర్శకులకు కృతి గట్టి సమాధానమిచ్చింది.

రాహుల్ మ‌ద్ద‌తు..

ఈ వివాదంపై కాంగ్రెస్ అగ్ర‌నేత‌, ప్ర‌తిప‌క్ష నేత రాహుల్ గాంధీ (Rahul Gandhi) స్పందించారు. ఒక మహిళ ఏం ధరించాలి, ఏం చేయాలి, ఎక్కడికి వెళ్లాలి అనేది పూర్తిగా ఆమె వ్యక్తిగత ఎంపిక అని తెలిపారు. స్వేచ్ఛగా జీవిస్తున్న మహిళలను ఆన్‌లైన్ ట్రోలింగ్ చేయడం ఆపాలంటూ ఇన్‌స్టాగ్రామ్ స్టోరీస్‌లో రాహుల్ రాసుకొచ్చారు. త‌న పోస్టుకు '#SmashThePatriarchy' (పితృస్వామ్య వ్యవస్థను కూల్చేయాలి) అనే హ్యాష్‌ట్యాగ్‌ను జోడించారు.

బ్రో.. వెయిట్‌.. రాహుల్‌కు కంగ‌న కౌంట‌ర్‌

కృతి యాడ్‌పై ఇప్ప‌టికే ఆన్‌లైన్‌లో పెద్ద ఎత్తున చ‌ర్చ జ‌రుగుతుండ‌గా ఈ వ్య‌వ‌హారంలోకి రాహుల్ ఎంట్రీ ఇవ్వ‌డం ఆస‌క్తిక‌రంగా మారింది. ఈ వివాదం కాస్తా బీజేపీ Vs కాంగ్రెస్ మ‌ధ్య మాట‌ల యుద్ధానికి దారితీసింది. రాహుల్ స్పందన‌పై బాలీవుడ్ ఫైర్ బ్రాండ్‌, బీజేపీ ఎంపీ కంగ‌న ర‌నౌత్ (Kangana Ranaut) తీవ్రంగా స్పందించారు. మహిళలకు తమకు నచ్చిన దుస్తులు ధరించే హక్కు, స్వేచ్ఛ ఉన్నాయని చెబుతూనే.. కొన్ని సందర్భాల్లో తగిన పరిమితులను పాటించడం అవసరమని ఇప్ప‌టికే త‌న అభిప్రాయాన్ని వ్య‌క్తం చేసిన కంగ‌న‌.. రాహుల్ పోస్టుకు వ్యంగ్యాస్త్రాలు సంధించారు. "బ్రో, వెయిట్.. భారత్ మాతా కీ జై. షురూ కర్తే హై" అంటూ ఎద్దేవా చేశారు.

Kriti sanon wearing a bra while tying a rakhi to her brother in a new jewellery Ad by GIVA. You won't see them making fun of either Eid or Christmas. pic.twitter.com/EcSmwyhiNT

— smh (@seemhuh) August 22, 2026

Also Read..

ట్రంప్ మ‌రో షాక్‌.. ప్ర‌పంచ వ్యాప్తంగా వీసా అపాయింట్‌మెంట్లు నిలిపివేత‌

ఆసుప‌త్రిలో భారీ అగ్నిప్ర‌మాదం.. 15 మంది న‌వ‌జాత శిశువులు స‌జీవ‌ద‌హ‌నం

భార‌త్ ధ‌ర్మ‌శాల కాదు.. ఇక్క‌డ నివ‌సించే హ‌క్కు దేశ ప్ర‌జ‌ల‌కు మాత్ర‌మే ఉంది : అమిత్ షా