ICICI Bank | ఐసీఐసీఐ బ్యాంకులో రూ.23 కోట్ల మోసం.. న‌కిలీ బంగారం పెట్టి రుణం పొందిన క‌స్ట‌మ‌ర్లు

ICICI Bank | దేశంలో అతిపెద్ద ప్రైవేటు రంగ బ్యాంకు అయిన ఐసీఐసీఐలో (ICICI Bank) భారీ గోల్డ్ స్కామ్ వెలుగు చూసింది. మ‌హారాష్ట్ర నాగ్‌పూర్ (Nagpur)లోని ఐసీఐసీఐ బ్యాంకుకు చెందిన‌ తొమ్మిది శాఖ‌ల్లో ఖాతాదారులు నకిలీ బంగారాన్ని (fake gold) తాక‌ట్టు పెట్టిన‌ట్లు తేలింది. ఈ స్కామ్ (gold loan scam) విలువ రూ.23 కోట్లుగా తేలింది. ఈ విష‌యం బ్యాంక్‌లో నిర్వ‌హించిన ఆడిట్ ద్వారా బ‌య‌ట‌ప‌డింది.

జనవరి 2023 నుంచి అక్టోబర్ 2025 మధ్య కాలంలో ఈ స్కామ్‌ జ‌రిగింది. అయితే, రెండేళ్ల త‌ర్వాత 'గోల్డ్ లోన్' పోర్ట్‌ఫోలియోపై నిర్వహించిన అంతర్గత తనిఖీల్లో ఈ విష‌యం బయటపడింది. ఆడిట్ సమయంలో తొమ్మిది వేర్వేరు శాఖల్లో తాకట్టు పెట్టిన ఆభరణాలను పరిశీలించగా, అవి అసలు బంగారం కాదని, నకిలీ అని తేలింది. మొత్తం 195 మంది ఖాతాదారులు ఈ నకిలీ బంగారాన్ని చూపి రుణాలు పొందిన‌ట్లు అధికారులు గుర్తించారు. ICICI బ్యాంక్ జోనల్ కార్యాలయంలో ఉద్యోగి అయిన ధనంజయ్ రమేష్ థైటే ఇచ్చిన ఫిర్యాదు మేర‌కు ధంతోలి పోలీసులు (Dhantoli police) మోసం కింద కేసు నమోదు చేసి దర్యాప్తు ప్రారంభించారు.

సాధార‌ణంగా బ్యాంకుల్లో బంగారం స్వ‌చ్ఛ‌త‌ను ధృవీక‌రించేందుకు 'వాల్యూయర్స్' (Valuers) ఉంటారు. వారు మ‌నం తాక‌ట్టు పెట్టే బంగారాన్ని త‌నిఖీ చేసిన త‌ర్వాతే మ‌న‌కు రుణం మంజూరు చేస్తారు. వాల్యూయ‌ర్స్ అనుమ‌తి, క్లియ‌రెన్స్‌ లేకుండా ఇంత పెద్ద మొత్తంలో రుణాలు మంజూరు కావడం అసాధ్యం. ఈ కుట్రలో బ్యాంక్ ఉద్యోగులు, అధికారుల ప్ర‌మేయం కూడా ఉందా..? అనే కోణంలో పోలీసులు విచారిస్తున్నారు.

Also Read..

గోల్డ్ లోన్ తీసుకున్నాక ధ‌ర‌లు ప‌డిపోతే ఏం చేస్తారు..? LTV అంటే ఏమిటి..?

సీసీటీవీ కెమెరాల అమ్మ‌కాల‌పై క‌ఠిన నిబంధ‌న‌లు తెచ్చిన‌ ప్ర‌భుత్వం.. చైనా కంపెనీల‌కు షాకే

చ‌రిత్ర‌లో తొలిసారి డ‌బుల్ అయిన జెట్ ఫ్యూయ‌ల్ ధ‌ర‌.. భారీగా పెరగనున్న విమాన ఛార్జీలు!