Delhi AAP Protest | ఢిల్లీలో ఆప్ రణరంగం: సీఈసీకి వ్యతిరేకంగా భగ్గుమన్న కార్యకర్తలు

• ఢిల్లీలో హైడ్రామా
• సీఈసీ జ్ఞానేష్ కుమార్‌కు వ్యతిరేకంగా ఆప్ ఉధృత నిరసన
• బారికేడ్లు ధ్వంసం

Delhi AAP Protest | త్రినేత్ర న్యూస్ : చీఫ్ ఎలక్షన్ కమిషనర్ (CEC) జ్ఞానేష్ కుమార్‌కు వ్యతిరేకంగా ఆమ్ ఆద్మీ పార్టీ (ఆప్) చేపట్టిన ఆందోళన ఆదివారం దేశ రాజధాని ఢిల్లీలో తీవ్ర ఉద్రిక్తతకు దారితీసింది. ఇండియా గేట్ సమీపంలో ప్రారంభమైన నిరసన క్రమంగా ఉధృతంగా మారి.. పోలీసులు ఏర్పాటు చేసిన రక్షణ కవచాలను చేధించే స్థాయికి చేరింది. భద్రతా బలగాల బారికేడ్లను బద్దలుకొట్టుకుంటూ వేలాదిగా కార్యకర్తలు జంతర్ మంతర్ వైపు దూసుకెళ్లడంతో ఆ ప్రాంతమంతా తీవ్ర ఉద్రిక్త వాతావరణం నెలకొంది.

Also Read | అంతర్జాతీయ వేదికపై ఒంటరిగా మారుతున్న అమెరికా

బారికేడ్లు ధ్వంసం.. జంతర్ మంతర్ వైపు పరుగులు

ఎన్నికల సంఘం, సీఈసీ జ్ఞానేష్ కుమార్ నిర్ణయాలకు వ్యతిరేకంగా ఆప్ శ్రేణులు, పార్టీ విద్యార్థి విభాగం 'అసాప్' (ASAP) సభ్యులు పెద్ద ఎత్తున రోడ్లపైకి వచ్చారు. శాంతి భద్రతల పరిరక్షణ కోసం ఢిల్లీ పోలీసులు భారీగా బారికేడ్లు ఏర్పాటు చేసినప్పటికీ, ఆందోళనకారులు వాటిని తోసివేస్తూ ముందుకు సాగారు. పరిస్థితి అదుపు తప్పుతుండటంతో ఢిల్లీ పోలీసులతో పాటు పారామిలిటరీ బలగాలు, ర్యాపిడ్ యాక్షన్ ఫోర్స్ (RAF) రంగంలోకి దిగి నిరసనకారులను అడ్డుకునేందుకు తీవ్రంగా ప్రయత్నించాయి.

Also Read | మ‌హిళ‌ల గురించి త‌ప్పుగా మాట్లాడితే ఊరుకోం.. స్టాలిన్‌కు విజ‌య్ హెచ్చ‌రిక‌

బస్సుల ముట్టడి.. వాహనాలపైకి ఎక్కిన మహిళలు

పోలీసులు పలువురు కార్యకర్తలను అదుపులోకి తీసుకుని ప్రత్యేక బస్సుల్లో తరలించే ప్రయత్నం చేయగా.. మిగతా శ్రేణులు ఆ బస్సులకు అడ్డంగా నిలిచి వాహనాలను కదలనివ్వకుండా అడ్డుకున్నారు. బస్సుల చుట్టూ రక్షణ వలయంగా ఏర్పడిన భద్రతా సిబ్బందితో నిరసనకారులు వాగ్వాదానికి దిగారు. మరోవైపు, మహిళా కార్యకర్తలు నిరసన ప్రదర్శనలో భాగంగా ఓ వాహనం పైకి ఎక్కి నినాదాలు చేస్తూ జెండాలతో నిరసన తెలిపారు.

ఎన్నికల సంఘం చుట్టూ తీవ్ర రాజకీయ దుమారం రేగుతున్న సమయంలో ఆప్ చేపట్టిన ఈ ఆందోళన రాజకీయ వర్గాల్లో పెను ప్రకంపనలు సృష్టిస్తోంది.