INDIA Bloc Delhi Rally | ఓట్ల దొంగలను వదిలిపెట్టం.. జ్ఞానేశ్ జైలుకెళ్లడం ఖాయం

• జ్ఞానేశ్ రాజీనామా తర్వాత నీ వంతే మోదీ
• రాంలీలా మైదాన్‌లో విపక్షాల మహా గర్జన
• 2024 ఎన్నికలు పూర్తిగా అక్రమం
• మోదీ సర్కార్‌పై ఇండియా కూటమి యుద్ధభేరి

INDIA Bloc Delhi Rally | త్రినేత్ర న్యూస్ : దేశ రాజధాని ఢిల్లీ రాజకీయ కురుక్షేత్రంగా మారింది. కేంద్ర ప్రభుత్వం, ఎన్నికల సంఘం తీరుపై విపక్ష ఇండియా కూటమి కనీవినీ ఎరుగని రీతిలో సమరశంఖం పూరించింది. దేశవ్యాప్తంగా ఓటరు జాబితాల్లో అక్రమాలు జరుగుతున్నాయని, కోట్లాది మంది పేర్లను తొలగిస్తూ 'ఓటు చోరీ'కి పాల్పడుతున్నారని ఆరోపిస్తూ ఆదివారం నిర్వహించిన 'ఛలో ఢిల్లీ' మహా ర్యాలీతో చారిత్రక రాంలీలా మైదాన్ జనసంద్రమైంది. మింటో రోడ్ నుంచి రాంలీలా మైదాన్ దాకా అగ్రనేతలు ర్యాలీగా కదిలిరాగా, వేలాది మంది కార్యకర్తలు తరలివచ్చారు. చీఫ్ ఎలక్షన్ కమిషనర్ జ్ఞానేశ్ కుమార్ తక్షణమే రాజీనామా చేయాలని విపక్షాలు ఏకగ్రీవంగా డిమాండ్ చేశాయి. అదే సమయంలో కాంగ్రెస్ ర్యాలీని లక్ష్యంగా చేసుకుని 1984 సిక్కు వ్యతిరేక అల్లర్ల వార్షికోత్సవాన్ని గుర్తుచేస్తూ బీజేపీ పశ్చిమ ఢిల్లీ, రోహ్‌తక్‌లలో భారీ పోటీ ప్రదర్శనలు నిర్వహించడంతో రాజధానిలో తీవ్ర ఉద్రిక్త వాతావరణం నెలకొంది.

2024 ఎన్నికలు అక్రమం.. సీఈసీ జైలుకు వెళ్లడం ఖాయం

లోక్‌సభ ప్రతిపక్ష నేత రాహుల్ గాంధీ ప్రసంగిస్తూ కేంద్ర ప్రభుత్వంపై మునుపెన్నడూ లేని స్థాయిలో విరుచుకుపడ్డారు. "ఈ దేశంలో ఓట్ల దొంగతనం అనేది రాజ్యాంగ విరుద్ధమైన దేశద్రోహం. 2024 లోక్‌సభ ఎన్నికల్లో ఈవీఎంలు, ఓటర్ల జాబితాల మార్పు ద్వారా పచ్చి మోసం జరిగింది. ఆ ఎన్నికలు పూర్తిగా అక్రమం. 2024 ఎన్నికల తర్వాత దేశంలో ఏకంగా 15 శాతం మంది ఓటర్ల పేర్లను జాబితాల నుంచి తొలగించారని సాక్షాత్తూ ఎన్నికల సంఘం గణాంకాలే చెబుతున్నాయి. చీఫ్ ఎలక్షన్ కమిషనర్ జ్ఞానేశ్ కుమార్ అండ లేకపోతే మోదీ ప్రధాని కాలేరు, అమిత్ షా హోంమంత్రి కాలేరు. జ్ఞానేశ్ కుమార్‌ను పదవి నుంచి తొలగించి జైలుకు పంపడం ఖాయం. ఆయన తర్వాత ప్రధాని మోదీ, అమిత్ షాలు కూడా తప్పించుకోలేరు. శివుడి పెళ్లి ఊరేగింపులో అందరికీ ఎలా చోటుంటుందో.. అలాంటి సమ సమాజం కోసం మేం రాజ్యాంగాన్ని కాపాడుకుంటాం" అని రాహుల్ హెచ్చరించారు. కన్నాట్ ప్లేస్‌లో వ్యాపారులకు లబ్ధి కలగకూడదనే ఉద్దేశంతో బీజేపీ దుకాణాలను బలవంతంగా మూసివేయించిందని కూడా ఆయన ఆరోపించారు.

ఓట్ల చోరీతో గద్దెనెక్కిన దొంగలను తరమాలి

కాంగ్రెస్ జాతీయ అధ్యక్షుడు మల్లికార్జున్ ఖర్గే ప్రసంగిస్తూ.. "ఈడీ, సీబీఐ లేదా పోలీసులకు విపక్ష నాయకులు ఎవరూ భయపడరు. కేంద్రంలోని బీజేపీ సర్కార్‌తో పాటు మహారాష్ట్ర, బిహార్, ఉత్తరప్రదేశ్‌లలో ఉన్నవన్నీ ఓట్ల దొంగతనంతో ఏర్పడిన ప్రభుత్వాలే. వీళ్లని ప్రజలు ఎన్నుకోలేదు.. వీళ్లే ఓట్లను మార్చుకుని అధికారంలోకి వచ్చారు. ఇలాంటి ఓట్ల దొంగలను సాగనంపినప్పుడే దేశంలో ప్రజాస్వామ్యం మనగలుగుతుంది. మోదీని అధికారం నుంచి దించడమే ప్రజాస్వామ్య పరిరక్షణకు ఏకైక మార్గం" అని తేల్చిచెప్పారు.

రావణుడిని అంతమొందించేందుకు వచ్చిన వానర సైన్యం

రాష్ట్ర ముఖ్యమంత్రి ఎనుముల రేవంత్ రెడ్డి ఢిల్లీలోని తెలంగాణ భవన్ వద్ద ఘాటుగా మాట్లాడారు. "దేశాన్ని పాలిస్తున్న రావణాసురుడు మోదీని గద్దె దించేందుకు తెలంగాణ కాంగ్రెస్ శ్రేణులు 'వానర సైన్యం'లా ఢిల్లీకి తరలివచ్చాయి. ప్రత్యేక రైళ్లను రద్దు చేసి అడ్డంకులు సృష్టించినా వేలాదిగా కార్యకర్తలు ఆగలేదు. పేదల ఓట్లను తొలగిస్తూ కేంద్రం అధికార దుర్వినియోగానికి పాల్పడుతోంది. ఇప్పటికే ఎస్ఐఆర్ పేరుతో 13.5 కోట్ల ఓట్లను తొలగించారు.. రేపు 20 కోట్ల ఓట్లను మాయం చేసే ప్రమాదముంది. ఈ అన్యాయాన్ని దేశం చూస్తూ ఊరుకోదు" అని సీఎం రేవంత్ హెచ్చరించారు.

రాంలీలా మైదాన్ నేడు ప్రజాస్వామ్య హల్దీఘాటీ.. యూపీలో బీజేపీ ఖతం

సమాజ్‌వాదీ పార్టీ అధినేత అఖిలేష్ యాదవ్ మాట్లాడుతూ చారిత్రక వ్యాఖ్యలు చేశారు. "ఈ రోజు రాంలీలా మైదాన్ ప్రజాస్వామ్య హల్దీఘాటీగా మారింది. ఇక్కడ కనిపిస్తున్న విప్లవ చైతన్యం దేశంలో రాబోయే రాజకీయ మార్పునకు నిదర్శనం. ఉత్తరప్రదేశ్ ప్రజలకు అధికారాన్ని కట్టబెట్టడం ఎంత బాగా తెలుసో.. అధికారంలో ఉన్నవారిని సాగనంపడం అంతకంటే బాగా తెలుసు. యూపీ నుంచే గద్దెనెక్కిన వారు అక్కడి నుంచే పతనమవుతారు. 2027 అసెంబ్లీ ఎన్నికల్లో బీజేపీ, దాని మిత్రపక్షాలకు ప్రజలు ఘనమైన వీడ్కోలు పలకడం ఖాయం. అమిత్ షా తమ బలం అంగదుడి కాలులా నిలకడగా ఉందని చెబుతున్నారు.. అసలు నిలబడటానికి నేలే లేనప్పుడు అంగదుడు కాలు ఎక్కడ పెడతాడు? వారణాసిలో డబుల్ ఇంజిన్ సర్కార్‌ను డబుల్ జీరో చేశాం. ఓటమి భయంతోనే బీజేపీ ఓట్ల తొలగింపు కుట్రలకు పాల్పడుతోంది" అని అఖిలేష్ ఎద్దేవా చేశారు.

బెంగాల్‌ను దోచుకున్నారు.. ప్రజాస్వామ్యాన్ని కాపాడుకుంటాం

పశ్చిమ బెంగాల్ మాజీ ముఖ్యమంత్రి మమతా బెనర్జీ బీజేపీపై తీవ్ర స్థాయిలో ధ్వజమెత్తారు. "స్పెషల్ ఇంటెన్సివ్ రివిజన్ పేరుతో జరుగుతున్న కుట్రకు బెంగాల్ తీవ్రంగా నష్టపోయింది. ప్రజాస్వామ్య హక్కులను కాలరాస్తున్న బీజేపీ తీరుపై రాజీలేని పోరాటం చేస్తాం. మా రాష్ట్రాన్ని దోచుకున్నారు.. దీనికి ప్రజాస్వామ్యబద్ధంగా ప్రతీకారం తీర్చుకుంటాం. దేశంలో ప్రజాస్వామ్యాన్ని కాపాడటానికి ఢిల్లీ వీధుల్లో మేమంతా ఏకమయ్యాం. బీజేపీ ప్రభుత్వం గద్దె దిగక తప్పదు, పోక తప్పదు" అని స్పష్టం చేశారు. సోనియా గాంధీని అగ్రనేతగా, రాహుల్‌ను యువ నేతగా ఆమె అభివర్ణిస్తూ యువత, విద్యార్థుల పోరాటానికి సంఘీభావం తెలిపారు.

రామాయణ వేదికపై ఓట్ల దొంగల కోసం మహాభారతం

ఆర్జేడీ అగ్రనేత తేజస్వి యాదవ్ మాట్లాడుతూ బీజేపీపై తీవ్ర వ్యంగ్యాస్త్రాలు సంధించారు. "సాధారణంగా రాంలీలా మైదాన్ రామాయణ వేదికగా ప్రసిద్ధి చెందింది. కానీ దేశంలో ఓట్లను దొంగిలిస్తున్న వారి భరతం పట్టేందుకు మేం ఇక్కడ 'మహాభారతం' ప్రారంభించాం. మహాభారత సంగ్రామం యుద్ధభూమిలో మొదలు కాలేదు.. శకుని ఆడిన పాచికల ఆటతో మొదలైంది. ప్రస్తుతం కేంద్రంలోని పెద్దలు కూడా రాజ్యాంగ వ్యవస్థలను పావులుగా వాడుకుంటూ శకుని పాచికల ఆటే ఆడుతున్నారు. టీసీఎస్ సాఫ్ట్‌వేర్ వ్యవహారాలపై పారదర్శకత లేదు, రాజ్యాంగ సంస్థలు ప్రభుత్వ ఆదేశాల మేరకే పనిచేస్తున్నాయి. అందుకే ఈ కురుక్షేత్ర పోరాటం తప్పడం లేదు" అని తేజస్వి మండిపడ్డారు.