Congress Vs DMK | అందుకే టీవీకేకి మ‌ద్ద‌తిచ్చాం.. ఉద‌య‌నిధి వెన్నుపోటు వ్యాఖ్య‌ల‌ను తీవ్రంగా ఖండించిన కాంగ్రెస్‌

Congress Vs DMK | రాజ‌కీయ ల‌బ్ధి కోసం హ‌స్తం పార్టీ త‌మ‌ను వెన్నుపోటు పొడిచిందంటూ కాంగ్రెస్ పార్టీపై డీఎంకే (Congress Vs DMK) నేత ఉద‌య‌నిధి స్టాలిన్ (Udhayanidhi Stalin) చేసిన వ్యాఖ్య‌లు రాజ‌కీయ దుమారం రేపుతున్నాయి. ఉద‌య‌నిధి వ్యాఖ్య‌ల‌ను కాంగ్రెస్ గ‌ట్టిగా తిప్పికొట్టింది. ఉదయనిధి వ్యాఖ్యలు ఎంతమాత్రం ఆమోదయోగ్యం కావని కాంగ్రెస్‌ పార్టీ సీనియ‌ర్ నేత మాణికం ఠాకూర్ (Manickam Tagore) వ్యాఖ్యానించారు. క‌ష్ట‌కాలంలో డీఎంకేకు కాంగ్రెస్ అండ‌గా నిలిచింద‌ని ఈ సంద‌ర్భంగా గుర్తు చేశారు. పొత్తు రాజ‌కీయాల్లో త‌మ పార్టీ కీల‌క పాత్ర పోషించింద‌న్నారు.

విజ‌య్ నేతృత్వంలోని టీవీకేతో కూట‌మిని ఏర్పాటు చేయాల‌నే త‌మ పార్టీ నిర్ణ‌యం.. ద‌క్షిణాది రాష్ట్ర‌మైన త‌మిళ‌నాడులో బీజేపీ ప‌ట్టు సాధించ‌కుండా అడ్డుకునేందుకేన‌ని ఆయ‌న స్ప‌ష్టం చేశారు. "కాంగ్రెస్ ఎప్పుడూ సెక్యుల‌ర్ కూట‌మి కోస‌మే ప‌నిచేసింది. కానీ బీజేపీ మాత్రం డీఎంకే, ఏఐఏడీఎంకేల‌ను క‌లిపే ప్ర‌య‌త్నాలు చేస్తోంది. ఇది మా సిద్ధాంతాల‌కు వ్య‌తిరేకం. బీజేపీతో ఎలాంటి అవ‌గాహ‌న కుదుర్చుకున్నా కాంగ్రెస్ స‌హించ‌బోదు" అని ఆయన స్పష్టం చేశారు.

కాగా, కాంగ్రెస్ పార్టీని డీఎంకే ఇక‌పై ఎన్న‌టికీ న‌మ్మ‌ద‌ని, ఆ జాతీయ పార్టీ నాయ‌కుల‌కు క‌నీస కృత‌జ్ఞ‌త‌, సంస్కారం లేవు అంటూ స్టాలిన్ తీవ్ర స్థాయిలో విమ‌ర్శ‌లు చేసిన విష‌యం తెలిసిందే. "కాంగ్రెస్ ఐదు స్థానాల్లో గెలవడానికి డీఎంకే కార్యకర్తలే కారణం. ఎంకే స్టాలిన్ ముఖ్యమంత్రి కావాలని ప్రజలు వారికి ఓటు వేశారు. కానీ ఈరోజు కొన్ని పదవుల కోసం వారు మాకు కనీస సమాచారం కూడా ఇవ్వకుండా పారిపోయారు. వారిని ఇక‌పై మ‌న ద‌రిదాపుల్లోకి కూడా రానివ్వ‌కూడ‌దు. త్వరలోనే తమిళనాడు ప్రజలు వారికి తగిన గుణపాఠం చెబుతారు. దేశ‌వ్యాప్తంగా బీజేపీ ఎదుగుద‌ల‌కు కాంగ్రెస్ పార్టీనే కార‌ణం. అసెంబ్లీ ఎన్నికల్లో మా నాయకుడు ఎంకే స్టాలిన్ కాంగ్రెస్‌ను తన భుజాలపై మోశారు" అని ఉదయనిధి స్టాలిన్ కాంగ్రెస్ పార్టీపై విరుచుకుప‌డ్డారు. ఈ నేప‌థ్యంలో ఉద‌య‌నిధి వ్యాఖ్య‌ల‌పై మాణికం ఠాకూర్ పైవిధంగా స్పందించారు.

Also Read..

నెల రోజుల పాటు నిమ్మ‌ర‌సం, తేనె నీళ్ల‌ను తాగితే శ‌రీరంలో మార్పులు క‌నిపిస్తాయా.. నిపుణులు ఏమంటున్నారు..?

అస్సాం అసెంబ్లీ ముందుకు ఉమ్మడి పౌర స్మృతి బిల్లు.. తీవ్రంగా వ్య‌తిరేకిస్తున్న ప్ర‌తిప‌క్షాలు

ఆకాశంలో పారాగ్లైడ‌ర్‌ను ఢీ కొట్టిన విమానం.. భాయ‌నక‌ దృశ్యాలు