CEC Gyanesh Kumar Resignation | ‘సర్’ రద్దు.. సీఈసీ వద్దు : ఢిల్లీ టు గల్లీ దద్దరిల్లిన నిరసనలు

• అట్టుడికిన జంతర్ మంతర్
• హైదరాబాద్‌లో టీపీసీసీ చలో లోక్ భవన్
• బెంగళూరులో చెప్పుల ప్రదర్శన
• కదం తొక్కిన ధ్రువ్ రాఠీ, ప్రకాష్ రాజ్
• ఢిల్లీలో కాంగ్రెస్ హైకమాండ్ సమీక్షలో పాల్గొన్న సీఎం రేవంత్

ఎన్నికల సంఘం చేపట్టిన ఓటర్ల జాబితా ప్రత్యేక సవరణ ప్రక్రియ దేశవ్యాప్తంగా పెను రాజకీయ తుపాను రేపుతోంది. దేశవ్యాప్తంగా దాదాపు 13 కోట్ల మంది అర్హులైన పౌరుల ఓట్లను అక్రమంగా గల్లంతు చేశారని, ఇతర కమిషనర్ల ఆమోదం లేకుండానే సీఈసీ జ్ఞానేష్ కుమార్ ఏకపక్షంగా నిర్ణయాలు తీసుకున్నారని ఆరోపిస్తూ విపక్ష 'ఇండియా' కూటమి, ప్రజా సంఘాలు పోరుబాట పట్టాయి. 'సర్ రద్దు.. సీఈసీ వద్దు' అన్న నినాదంతో ఢిల్లీ, హైదరాబాద్, బెంగళూరు నగరాల్లో గురువారం భారీ ఎత్తున నిరసనలు వెల్లువెత్తాయి. సుప్రీంకోర్టు నోటీసులు, అగ్రనేతల అరెస్టులు, పోలీస్ లాఠీఛార్జీల నడుమ ఈ వివాదం ఇప్పుడు దేశంలో హాట్ టాపిక్‌గా మారింది.

CEC Gyanesh Kumar Resignation | త్రినేత్ర న్యూస్ : దేశ రాజధాని ఢిల్లీలో నిరసనల పరంపర మూడో రోజుకు చేరుకుని తీవ్ర ఉద్రిక్తతలకు దారితీసింది. కేంద్ర ఎన్నికల సంఘం ప్రధాన కార్యాలయం ముట్టడికి యత్నించిన లోక్‌సభ ప్రతిపక్ష నేత రాహుల్ గాంధీ, కాంగ్రెస్ ప్రధాన కార్యదర్శి ప్రియాంక గాంధీ వాద్రాలతో పాటు దాదాపు 300 మంది ఎంపీలు జనపథ్ రోడ్డుపై బైఠాయించారు. పోలీసులు బారికేడ్లు వేసి అడ్డుకోవడంతో తోపులాట జరిగింది. "జ్ఞానేష్.. ఇక చాలు, రాజీనామా చేయ్ బ్రో" అంటూ రాహుల్ గాంధీ బారికేడ్లపైకి ఎక్కి ప్లకార్డులు ప్రదర్శించారు. నిబంధనలు ఉల్లంఘించారంటూ ఢిల్లీ పోలీసులు రాహుల్, ప్రియాంకలపై రెండు కొత్త ఎఫ్‌ఐఆర్‌లు నమోదు చేశారు. మరోవైపు జంతర్ మంతర్ వద్ద ధర్నాకు అనుమతి నిరాకరించడాన్ని సవాలు చేస్తూ యూత్ కాంగ్రెస్ ఢిల్లీ హైకోర్టును ఆశ్రయించగా, శుక్రవారం దీనిపై విచారణ జరగనుంది. అంతేకాకుండా వివాదాస్పద 'సర్' ప్రక్రియను ఆపాలంటూ రాష్ట్రపతి ద్రౌపది ముర్ము అపాయింట్‌మెంట్‌ను విపక్ష ప్రతినిధులు కోరారు. రాష్ట్ర ముఖ్యమంత్రి ఎ.రేవంత్ రెడ్డి స్వయంగా ఢిల్లీకి చేరుకుని ఈ పోరాటానికి మద్దతు పలికారు. ఈ నిరసనలకు సంబంధించిన పరిణామాలపై ఢిల్లీలోనే కాంగ్రెస్ హైకమాండ్‌తో సమీక్ష సమావేశంలో రేవంత్ పాల్గొన్నారు.

చలో లోక్ భవన్'తో దద్దరిల్లిన నగరం.. రోడ్లపై మంత్రుల అరెస్టులు

హైదరాబాద్‌లో టీపీసీసీ ఆధ్వర్యంలో చేపట్టిన 'చలో లోక్ భవన్' ముట్టడి కార్యక్రమం రణరంగాన్ని తలపించింది. నెక్లెస్ రోడ్డులోని ఇందిరా గాంధీ విగ్రహం నుంచి వేలాది మంది కార్యకర్తలతో ప్రారంభమైన ఈ ర్యాలీని రాజ్ భవన్ పరిసరాల్లో పోలీసులు భారీ బారికేడ్లతో అడ్డుకున్నారు. కొందరు నేతలు బారికేడ్లను దూకేందుకు ప్రయత్నించడంతో తీవ్ర తోపులాట చోటుచేసుకుంది. టీపీసీసీ అధ్యక్షుడు బి.మహేష్ కుమార్ గౌడ్, మంత్రులు పొంగులేటి శ్రీనివాస రెడ్డి, పొన్నం ప్రభాకర్, కోమటిరెడ్డి వెంకట్ రెడ్డి, జూపల్లి కృష్ణారావు, మహమ్మద్ అజహరుద్దీన్, సీపీఐ ఎమ్మెల్యే కూనంనేని సాంబశివరావు, ప్రొఫెసర్ కోదండరామ్‌లను పోలీసులు బలవంతంగా అదుపులోకి తీసుకుని పంజాగుట్ట పీఎస్‌కు తరలించారు. ఈ నిరసనల కారణంగా ఖైరతాబాద్, సెక్రటేరియట్, పంజాగుట్ట మార్గాల్లో కిలోమీటర్ల మేర ట్రాఫిక్ స్తంభించిపోయింది. గోషామహల్ వంటి నియోజకవర్గాల్లో ఫారం-7 దుర్వినియోగం చేస్తూ పేదల ఓట్లను గల్లంతు చేస్తున్నారని కాంగ్రెస్ మంత్రులు మండిపడ్డారు.

Also Read | ఈసీని అస్థిర‌ప‌రిస్తే ప్ర‌జాస్వామ్యానికే ముప్పు.. నిర‌స‌న‌ల వేళ ఈసీకి మ‌ద్దతుగా రిటైర్డ్ జ‌డ్జీలు

ఫ్రీడమ్ పార్క్‌లో పీపుల్స్ ట్రిబ్యునల్.. చెప్పుల ప్రదర్శనతో కదం తొక్కిన ప్రజలు

కర్ణాటక రాజధాని బెంగళూరులోని చారిత్రక ఫ్రీడమ్ పార్క్ వినూత్న నిరసనలకు వేదికైంది. కాక్రోచ్ జనతా పార్టీ ఆధ్వర్యంలో వ్యవస్థాపకుడు అభిజీత్ దిప్కే నేతృత్వంలో నిర్వహించిన 'పీపుల్స్ ట్రిబ్యునల్' (ప్రజా కోర్టు)కు వేలాది మంది తరలివచ్చారు. ఓట్లు కోల్పోయిన పౌరులు తమ గుర్తింపు కార్డులు, ధ్రువపత్రాలతో వచ్చి వేదికపై సాక్ష్యాలు వినిపించారు. ఈ కార్యక్రమానికి ప్రముఖ యూట్యూబర్ ధ్రువ్ రాఠీ, విలక్షణ నటుడు ప్రకాష్ రాజ్ హాజరై సంఘీభావం తెలిపారు. ఎన్నికల సంఘంలో పారదర్శకత పూర్తిగా లోపించిందని, ఓటు హక్కు పరిరక్షణ కోసం దేశమంతా ఏకం కావాలని వారు పిలుపునిచ్చారు. ముఖ్యంగా మహిళల ఓట్లను భారీగా తొలగించడాన్ని నిరసిస్తూ మహిళలకు మద్దతుగా ప్రదర్శించిన 'చెప్పుల నిరసన' తీవ్ర చర్చనీయాంశమైంది. మరోవైపు కేపీసీసీ సైతం పార్టీ కార్యాలయం ఎదుట నల్లజెండాలతో నిరసన తెలిపింది. సీఈసీపై క్రిమినల్ కేసులు నమోదు చేయాలని, 2023 ఈసీ నియామక చట్టాన్ని రద్దు చేయాలని బెంగళూరు వేదికగా ఉద్యమకారులు డిమాండ్ చేశారు.

కేంద్ర ఎన్నికల సంఘానికి బహిరంగ లేఖ

మరోవైపు ఓటర్ల జాబితా సవరణపై విపక్షాలు చేస్తున్న ఆరోపణలను తోసిపుచ్చుతూ దాదాపు 42 మంది మాజీ న్యాయమూర్తులు కేంద్ర ఎన్నికల సంఘానికి బహిరంగ లేఖ ద్వారా పూర్తి మద్దతు ప్రకటించారు. ఆధారాలు లేని ఆరోపణలతో రాజ్యాంగబద్ధ సంస్థల ప్రతిష్టను దిగజార్చడం, ఈవీఎంలను లక్ష్యంగా చేసుకోవడం ప్రజాస్వామ్యానికే పెను ముప్పు అని వారు తీవ్రంగా హెచ్చరించారు. వీధుల్లో నిరసనలు తెలుపుతూ వ్యవస్థలను అస్థిరపరచడానికి బదులుగా, ఏవైనా అభ్యంతరాలుంటే సరైన సాక్ష్యాధారాలతో ఈసీని లేదా కోర్టులను ఆశ్రయించాలని స్పష్టం చేశారు.

ఇదీ చదవండి | వ‌రుస‌గా మూడో రోజు.. రాజ్‌ఘాట్‌వైపు క‌దిలిన విప‌క్ష ఎంపీలు.. ఢిల్లీలో టెన్ష‌న్ వాతావ‌ర‌ణం

కారు వదిలేసి కాలినడకన.. ప్రధాని మోదీకి తీవ్ర హెచ్చరికలు

రాష్ట్ర ముఖ్యమంత్రి ఎ.రేవంత్ రెడ్డి స్వయంగా ఢిల్లీ వేదికగా నేడు కేంద్రంపై సమరశంఖం పూరించారు. పోలీసుల ఆంక్షలు, నిర్బంధాలకు నిరసనగా ఈరోజు జరిగిన 'ఇండియా' కూటమి కీలక వ్యూహాత్మక సమావేశానికి ఆయన తన కారును వదిలేసి కాలినడకన వెళ్లడం సంచలనం సృష్టించింది. అనంతరం ఢిల్లీలో మీడియా సమావేశం నిర్వహించిన రేవంత్ రెడ్డి కేంద్ర ప్రభుత్వంపై తీవ్రస్థాయిలో విరుచుకుపడ్డారు. "ఈడీ, సీబీఐల మాదిరిగానే కేంద్రంలోని మోదీ సర్కార్ ఎన్నికల సంఘాన్ని రాజకీయ కక్షసాధింపు అస్త్రంగా వాడుకుంటోంది. సీఈసీ జ్ఞానేష్ కుమార్ చేత ప్రధాని నరేంద్ర మోదీ వెంటనే రాజీనామా చేయించాలి. కేంద్రం ఎంత నిరంకుశంగా వ్యవహరించినా మా పోరాటం ఆగదు. వివాదాస్పద 'సర్' ప్రక్రియను రద్దు చేసేవరకు వీధుల నుంచి పార్లమెంట్ వరకు ఈ పోరాటం కొనసాగుతుంది" అని రేవంత్ హెచ్చరించారు. ఈ పోరాటానికి ప్రధాని మోదీ కూడా బాధ్యత వహించాల్సి ఉంటుందని తేల్చిచెప్పారు.

Also Read | సీఈసీ, ఈసీల నియామ‌కాల‌పై సుప్రీంకోర్టులో స‌వాల్‌