Bill Gates | అక్ర‌మ సంబంధాల‌ను అడ్డుపెట్టుకుని నాపై ఒత్తిడి తెచ్చే ప్ర‌య‌త్నం చేశాడు.. ఎప్‌స్టీన్‌పై బిల్‌గేట్స్‌ సంచలన ఆరోపణలు

Bill Gates | అమెరికా ఫైనాన్షియ‌ర్ జెఫ్రీ ఎప్‌స్టీన్‌ (Jeffrey Epstein)తో సంబంధాల‌పై మైక్రోసాఫ్ట్ సహ వ్యవస్థాపకుడు బిల్ గేట్స్ (Bill Gates) కీల‌క విష‌యాలు వెల్ల‌డించారు. త‌న వివాహేత‌ర సంబంధాల‌ను అడ్డుపెట్టుకుని త‌న‌పై ఒత్తిడి తెచ్చేందుకు జెఫ్రీ ప్ర‌య‌త్నించిన‌ట్లు పేర్కొన్నారు. ఈ మేర‌కు అమెరికా ప్ర‌తినిధుల స‌భ క‌మిటీకి (congressional committee ) ఈ విష‌యాన్ని తెలియ‌జేశారు.

ప్రపంచ వ్యాప్తంగా సంచలనం రేపిన‌ లైంగిక వేధింపుల వ్య‌వ‌హారం ఎప్‌స్టీన్ ఫైల్స్‌పై ప్రతినిధుల సభ (హౌస్ ఆఫ్ రిప్రజెంటేటివ్స్)కి చెందిన 'ఓవర్‌సైట్ అండ్ గవర్నమెంట్ రిఫార్మ్ కమిటీ' దర్యాప్తు చేస్తోంది. ద‌ర్యాప్తులో భాగంగా బిల్‌గేట్స్ క‌మిటీ ముందు విచార‌ణ‌కు హాజ‌ర‌య్యారు. ఎప్‌స్టీన్‌తో త‌న‌కు ఉన్న ప‌రిచ‌యాల‌పై క‌మిటీ అడిగిన ప్ర‌శ్న‌ల‌కు స‌మాధానాలిచ్చారు.

ఎప్‌స్టీన్‌తో తాను జరిపిన సమావేశాలు కేవలం సేవా కార్యక్రమాల కోసమేనని బిల్ గేట్స్ స్ప‌ష్టం చేశారు. ప్రపంచానికి ప్రయోజనం కలిగించే తన ఆరోగ్య పథకాలకు బిలియన్ల కొద్దీ డాలర్ల విరాళాలు సమకూర్చడంలో సహాయం చేస్తానని అతను తనకు హామీ ఇచ్చాడని గేట్స్ పేర్కొన్నారు. ఆ స‌మ‌యంలో అత‌డి నేరాల గురించి త‌న‌కు పూర్తిగా తెలియ‌ద‌ని చెప్పుకొచ్చారు. నేరాల‌ గురించి తెలిసిన త‌ర్వాత అత‌డితో సంబంధాల‌ను తెంచుకున్న‌ట్లు బిల్‌గేట్స్ చెప్పారు. కానీ, ఎప్‌స్టీన్ మాత్రం తన అక్రమ సంబంధాలపై (extramarital affair) సమాచారం సేకరించి, తనతో పరిచయం కొనసాగించేలా ఒత్తిడి తీసుకురావాలని యత్నించాడని బిల్ గేట్స్ సంచ‌ల‌న ఆరోప‌ణ‌లు చేశారు.

"నా వ్యక్తిగత జీవితానికి సంబంధించిన కొన్ని సున్నితమైన విషయాలు ఎప్‌స్టీన్‌కు తెలిశాయి. వాటిని ఆధారంగా చేసుకుని నాపై ప్రభావం చూపాలని ప్రయత్నించాడు. ఆ వివాహేతర సంబంధాలకు, ఎప్‌స్టీన్‌తో నాకున్న పరిచయాలకు ఎలాంటి సంబంధం లేదు. కానీ అవి నా కుటుంబానికి ఎంతో బాధను కలిగించాయి" అని బిల్‌గేట్స్ చెప్పుకొచ్చారు. ఎప్‌స్టీన్‌తో పరిచయం జీవితంలో తాను చేసిన అతి పెద్ద తప్పని గేట్స్‌ మరోసారి స్పష్టం చేశారు. అతనితో సమావేశాలు తన ప్రతిష్టకే కాకుండా.. గేట్స్ ఫౌండేషన్ నిర్వహిస్తున్న సేవా కార్యక్రమాలపై కూడా ప్రతికూల ప్రభావం చూపాయని గేట్స్ ఆవేద‌న వ్య‌క్తం చేశారు.

Also Read..

స్పేస్‌ఎక్స్ ఐపీఓ సంచలనం.. కోటీశ్వరులుగా మార‌నున్న వేలాది ఉద్యోగులు..

టీఎంసీలో కొన‌సాగుతున్న రాజీనామాల ప‌ర్వం.. మ‌రో ఎంపీ రిజైన్‌

5 వేల పోస్టుల‌కు కాదు.. 19 వేల పోస్టుల‌కు ఒకేసారి నోటిఫికేష‌న్ విడుద‌ల చేయాలి.. హ‌రీశ్‌రావు డిమాండ్