AssetMark Hyderabad GCC | సీబీఐటీ విద్యార్థులకు గోల్డెన్ చాన్స్.. అమెరికా కంపెనీలో జాబ్

• హైదరాబాద్‌లో అమెరికా సంస్థ అసెట్‌మార్క్ 'జీసీసీ'
• 500 మందికి ఉద్యోగావకాశాలు
• సీబీఐటీ విద్యార్థులకు బంపర్ ఆఫర్

AssetMark Hyderabad GCC | త్రినేత్ర న్యూస్ : రాష్ట్ర రాజధాని హైదరాబాద్ గ్లోబల్ కేపబిలిటీ సెంటర్లకు (GCC) కేరాఫ్ అడ్రస్‌గా మారుతోంది. తాజాగా అమెరికాకు చెందిన ప్రముఖ వెల్త్‌టెక్ ప్లాట్‌ఫామ్ ‘అసెట్‌మార్క్’ (AssetMark) నగరంలో తన సరికొత్త గ్లోబల్ కేపబిలిటీ సెంటర్‌ను ఏర్పాటు చేసింది. సుమారు 500 మంది సిబ్బంది పనిచేసేందుకు వీలుగా ఈ అత్యాధునిక కేంద్రాన్ని తీర్చిదిద్దారు. గత పదేళ్లుగా భారత్‌లో ఔట్‌సోర్సింగ్ పద్ధతిలో సేవలందించిన ఈ సంస్థ.. ఇప్పుడు స్వయంగా హైదరాబాద్‌లో అడుగుపెట్టి సొంత కార్యకలాపాలను విస్తరిస్తోంది.

సీబీఐటీ విద్యార్థులకు గోల్డెన్ ఛాన్స్

స్థానిక ప్రతిభను ప్రోత్సహించడంలో భాగంగా అసెట్‌మార్క్ తమ మొట్టమొదటి క్యాంపస్ హైరింగ్ డ్రైవ్‌ను నగరంలోని ప్రముఖ విద్యాసంస్థ చైతన్య భారతి ఇన్‌స్టిట్యూట్ ఆఫ్ టెక్నాలజీ (CBIT) తో ప్రారంభించింది.

తొలి దశలో సీబీఐటీ నుంచి 10 నుంచి 15 మంది ప్రతిభావంతులైన గ్రాడ్యుయేట్లను ఎంపిక చేసి ఉద్యోగావకాశాలు కల్పించనున్నట్లు సంస్థ ప్రతినిధులు వెల్లడించారు. భవిష్యత్తులో ఈ క్యాంపస్ రిక్రూట్‌మెంట్లను నగరంలోని మరిన్ని ప్రముఖ ఇంజినీరింగ్ కాలేజీలకు విస్తరిస్తామని స్పష్టం చేశారు.

అన్ని విభాగాల్లో ఉద్యోగాల భర్తీ

హైదరాబాద్ కేంద్రం నుంచి గ్లోబల్ టెక్నాలజీ, బిజినెస్ ఆపరేషన్స్, సాఫ్ట్‌వేర్ ఇంజినీరింగ్, ప్రాడక్ట్ మేనేజ్‌మెంట్ వంటి కీలక విభాగాల కార్యకలాపాలు సాగనున్నాయి. ప్రస్తుతం సీనియర్ లీడర్‌షిప్ స్థానాల నుంచి అనుభవజ్ఞులైన టెక్ నిపుణులు, క్యాంపస్ గ్రాడ్యుయేట్ల వరకు అన్ని స్థాయిల్లో రిక్రూట్‌మెంట్ ప్రక్రియ జోరుగా సాగుతోంది.

ఈ సెంటర్ ఇండియా జీసీసీ హెడ్, వైస్ ప్రెసిడెంట్ జోషి ఆలపర్తి నేతృత్వంలో పనిచేయనుంది. ఆర్థిక సలహాదారుల పనితీరును, క్లయింట్ సర్వీసింగ్‌ను మెరుగుపరచడానికి అవసరమైన ఆర్టిఫిషియల్ ఇంటెలిజెన్స్ (AI), టెక్నాలజీ పనులను హైదరాబాద్ నుంచే పర్యవేక్షించనున్నారు.

హైదరాబాద్ అందుకే బెస్ట్ ఛాయిస్: సంస్థ సీఈవో

"హైదరాబాద్‌లో టెక్నాలజీ, ఫైనాన్షియల్ సర్వీసెస్ రంగానికి సంబంధించిన బలమైన ఎకోసిస్టమ్ అందుబాటులో ఉంది. మా సంస్థ గ్లోబల్ సామర్థ్యాన్ని మరింత పెంచుకోవడానికి, తదుపరి వృద్ధి దశకు హైదరాబాద్ అత్యంత అనువైన ప్రాంతం" అని అసెట్‌మార్క్ ఛైర్మన్, గ్రూప్ సీఈవో లూ మయూరి పేర్కొన్నారు. ప్రపంచవ్యాప్తంగా ఉన్న వేర్వేరు బృందాలను అనుసంధానించడం ద్వారా ఆవిష్కరణలను మరింత వేగవంతం చేస్తామని ఆయన తెలిపారు.

అమెరికాలో 10,000 మందికి పైగా ఫైనాన్షియల్ అడ్వైజర్లకు సేవలందిస్తున్న అసెట్‌మార్క్.. ఫైనాన్షియల్ ప్లానింగ్ టూల్స్, ఇన్వెస్ట్‌మెంట్ సొల్యూషన్స్ వంటి ఆర్థిక సేవలను ప్రపంచ స్థాయి క్లయింట్లకు అందిస్తోంది. తాజా విస్తరణతో నగరంలోని ఐటీ, ఫిన్‌టెక్ ఉద్యోగార్థులకు భారీ అవకాశాలు లభించనున్నాయి.