Maharashtra Tapi River Incident | కాళ్లకు ఇనుప గొలుసులు కట్టి తాళం.. నదిలో నవ దంపతుల శవాలు: అసలేం జరిగింది?

• మహారాష్ట్రలోని ధులే జిల్లా సవల్దే సమీపంలో తాపీ నది అడుగున నవదంపతుల మృతదేహాలు లభ్యం
• జలగావ్ జిల్లా అమళ్‌నేర్‌కు చెందిన శ్యామ్ హరి పాటిల్, సప్నా పాటిల్
• ఇద్దరి కాళ్లను ఒకే ఇనుప గొలుసుతో కట్టి, తాళం వేసి ఉన్నట్లు గుర్తించిన పోలీసులు
• ఇది ముందస్తు ప్లాన్‌తో చేసిన హత్యా లేక బలవన్మరణమా అనే కోణంలో పోలీసుల విచారణ ముమ్మరం

Maharashtra Tapi River Incident | త్రినేత్ర న్యూస్ : మహారాష్ట్రలో తీవ్ర సంచలనం రేపిన ఒక విషాద ఘటన వెలుగులోకి వచ్చింది. పెళ్లయి కొద్ది నెలలు కూడా గడవకముందే ఓ నవదంపతులు విగతజీవులుగా తేలారు. ధులే జిల్లాలోని తాపీ నది అడుగున వారి మృతదేహాలు బయటపడటం స్థానికంగా కలకలం సృష్టించింది.

నది అడుగున మిస్టరీ మృతదేహాలు

ధులే జిల్లా పరిధిలోని సవల్దే వద్ద తాపీ నదిలో రెండు డెడ్‌బాడీలు ఉన్నట్లు స్థానికులు గుర్తించి పోలీసులకు సమాచారం అందించారు. ఘటనా స్థలానికి చేరుకున్న పోలీసులు మృతదేహాలను వెలికితీయగా ఒళ్లు గగుర్పొడిచే దృశ్యం కనిపించింది. దంపతులిద్దరి కాళ్లను ఒకే ఐరన్ చైన్ (ఇనుప గొలుసు)తో బంధించి, దానికి ప్యాడ్‌లాక్ తాళం వేసి ఉంది.

ఇదీ చదవండి | పెట్రోల్ బంక్ సీల్ చేసేందుకు వెళ్తే.. కత్తితో పొడిచి చంపేశారు

కొద్ది నెలల క్రితమే లవ్ మ్యారేజ్

మృతులను జలగావ్ జిల్లా అమళ్‌నేర్ తాలూకాకు చెందిన శ్యామ్ హరి పాటిల్ (28), సప్నా పాటిల్ (20)గా పోలీసులు గుర్తించారు. వీరిద్దరూ పరస్పరం ప్రేమించుకుని కొద్ది నెలల క్రితమే వివాహం చేసుకున్నట్లు విచారణలో తేలింది. ఇంతలోనే వారు నదిలో శవాలై తేలడం ఇరు కుటుంబాల్లో తీవ్ర విషాదాన్ని నింపింది.

హత్యనా? ఆత్మహత్యా? పోలీసుల దర్యాప్తు ముమ్మరం

కాళ్లకు ఇనుప గొలుసులు కట్టి తాళం వేసి ఉండటంతో.. ఇది ఆత్మహత్యా లేక ఎవరైనా పథకం ప్రకారం హత్య చేసి నదిలో పడేశారా అనే విషయంపై స్పష్టత రావాల్సి ఉంది.

"మృతదేహాలు రివర్‌బెడ్‌పై లభ్యమయ్యాయి. కాళ్లను ఇనుప గొలుసుతో తాళం వేసి బంధించారు. ప్రస్తుతం అన్ని కోణాల్లోనూ దర్యాప్తు చేస్తున్నాం. పోస్ట్‌మార్టం రిపోర్ట్ వచ్చిన తర్వాత మరణానికి గల ఖచ్చితమైన కారణాలు తెలుస్తాయి" అని పోలీస్ అధికారి వెల్లడించారు. ఈ మిస్టరీ డెత్‌పై పోలీసులు కేసు నమోదు చేసి అన్ని ఆధారాలను పరిశీలిస్తున్నారు.

Also Read | షాకింగ్‌.. 43వ అంతస్తు నుంచి దూకిన వ్య‌క్తి.. రెండు ముక్క‌లైన బాడీ