Revanth Reddy Delhi Police | రాహుల్ గాంధీ అరెస్ట్.. సంఘీభావం తెలిపేందుకు వెళ్లిన సీఎం రేవంత్ రెడ్డిని అడ్డుకున్న పోలీసులు

• ఢిల్లీలో రణరంగం

Revanth Reddy Delhi Police | త్రినేత్ర న్యూస్ : దేశ రాజధాని న్యూఢిల్లీలో విపక్ష 'ఇండియా' (INDIA) కూటమి చేపట్టిన 'ఓటు బచావో.. దేశ్ బచావో' మహా ఆందోళన రెండో రోజు తీవ్ర ఉద్రిక్తతలకు దారితీసింది. ఓటర్ల జాబితా సవరణల్లో అవకతవకలు జరిగాయని ఆరోపిస్తూ, చీఫ్ ఎలక్షన్ కమిషనర్ (CEC) జ్ఞానేష్ కుమార్ రాజీనామా చేయాలంటూ వందలాది మంది ప్రతిపక్ష ఎంపీలు ఢిల్లీ వీధుల్లోకి వచ్చారు. ఈ క్రమంలో లోక్‌సభ ప్రతిపక్ష నేత రాహుల్ గాంధీని ఢిల్లీ పోలీసులు బలవంతంగా అదుపులోకి తీసుకుని బారాఖంబా పోలీస్ స్టేషన్‌కు తరలించారు.

మరోవైపు, అరెస్టయిన రాహుల్ గాంధీకి నేరుగా కలిసి సంఘీభావం తెలిపేందుకు బయలుదేరిన తెలంగాణ ముఖ్యమంత్రి ఎ. రేవంత్ రెడ్డిని ఢిల్లీ పోలీసులు అడ్డుకోవడంతో రాజధానిలో రాజకీయ వేడి ఒక్కసారిగా రాజుకుంది.

బారాఖంబా పోలీస్ స్టేషన్‌కు రాహుల్ గాంధీ తరలింపు

జన్‌పథ్, జంతర్ మంతర్ పరిసరాల్లో బారికేడ్లు ఛేదించుకుని నిరసన తెలిపేందుకు యత్నించిన రాహుల్ గాంధీ, ప్రియాంక గాంధీ వాద్రా సహా పలువురు ముఖ్య నేతలను పోలీసులు చుట్టుముట్టారు. నిరసనకారులు పోలీసు బస్సులను అడ్డుకోవడానికి, టైర్లను పంక్చర్ చేయడానికి ప్రయత్నించినప్పటికీ, రాహుల్ గాంధీని మరో పోలీస్ వాహనంలోకి మార్చి బారాఖంబా రోడ్ పోలీస్ స్టేషన్‌కు తరలించారు. తనపై ఎన్ని కేసులు పెట్టినా, ఎన్నిసార్లు నిర్బంధించినా వెనక్కి తగ్గేది లేదని, ప్రజాస్వామ్య పరిరక్షణ కోసం తమ పోరాటం కొనసాగుతుందని రాహుల్ స్పష్టం చేశారు.

సీఎం రేవంత్ రెడ్డిని అడ్డుకున్న ఢిల్లీ పోలీసులు

పోలీస్ స్టేషన్‌లో ఉన్న రాహుల్ గాంధీకి సంఘీభావం ప్రకటించేందుకు తెలంగాణ ముఖ్యమంత్రి రేవంత్ రెడ్డి హుటాహుటిన బయలుదేరారు. అయితే ఆయన కాన్వాయ్‌ను, నేతలను పోలీసులు మార్గమధ్యంలోనే అడ్డుకున్నారు. ఒక రాష్ట్ర ముఖ్యమంత్రిని విపక్ష నేతను కలిసేందుకు కూడా అనుమతించకపోవడంపై కాంగ్రెస్ వర్గాలు తీవ్ర ఆగ్రహం వ్యక్తం చేశాయి.

ఈ చర్యలను సీఎం రేవంత్ రెడ్డి తీవ్రంగా తప్పుబట్టారు. దేశంలో రాజ్యాంగాన్ని, ప్రజాస్వామ్యాన్ని కేంద్ర ప్రభుత్వం తుంగలో తొక్కుతోందని మండిపడ్డారు. ప్రజల తరఫున, ఓటర్ల హక్కుల కోసం శాంతియుతంగా నిరసన తెలిపే ప్రాథమిక హక్కును కూడా కేంద్రం కాలరాస్తోందని ఆయన నిప్పులు చెరిగారు.

రెండో రోజూ దద్దరిల్లిన ఢిల్లీ.. ఎక్కడికక్కడ బారికేడ్లు

గత రెండు రోజులుగా ఎలక్షన్ కమిషన్ ప్రధాన కార్యాలయం, ఆకాశవాణి భవన్, జన్‌పథ్ పరిసర ప్రాంతాల్లో కేంద్ర బలగాలు, ఢిల్లీ పోలీసులు భారీగా మోహరించారు. నిన్న ఆకాశవాణి భవన్ ఆవరణలో నిరసన చేపట్టినందుకు రాహుల్, ప్రియాంకలపై కేసులు నమోదు చేసిన పోలీసులు, నేడు జంతర్ మంతర్ వైపు కదలనీయకుండా ఎక్కడికక్కడ అడ్డంకులు సృష్టించారు. అయినా వెనక్కి తగ్గకుండా విపక్ష నేతలు నిరసన కొనసాగించడంతో ఢిల్లీ వీధులన్నీ పోలీసు బారికేడ్లు, నిరసనకారులతో అట్టుడికాయి.

Also Read | మహిళా పోలీస్‌ను అసభ్యంగా తాకిన రాహుల్ గాంధీ? : వీడియో వైరల్