New Wolf Snake | స్టీవ్ ఇర్విన్ పేరుతో కొత్త తోడేలు పాము: గ్రేట్ నికోబార్ ద్వీపంలో అరుదైన ఆవిష్కరణ

New Wolf Snake Named After Steve Irwin Discovered in Great Nicobar Island

(త్రినేత్ర భారత్​ డెస్క్​)

పాండిచ్చేరి/న్యూఢిల్లీ, డిసెంబర్ 19:
భారత్‌కు చెందిన గ్రేట్ నికోబార్ ద్వీపంలోని దట్టమైన ఎవర్‌గ్రీన్ అడవుల్లో శాస్త్రవేత్తలు కొత్త రకం తోడేలు పామును గుర్తించారు. విషపూరితం కాని ఈ పాము జాతికి ప్రముఖ ఆస్ట్రేలియన్ వన్యప్రాణి సంరక్షకుడు, టీవీ వ్యాఖ్యాత స్టీవ్ ఇర్విన్(Steve Irwin) పేరు మీదుగా ‘లైకోడాన్ ఇర్విని’ (Lycodon irwini) అని నామకరణం చేశారు. ఈ ఆవిష్కరణ భారత్‌లోని ద్వీప ప్రాంతాల జీవ వైవిధ్యంపై మరోసారి ప్రపంచ దృష్టిని ఆకర్షిస్తోంది.

ఈ కొత్త జాతిని పాండిచ్చేరి యూనివర్సిటీకి చెందిన ఆర్.ఎస్. నవీన్, ఎస్.ఆర్. చంద్ర‌మౌళి నేతృత్వంలోని బృందం గుర్తించింది. వీరితో పాటు మ్యాక్స్ ప్లాంక్ ఇన్‌స్టిట్యూట్ ఫర్ బయాలజీకి చెందిన జీషన్ ఎ. మీర్జా, పుణేకు చెందిన గిరీష్ చౌరే కూడా ఈ పరిశోధనలో పాల్గొన్నారు. ఈ ఆవిష్కరణకు సంబంధించిన శాస్త్రీయ వివరాలు అంతర్జాతీయ జర్నల్ ‘ఎవల్యూషనరీ సిస్టమాటిక్స్(Evolutionary systematics)’లో ప్రచురితమయ్యాయి.

గ్రేట్ నికోబార్‌కు మాత్రమే పరిమితమైన ఈ కొత్త పాము జాతి

దాదాపు 1.2 మీటర్ల పొడవు కలిగిన లైకోడాన్ ఇర్విని సన్నని, పొడవైన శరీరంతో ప్రత్యేకంగా కనిపిస్తుంది. పైభాగం నిగనిగలాడే నలుపు లేదా ముదురు బ్రౌన్ రంగులో ఉండగా, కింద భాగం లైట్ బ్రౌన్ ఛాయను కలిగి ఉంటుంది. మృదువైన పొలుసులు, పొడవైన తోక దీని శారీరక లక్షణాలు. రాత్రివేళ చురుకుగా ఉండే ఈ పాము బల్లులు, కప్పలు, చిన్న పాములు, చిన్న క్షీరదాలను ఆహారంగా తీసుకుంటుంది.

ఇప్పటివరకు ఈ జాతికి సంబంధించిన నాలుగు రికార్డులు మాత్రమే లభించాయి. వీటిలో మూడు నమూనాలు ఈ తాజా అధ్యయనంలో సేకరించబడినవే. ఇవన్నీ గ్రేట్ నికోబార్ ద్వీపానికే చెందినవిగా గుర్తించారు. ఇతర నికోబార్ దీవుల్లో ప్రత్యేకంగా శోధించినప్పటికీ, ఎక్కడా ఈ పాము కనిపించలేదు. దీంతో ఇది పూర్తిగా స్థానిక జాతిగా ఉండే అవకాశముందని శాస్త్రవేత్తలు అంచనా వేస్తున్నారు.

తేమ, ఆర్ద్రత అధికంగా ఉండే అడవుల్లో, ఆకులు, పడిపోయిన చెట్ల కింద దాక్కుని జీవించడం, అత్యంత రహస్యంగా కదలడం వల్ల ఈ పాము చాలా కాలం పాటు శాస్త్రవేత్తల దృష్టికి రాలేదని పరిశోధకులు చెబుతున్నారు. 2010లో మొదటిసారి ఒక నమూనా నమోదయినప్పటికీ, ఇటీవల సేకరించిన కొత్త నమూనాలతో పోల్చి అణువిశ్లేషణ చేయడంతో ఇది ప్రత్యేక జాతిగా నిర్ధారించగలిగారు.

జీవ వైవిధ్యం–సంరక్షణపై ఈ ఆవిష్కరణ ప్రభావం

ఈ పాముకు స్టీవ్ ఇర్విన్ పేరు పెట్టడం వెనుక ఒక ప్రత్యేక భావన ఉందని పరిశోధకులు తెలిపారు. వన్యప్రాణుల పట్ల ప్రపంచవ్యాప్తంగా అవగాహన పెంచిన వ్యక్తిగా ఇర్విన్‌ను గుర్తించి, ఆయన ఊతపదంగా పలికే “క్రైకీ!(Crikey)” అనే మాటకు గుర్తుగా ఈ పామును ‘క్రైకీ వోల్ఫ్ స్నేక్’గా కూడా పిలుస్తున్నారు. ఈ పేరు కొత్త జీవజాతి ఆవిష్కరణలోని ఆనందాన్ని, ప్రకృతి పట్ల ఉత్సాహాన్ని ప్రతిబింబిస్తుందని వారు చెప్పారు.

అరుదుగా మాత్రమే కనిపించడం, పరిమిత విస్తృతి, గ్రేట్ నికోబార్ ద్వీపంలో పెరుగుతున్న మానవ చర్యలు వంటి కారణాల వల్ల ఈ జాతిని ‘అంతరిస్తున్న జాతి’ గా పరిగణించి, ఐయూసీఎన్ రెడ్ లిస్ట్(IUCN Red list) చేర్చాలని శాస్త్రవేత్తలు సూచించారు. ద్వీప ప్రాంతాల్లో జీవించే జాతులు సాధారణంగా చిన్న జనాభా, పరిమిత పరిధి కలిగి ఉండటంతో, పర్యావరణ మార్పులకు త్వరగా ప్రభావితమయ్యే అవకాశం ఉంటుందని వారు హెచ్చరిస్తున్నారు.

నికోబార్ ద్వీపాలు దట్టమైన అడవులు, మాంగ్రోవ్ ప్రాంతాలు, తక్కువ మానవ జోక్యం కలిగిన ప్రత్యేక పర్యావరణంతో ప్రసిద్ధి. భౌగోళికంగా వేరుపడి ఉండటం వల్ల ఇక్కడి జీవజాతులు ప్రధాన భూభాగంలోని జాతులకంటే భిన్నంగా పరిణామం చెందాయని శాస్త్రవేత్తలు చెబుతున్నారు. లైకోడాన్ ఇర్విని ఆవిష్కరణ ఈ ప్రాంతంలో ఇంకా గుర్తించని అనేక జీవజాతులు ఉండే అవకాశాన్ని సూచిస్తోందని వారు అభిప్రాయపడుతున్నారు.

మొత్తానికి, స్టీవ్ ఇర్విన్ పేరుతో గుర్తింపు పొందిన ఈ కొత్త వోల్ఫ్ స్నేక్ ఆవిష్కరణ భారత్ జీవ వైవిధ్య సంపదను మరోసారి చాటుతోంది. ద్వీపాల పర్యావరణ వ్యవస్థ ఎంత సున్నితమైనదో గుర్తు చేస్తూ, మరింత పరిశోధన, సంరక్షణ చర్యల అవసరాన్ని ఈ ఆవిష్కరణ బలంగా సూచిస్తోంది.

స్టీవ్​ ఇర్విన్​(Steve Irwin) గురించి..

స్టీవ్ ఇర్విన్ ఆస్ట్రేలియాకు చెందిన ప్రముఖ వన్యప్రాణి సంరక్షకుడు, ప్రకృతి విద్యావేత్త. 1990లలో ప్రసారమైన ‘ది క్రోకడైల్ హంటర్’ టీవీ షోతో ప్రపంచవ్యాప్తంగా గుర్తింపు పొందారు. డిస్కవరీ, ఎన్​జీసీ చానెళ్లు చూసే ప్రేక్షకులకు ఇర్విన్​ సుపరిచితమే. సరీసృపాలు, ముఖ్యంగా మొసళ్ళపై అవగాహన పెంచుతూ, ప్రమాదకరంగా భావించే జంతువుల పట్ల కూడా భయం కాకుండా గౌరవం కలిగించాలని ఆయన తన కార్యక్రమాల ద్వారా సందేశం ఇచ్చారు. 2006లో డాక్యుమెంటరీ షూటింగ్ సమయంలో షార్క్​ జాతికి చెందిన స్టింగ్‌రే దాడిలో ఆయన మరణించినా, వన్యప్రాణి సంరక్షణకు ఆయన చేసిన సేవలు ఇప్పటికీ ప్రపంచవ్యాప్తంగా ప్రేరణగా నిలుస్తున్నాయి. అదే సేవలకు గుర్తింపుగా ఈ కొత్త వోల్ఫ్ స్నేక్‌కు ఆయన పేరు పెట్టినట్లు శాస్త్రవేత్తలు తెలిపారు.