Talasani | స్ప‌ష్ట‌మైన విధానం లేకుండానే డీలిమిటేష‌న్‌: త‌ల‌సాని

Talasani | ఒక స్పష్టమైన విధానం లేకుండానే డీలిమిటేషన్ (Delimitation) పేరుతో జీహెచ్ఎంసీ (GHMC) డివిజన్లను ఇష్టమొచ్చినట్లుగా ఏర్పాటు చేశారని మాజీమంత్రి, సనత్ నగర్ ఎమ్మెల్యే తలసాని (Talasani) శ్రీనివాస్యాదవ్ ఆగ్రహం వ్యక్తం చేశారు. డివిజన్ల ఏర్పాటులో జరిగిన తప్పిదాలపై తలసాని శ్రీనివాస్ యాదవ్ ఆధ్వర్యంలో ఎమ్మెల్సీలు దాసోజు శ్రవణ్, సురభి వాణిదేవి, ఎమ్మెల్యేలు మల్లారెడ్డి, ముఠా గోపాల్, కాలేరు వెంకటేష్, మర్రి రాజశేఖర్ రెడ్డి, కార్పొరేటర్లతో కలిసి జీహెచ్ఎంసీ ప్రధాన కార్యాలయంలో కమిషనర్ కర్ణన్ ను కలిసి వినతిపత్రం అందజేశారు. డివిజన్ ఏర్పాటు మొత్తం గందరగోళంగా ఉందని ఆయన కమిషనర్కు వివరించారు. కార్పొరేటర్ల అభిప్రాయాలు, సూచనలను తెలుసుకునేందుకు మంగళవారం ప్రత్యేక సమావేశం ఏర్పాటు చేసినట్లు కమిషనర్ వివరించారు. అనంతరం తలసాని శ్రీనివాస్ యాదవ్ విలేకరులతో మాట్లాడుతూ అంత ఆతురతతో ఔటర్ రింగ్ రోడ్డు (ORR) లోపల ఉన్న మున్సిపాలిటీలు, కార్పొరేషన్లను జీహెచ్ఎంసీలో విలీనం చేసి 150 ఉన్న డివిజన్లను 300కు పెంచాల్సిన అవసరం ఏమొచ్చిందని ప్రశ్నించారు. రాజకీయ పార్టీలు, ప్రజాప్రతినిధులను సంప్రదించకుండా, ప్రజల అభిప్రాయాలను తెలుసుకోకుండా ఆఫీసులలో కూర్చొని వారికి తోచినట్లు డివిజన్లను ఏర్పాటు చేశారని మండిపడ్డారు. డివిజన్ల సరిహద్దులలో కూడా పారదర్శకత లేదన్నారు. ఇప్పుడున్న 150 డివిజన్లకు సరియైన అధికారులు, తగినంత సిబ్బంది లేని పరిస్థితుల్లో నూతనంగా మరో 150 డివిజన్ లను ఏ విధంగా ఏర్పాటు చేశారని ప్రశ్నించారు. కార్పొరేటర్లకు గుడ్ న్యూస్... డివిజన్కు రెండు కోట్ల రూపాయలు చొప్పున నిధులు విడుదల చేస్తామని చెప్పి హడావిడి చేసి, ఇప్పుడు ఇంచార్జి మంత్రులకు అప్పగించడం సరికాదన్నారు. నగరంలో వివిధ సందర్భాల్లో ఏర్పాటు చేస్తున్న ఫ్లెక్సీలలో కూడా కేవలం బీఆర్ఎస్ పార్టీకి చెందినవి మాత్రమే తొలగిస్తున్నారని ఆరోపించారు. తొలగిస్తే అన్ని ఫ్లెక్సీ లను తొలగించాలని డిమాండ్ చేశారు. కమిషనర్ దృష్టికి కూడా ఈ విషయాలను తీసుకెళ్లినట్లు ఆయన చెప్పారు. మంగళవారం జరిగే కౌన్సిల్ సమావేశం లో ఈ అంశాలపై గట్టిగా నిలదీస్తామని చెప్పారు.