GHMC | జీహెచ్ఎంసీ కార్పొరేట‌ర్ల స్ట‌డీ టూర్‌కు స్టాండింగ్ క‌మిటీ ఆమోదం

ఇంటా, బయట తీవ్ర విమర్శలు పదవీ కాలం ముగిసే సమయంలో టూర్లు ఎందుకని దుమారం GHMC | జీహెచ్ఎంసీ (GHMC) 2026-2027 ఆర్థిక సంవత్సరానికి సంబంధించిన ముసాయిదా బడ్జెట్ (Draft budget)ను స్టాండింగ్ కమిటీ (Standing Committee) ఆమోదించింది. మొత్తం రూ.11,460 కోట్ల అంచనా వ్యయంలో రెవెన్యూ వ్యయం రూ.4,057 కోట్లుగా, మూలధన వ్యయం రూ.7,403 కోట్లుగా అంచనా వేయగా, స్టాండింగ్ కమిటీ ఆమోదం తెలిపింది. దీనితో పాటు జీహెచ్ఎంసీలోని 145 మంది కార్పొరేటర్ల స్టడీ టూర్ (Study Tour) ను సైతం స్టాండింగ్ కమిటీ ఆమోదించింది. ఈ స్టడీ టూర్లో భాగంగా కార్పొరేటర్లు అహ్మదాబాద్ మరియు చండీగఢ్లలో పర్యటించి, అక్కడ నగర పాలనలో అమలులో ఉన్న ఉత్తమ పద్ధతులను అధ్యయనం చేయనున్నారు. దీనిపై ఇంటా, బయటా తీవ్ర విమర్శలు వెల్లువెత్తుతున్నాయి. పదవీ కాలం ముగిసే సమయంలో టూర్లు ఎందుకని పలువురు ప్రశ్నిస్తున్నారు. ఫిబ్రవరి నెల 9న నగరానికి.. 10న ముగియనున్న పదవీ కాలం.. కార్పొరేటర్ల స్టడీ టూర్ వచ్చే నెల 4వ తేదీ నుంచి 9వ తేదీ వరకు నిర్వహించనున్నారు. కాగా, వారి పదవీకాలం అదే నెల 10వ తేదీన ముగియనుండడం గమనార్హం. కార్పొరేటర్లు అక్కడికి వెళ్లి అధ్యయనం చేసి, ఉత్తమ విధానాలను ఎంపిక చేసి ఎక్కడ అమలు చేస్తారని పలువురు ప్రశ్నిస్తున్నారు. కొంతమంది కార్పొరేటర్లు తమ తమ డివిజన్లలో సాధారణ అభివృద్ధి పనులు కూడా చేయలేదని గుర్తు చేస్తున్నారు. అలాంటివారు పదవీ కాలం ముగిసే సమయంలో నూతన విధానాలను అధ్యయనం చేయాలన్న ఆలోచన ఎందుకు వచ్చిందని ఎద్దేవా చేస్తున్నారు. గతంలో స్టడీ టూర్లపైన లోకాయుక్త అభ్యంతరం ప్రతిపాదిత పర్యటనలను ప్రభుత్వ సొమ్ముతో చేసే వినోద పర్యటనలుగా పలువురు అభివర్ణించారు. గతంలోనూ జీహెచ్ఎంసీ ఆధ్వర్యంలో స్టడీ టూర్లు నిర్వహించారు. అప్పట్లోనే ఈ టూర్లపై లోకాయుక్త అభ్యంతరం వ్యక్తం చేసింది. ఈ స్టడీ టూర్లు ప్రజలకు ఎటువంటి స్పష్టమైన ప్రయోజనాన్ని అందించలేదని పేర్కొంది. ఈ ఖర్చులను నివారించదగిన ఖర్చులుగా అభివర్ణించింది. దీనికి తోడు గతంలో స్టడీ టూర్లకు వెళ్లిన కార్పొరేటర్లు వచ్చిన తరువాత దాదాపుగా ఎవరూ నివేదికలు సమర్పించకపోవడం విశేషం. ఆ అభ్యంతరాలు ఉన్నప్పటికీ, ఆ ఆచారం కొనసాగుతున్నట్లు కనిపిస్తోంది. జీహెచ్ఎంసీకి ఆర్థిక భారం ప్రస్తుత అంచనా ప్రకారం, ఈ పర్యటనల కోసం ప్రతి కార్పొరేటర్పై జీహెచ్ఎంసీ ఒక్కొక్కరికి రూ..90,000 నుండి రూ.1 లక్ష వరకు ఖర్చు చేస్తుంది. విమాన ఛార్జీలు, వసతి, స్థానిక రవాణా, ఆహారం మరియు సంబంధిత ఖర్చులకు ఈ సొమ్ము వినియోగిస్తారు. దీంతో మొత్తం ఖర్చు రూ.1.35 కోట్ల నుండి రూ.1.4 కోట్ల మధ్య ఉంటుందని అంచనా. జీహెచ్ఎంసీ ప్రస్తుత ఆర్థిక పరిస్థితి దృష్ట్యా ఇది మరింత చర్చనీయాంశమైంది. ప్రస్తుతం ఉద్యోగులకు వేతనాలు చెల్లించడమే జీహెచ్ఎంసీకి భారంగా ఉందని, ఈ సమయంలో దాదాపు కోటిన్నర ఖర్చు చేసి ఈ పర్యటన ఎందుకని పౌరులు ప్రశ్నిస్తున్నారు. ప్రజల సొమ్మును దుర్వినియోగం చేయడమేనంటున్న ఎఫ్జీజీ జీహెచ్ఎంసీ కార్పొరేటర్ల ప్రతిపాదిత పర్యటనను తక్షణమే నిలిపివేయాలని ఫోరం ఫర్ గుడ్ గవర్నెన్స్ (ఎఫ్జీజీ) రాష్ట్ర ప్రభుత్వాన్ని డిమాండ్ చేసింది. ఈ మేరకు రాష్ట్ర మున్సిపల్ అడ్మినిస్ట్రేషన్ అండ్ అర్బన్ డెవలప్మెంట్ ప్రిన్సిపల్ సెక్రటరీకి ఎఫ్జీజీ అధ్యక్షుడు ఎం. పద్మనాభ రెడ్డి లేఖ రాశారు. ఈ సందర్భంగా ఆయన మాట్లాడుతూ కార్పొరేటర్లు తిరిగి వచ్చే సమయానికి పర్యటన సమయంలో సంపాదించిన జ్ఞానాన్ని ఉపయోగించుకునేందుకు వారికి ఒక రోజు సమయం మాత్రమే మిగిలి ఉంటుందని ఆయన అన్నారు. ఈ పర్యటన నగర ప్రజలకు ఏ విధంగానూ ప్రయోజనం చేకూర్చదని చెప్పారు. ఈ పర్యటనను పన్ను చెల్లింపుదారుల డబ్బును దుర్వినియోగం చేసే యాత్రగా అభివర్ణించారు. ప్రభుత్వ ఉద్యోగుల విషయంలో, ఒక సంవత్సరం కంటే తక్కువ సర్వీస్ ఉన్న అధికారిని సాధారణంగా అధ్యయన పర్యటన కోసం విదేశాలకు వెళ్లేందుకు అనుమతించరని గుర్తు చేశారు. పర్యటన నుంచి తిరిగి వచ్చిన తర్వాత, అధికారికి కొత్తగా సంపాదించిన జ్ఞానాన్ని వర్తింపజేసేందుకు తగినంత సర్వీస్ మిగిలి ఉండాలనేది ఈ నియమం వెనుక ఉన్న కారణమని వివరించారు. కార్పొరేటర్ల స్టడీ టూర్పై సోషల్ మీడియాలో విపరీతమైన కామెంట్లు, మీమ్లు వెల్లువెత్తుతున్నాయి. ఇది పనిలేని స్టడీ టూర్ అంటూ కొందరు, కౌన్సిల్ టర్మ్ ముగిసేలోపు ఫుల్ ఎంజాయ్మెంట్ అంటూ మరికొందరు కామెంట్ చేస్తున్నారు.