Telangana | క‌రెంట్ కోసం.. రాత్రంతా బావుల వ‌ద్దే రైతుల ప‌డిగాపులు

Telangana | త్రినేత్ర.న్యూస్ : రాష్ట్ర వ్యాప్తంగా కరెంట్ కోతలు కొనసాగుతూనే ఉన్నాయి. డిమాండ్కు సరిపడా కరెంట్ లేకపోవడంతో.. రైతులకు 24 గంటల ఉచిత విద్యుత్ అందించడం కష్టంగా మారింది. దీంతో రైతులు కరెంట్ కోసం రాత్రంతా వ్యవసాయ బావుల వద్ద ఉండాల్సిన పరిస్థితి దాపురించింది. ఎముకలు కొరికే చలిలో.. బావుల వద్దే చలి మంటలు కాచుకుంటూ విద్యుత్ కోసం ఎదురు చూస్తున్నారు. తాజాగా ఆదిలాబాద్ జిల్లా ఇచ్చోడ మండల పరిధిలోని ముఖ్రా కే గ్రామంలో విద్యుత్ కోతలు వెలుగు చూశాయి. విద్యుత్ సరఫరాలో తీవ్ర అంతరాయం ఏర్పడుతుంది. ఈ క్రమంలో పొద్దంతా కరెంట్ ఉండడం లేదు. రాత్రి సమయాల్లోనైనా కరెంట్ సరఫరా చేస్తారేమోనని రైతులు వ్యవసాయ బావుల వద్దే చలికి వణుకుతూ జాగరణ చేస్తున్నారు. విద్యుత్ సరఫరా లేకపోవడంతో.. వరి, మొక్కజొన్నతో పాటు ఇతర పంటలకు సాగునీరు అందించలేకపోతున్నామని రైతులు బోరుమన్నారు. అయితే బుధవారం మధ్యాహ్నం 12.30 గంటలకు విద్యుత్ సరఫరా చేస్తామని అధికారులు చెప్పడంతో.. తాము పొలాల వద్దనే వేచి ఉన్నామని రైతులు పేర్కొన్నారు. ఎముకలు కొరికే చలిని తట్టుకొని రాత్రంతా కరెంట్ కోసం వేచి చూసినట్లు తెలిపారు. వ్యవసాయ రంగానికి నిరంతరాయంగా విద్యుత్ సరఫరా అయ్యేలా అధికారులు చర్యలు తీసుకోవాలని రైతులు డిమాండ్ చేశారు. గత బీఆర్ఎస్ ప్రభుత్వంలో విద్యుత్ సరఫరాకు ఆంటకమే లేదని గుర్తు చేశారు. 24 గంటల నాణ్యమైన ఉచిత విద్యుత్ను బీఆర్ఎస్ ప్రభుత్వం సరఫరా చేసిందని తెలిపారు. మాజీ సీఎం కేసీఆర్ రైతులకు ఎలాంటి ఇబ్బందులు తలెత్తకుండా.. 24 గంటల నాణ్యమైన విద్యుత్ను అందించి ఆదుకున్నారని పేర్కొన్నారు.