CM Revanth Reddy | చ‌చ్చినా, బ్ర‌తికినా తెలంగాణ కోస‌మే: సీఎం రేవంత్ రెడ్డి

CM Revanth Reddy | హైదరాబాద్: చచ్చినా తెలంగాణ కోసం చస్తాం, బ్రతికినా తెలంగాణ కోసం బ్రతుకుతాం, ప్రాణమున్నంత వరకు తెలంగాణ ప్రజల ప్రయోజనాల కోసం పనిచేస్తామని రాష్ట్ర ముఖ్యమంత్రి సీఎం రేవంత్ రెడ్డి స్పష్టం చేశారు. శాసనసభ సమావేశాల్లో భాగంగా నీళ్లు - నిజాలు అనే అంశంపై నిర్వహించిన స్వల్పకాలిక చర్చలో ఆయన మాట్లాడుతూ వలసల జిల్లా పాలమూరు బిడ్డగా కరువు కష్టాలు, పేదరికం ఎలా ఉంటుందో తనకు పూర్తిగా తెలుసని, తెలంగాణ ప్రాంతానికి తీరని అన్యాయం జరుగుతుందని, ఇందుకు కాంగ్రెస్ కారణమని కెసీఆర్ విమర్శించారని, గత ప్రభుత్వంలో తీసుకున్న నిర్ణయాలు ఇప్పుడు ఎలా ఉపయోగపడతాయో, ఈ ప్రభుత్వం తీసుకునే నిర్ణయాలపై తన అనుభవంతో సూచనలు ఇస్తారని అనుకున్నామని అన్నారు. అందుకే కృష్ణా జలాలపై ఒకరోజు, గోదావరి జలాలపై ఒకరోజు సభలో చర్చిద్దామని ఆహ్వానించామని తెలిపారు. ఈ శాసన సభకు ఒక పవిత్రత ఉందని, ఈ సభలో జరిగే చర్చలను, విషయాలను, అందులోని వాస్తవాలను ప్రజలు సంపూర్ణ విశ్వాసంతో నమ్ముతారని అన్నారు. ఎందుకంటే... ఇక్కడ అబద్దానికి ఆస్కారం లేదని, మాటల గారడీలకు స్థానం లేదని పేర్కొన్నారు. సభకు వస్తే ఎవరి తోలు ఎవరు తీస్తారో తెలిసేది.. ప్రజల ఆశలు, ఆశయాలు, ఆకాంక్షలే తప్ప రాజకీయ ప్రయోజనాలకు ఇది వేదిక కాబోదని సీఎం రేవంత్ రెడ్డి అన్నారు. తెలంగాణ నాలుగు కోట్ల ప్రజల ప్రాతినిధ్యానికి ప్రతిరూపం ఈ సభ అని, ఈ సభలో మాట్లాడే ప్రతిమాట రాష్ట్ర ప్రయోజనాలే పరమావధిగా ఉంటుందన్న నమ్మకం ప్రజల్లో ఉంటుందని అన్నారు. గడచిన రెండేళ్లుగా ప్రతిపక్ష నాయకుడు సభకు రావడం లేదని, సభకు రండి అని తాను పదే పదే విజ్ఞప్తి చేశానని తెలిపారు. 40 ఏళ్ల రాజకీయ అనుభవం ఉంది అని చెప్పుకునే ప్రధాన ప్రతిపక్ష నేత సభకు రాలేదని అన్నారు. సభలోకి రాము, చర్చలో పాల్గొనం అని హరీష్ రావు మాట్లాడటం చట్టసభలను అవమానించడమే అని స్పష్టం చేశారు. మీరు సభ పెట్టండి మీ బట్టలు ఊడదీస్తామన్నారు, తోలు తీస్తామని కేసీఆర్ మాట్లాడారు, ఆయన సభలో చర్చలో పాల్గొని ఉంటే ఎవరి బట్టలు ఎవరు ఊడదీస్తారు, ఎవరి తోలు ఎవరు తీస్తారు అనేది తెలంగాణ ప్రజలకు తెలిసేదన్నారు. ఉమ్మడి రాష్ట్రంలో ఉన్పప్పుడే అప్పటి ప్రభుత్వం తెలంగాణ ప్రాంతంలో వీలైనన్ని సాగునీటి ప్రాజెక్టులు మంజూరు చేసిందన్నారు. 2005 నుంచి 2014 నాటికే కృష్ణా బేసిన్లో ఎస్ఎల్బీసీ, కల్వకుర్తి, నెట్టెంపాడు, పాలమూరు రంగారెడ్డి, డిండి, మక్తల్ నారాయణపేట కొడంగల్, కోయిల్ సాగర్ ప్రాజెక్టులు చేపట్టిందని, 2014లో అధికారం చేపట్టిన బీఆర్ఎస్ ఈ ప్రాజెక్టులను వేగంగా పూర్తిచేయాల్సిందిపోయి అసంపూర్తిగా వదిలేసిందని తెలిపారు. తెలంగాణకు తీరని అన్యాయం.. 490 టీఎంసీలు ఉమ్మడి రాష్ట్రంలో తెలంగాణకు కేటాయిస్తే, తెలంగాణ రాష్ట్రం ఏర్పడ్డాక కేసీఆర్, హరీష్ రావు బాధ్యతలు చేపట్టాక తెలంగాణ ప్రజలకు మరణ శాసనం రాశారని సీఎం రేవంత్ రెడ్డి అన్నారు. 2015 జూన్లో కేంద్ర జలశక్తి మంత్రిత్వ శాఖ అధ్వర్యంలో జరిగిన అంతర్రాష్ట్ర సమావేశంలో 299 టీఎంసీలకు అంగీకరించారని, ఉమ్మడి ఏపీకి కేటాయించిన 811 టీఎంసీల్లో తెలంగాణకు 490 టీఎంసీలు అడగాల్సిందిపోయి 299 టీఎంసీలకు ఒప్పుకుని సంతకం పెట్టారని తెలిపారు. 21.09.2016 న జరిగిన అపెక్స్ మీటింగ్ లోనూ మనకు 299 టీఎంసీలు చాలు అని కేసీఆర్ తాత్కాలిక నీటి వాటాలకు ఒప్పుకొని వచ్చారని, 06.10.2020లో జరిగిన రెండో అపెక్స్ మీటింగ్ లోనూ ఈ కేటాయింపులే కొనసాగించండి అని శాశ్వతంగా ఒప్పుకొని వచ్చారని అన్నారు. కృష్ణా జలాలపై బహిరంగ సభలు కాదు, సభలోనే చర్చించాలని తాము కెసీఆర్, హరీష్ ను ఆహ్వానించామని తెలిపారు. పదేళ్లు కృష్ణా నీటిని ఏపీ తరలించుకుపోయేందుకు సహకరించి తెలంగాణకు తీరని అన్యాయం చేశారని మండిపడ్డారు. వివరాలతో సభలో చర్చిద్దామంటే సభకు రాకుండా వెళ్లిపోయారని ధ్వజమెత్తారు. కేసీఆర్ ఏ నైతిక హక్కుతో మాట్లాడుతున్నారు..? పాలమూరు రంగారెడ్డి ఎత్తిపోతల ప్రాజెక్టు కట్టాలని మొట్ట మొదట 2009 లో ఆనాటి ఎంపీ విఠల్ రావు వైఎస్ రాజశేఖరరెడ్డికి లేఖ రాశారని, చరిత్రలో పాలమూరు రంగారెడ్డికి ఎలా పునాదులు పడ్డాయో తెలంగాణ సమాజానికి తెలియాల్సిన అవసరం ఉందని రేవంత్ రెడ్డి అన్నారు. విఠల్ రావు ని ఈ సందర్భంగా గుర్తు చేసుకోవాల్సిన అవసరం ఉందన్నారు. ఉమ్మడి రాష్ట్రంలో సీమాంధ్ర నాయకులతో తెలంగాణ కాంగ్రెస్ నాయకులు కొట్లాడి పాలమూరు రంగారెడ్డిని సాధించుకున్నారని, ఆ సమయంలో మహబూబ్ నగర్ ఎంపీగా ఉన్న కెసీఆర్ పాలమూరు ఎత్తిపోతల ఇవ్వాలని అడగలేదని అన్నారు. ఏ నైతిక హక్కుతో కేసీఆర్ ఇవాళ మాట్లాడుతున్నారని ప్రశ్నించారు. జూరాల నుంచి రోజుకు 2 టీఎంసీల చొప్పున 70 టీఎంసీల వరద జలాలను మళ్లించి సాగునీటిని అందించేందుకు పాలమూరు ప్రాజెక్టు నిర్మించాలని ఉమ్మడి రాష్ట్ర ఆమోదం తెలిపిందని, జూరాల నుంచి 70 టీఎంసీల వరద జలాలతో పాలమూరు ప్రాజెక్టు సర్వేతో పాటు డీపీఆర్ తయారు చేయాలని ఇంజనీరింగ్ స్టాఫ్ కాలేజీ ఆఫ్ ఇండియా (ESCI) వాళ్లకు ఈ జీవో ద్వారా బాధ్యతలు అప్పగించిందని తెలిపారు. నీటి హక్కుల కోసం పోరాడుతాం.. జూరాల సోర్స్గా పాలమూరు రంగారెడ్డి ప్రాజెక్టు నిర్మించాలని ఆనాడు తెలంగాణ ఉద్యమకారులు, తెలంగాణ రిటైర్డ్ ఇంజనీర్ఫోరం కు చెందిన నిపుణులు, ఇంజనీర్లు సూచించారని రేవంత్ రెడ్డి తెలిపారు. 26 రోజుల తర్వాత ఈ ప్రాజెక్టును కేసీఆర్ పథకం ప్రకారం డైవర్ట్ చేశారని ఆరోపించారు. జూరాల నుంచి కాకుండా పాలమూరు రంగారెడ్డి ప్రాజెక్టు సోర్స్ను శ్రీశైలం నుంచి మార్చాలని ఆదేశాలు జారీచేశారని, జూరాల వద్ద నిర్మిస్తే పంపులకు రూ.5,185 కోట్లు అంచనా వేస్తే సోర్స్ ను జూరాల నుంచి శ్రీశైలానికి మార్చి పంపులు, లిఫ్టుల సంఖ్య పెంచారని, 37 పంపులకు రూ.10,335 కోట్లకు అంచనాలు పెంచారని అన్నారు. తెలంగాణ నీళ్ల విషయంలో, అభివృద్ధి విషయంలో తామంతా ఏకాభిప్రాయంతో పనిచేస్తామని, తెలంగాణకు రావాల్సిన నీటి హక్కుల కోసం పోరాడుతామని తెలిపారు. తెలంగాణ ప్రజలకు మేలు చేయాలన్నదే తన ఆలోచన అని, దేవుడి మీద ఆన, తాను ఉన్నంత కాలం తెలంగాణ ప్రజల హక్కులకు భంగం కలగనీయనని సీఎం స్పష్టం చేశారు. ఏకగ్రీవ తీర్మానాలు.. తెలంగాణలోని ఉమ్మడి మహబూబ్ నగర్ జిల్లా తీవ్ర కరువు ప్రాంతమని, అత్యధిక వలసలకు గురైందని, ఈ పరిస్థితులను దృష్టిలో ఉంచుకుని నాటి ప్రభుత్వం పాలమూరు రంగారెడ్డి లిఫ్ట్ ఇరిగేషన్ స్కీం (పీఆర్ఎల్ఐఎస్)ను చేపట్టిందని సీఎం తెలిపారు. ఈ సందర్భంగా పలు అంశాలపై తీర్మానాలు చేశారు. తెలంగాణ రాష్ట్రం ఏర్పడిన తరువాత గత 10 ఏళ్లలో ఈ ప్రాజెక్టు నిర్మాణంలో సరైన రీతిలో పురోగతి లేకపోవడం వల్ల ప్రాజెక్టు అంచనాలు, నిర్మాణ వ్యయాలు విపరీతంగా పెరిపోయాయి. వీటిని పరిగణనలోకి తీసుకుని పాలమూరు రంగారెడ్డి లిఫ్ట్ ఇరిగేషన్ స్కీంకు సంబంధించిన అన్ని అనుమతులను సత్వరమే ఇవ్వాలని కేంద్ర ప్రభుత్వాన్ని కోరుతూ సభ ఏకగ్రీవంగా తీర్మానించింది. అలాగే ఇరు రాష్ట్రాల అంతర్రాష్ట్ర జల వివాదాలను పరిష్కరించే వరకు ఆంధ్రప్రదేశ్ ప్రభుత్వం చేపట్టబోతున్న పోలవరం బనకచర్ల లింక్ ప్రాజెక్టు, పోలవరం నల్లమల సాగర్ లింక్ ప్రాజెక్టు లేదా మరే ఇతర రూపంలోనైనా గోదావరి జలాలను తరలించేందుకు ఎలాంటి అనుమతులు ఇవ్వరాదని కేంద్ర ప్రభుత్వాన్ని కోరుతూ సభ ఏకగ్రీవంగా మరో తీర్మానం చేసింది.

CM Revanth Reddy | చ‌చ్చినా, బ్ర‌తికినా తెలంగాణ కోస‌మే: సీఎం రేవంత్ రెడ్డి

FOLLOW US

ట్యాగ్స్:

సంబంధిత వార్తలు

Jagga Reddy | నువ్వు మంత్రి అయ్యాకే తెలంగాణ వాళ్లు నీళ్లు తాగుతున్నారా: హ‌రీశ్‌పై నిప్పులు చెరిగిన జ‌గ్గారెడ్డి

Harish Rao | ఇప్పుడు తలకాయ ఎక్కడ పెట్టుకుంటవు రేవంత్

KCR | కేసీఆర్ ఫాంహౌజ్ ఎదుట కాంగ్రెస్ ధ‌ర్నా

ఫీచర్డ్ వార్తలు

Champion Review | ఛాంపియ‌న్ రివ్యూ – శ్రీకాంత్ కొడుకు సినిమా హిట్టా? ఫ‌ట్టా?

Bus Fire Accident | ప్రైవేట్ స్లీపర్ బస్‌ని ఢీకొట్టిన ట్రక్.. మంటలు చెలరేగడంతో 9 మంది సజీవ దహనం

తాజావార్తలు

పాపులర్

Ashes Series 2025-26 | యాషెస్ సిరీస్ 5వ టెస్టు.. తొలి ఇన్నింగ్స్‌లో ఇంగ్లండ్ 384 ప‌రుగుల‌కు ఆలౌట్‌..

Sankranti Movies | సంక్రాంతి సినిమాల టికెట్ ధ‌ర‌లు పెర‌గ‌నున్నాయా? - సినీ ల‌వ‌ర్స్‌పై భారం ప‌డ‌నుందా?

5th Jan 2026 Gold And Silver Rates | వెనెజువెలాపై అమెరికా చ‌ర్య ఎఫెక్ట్‌.. పెరిగిన బంగారం ధ‌ర‌లు..

POPULAR LINKS

Pre Approved Loans | ప్రీ అప్రూవ్డ్ లోన్స్ అంటే ఏమిటి..? వీటిని తీసుకుంటే ఏమ‌వుతుంది..?

Telangana | నేడు న‌ల్ల‌మ‌ల సాగ‌ర్‌పై సుప్రీంకోర్టులో విచారణ‌.. ఢిల్లీలోనే రేవంత్ మ‌కాం..!