India Nuclear Weapons | శత్రువుల వెన్నులో వణుకు పుట్టిస్తున్న భారత్ అణుబలం: 190 వార్‌హెడ్‌లు.. ఏ మూలకైనా దూసుకెళ్లే మిస్సైల్ నెట్‌వర్క్!

India Nuclear Weapons | త్రినేత్ర న్యూస్ : ప్రపంచంలో అణుబాంబులు ఉండటం ఒక ఎత్తయితే.. శత్రువు దాడి చేసినప్పుడు అత్యంత కచ్చితత్వంతో వాటిని ప్రయోగించగల సరైన 'డెలివరీ సిస్టమ్' కలిగి ఉండటం అసలైన వ్యూహం. భారత్ కేవలం అణువార్‌హెడ్‌లను కలిగి ఉండటమే కాకుండా.. శత్రు దేశాల గుండెల్లోకి నేరుగా చొచ్చుకెళ్లగల అద్భుతమైన క్షిపణి వ్యవస్థను, పరిపూర్ణ అణు త్రయాన్ని (Nuclear Triad) సిద్ధం చేసుకుందని అంతర్జాతీయ సైంటిస్టుల తాజా నివేదిక వెల్లడించింది.

ఇదీ చదవండి | ఉక్రెయిన్‌లో రష్యా డ్రోన్ల బీభత్సం: ఇండియన్ ఫార్మా ప్లాంట్ ధ్వంసం.. ఒకరు మృతి, రూ.400 కోట్ల నష్టం

ప్రఖ్యాత 'బులెటిన్ ఆఫ్ ది అటామిక్ సైంటిస్ట్స్' (BAS) విడుదల చేసిన తాజా నివేదిక ప్రకారం.. భారత్ వద్ద ప్రస్తుతం సుమారు 190 అణు వార్‌హెడ్‌లు ఉన్నట్లు అంచనా. భారత్ తన అణ్వాయుధాల వివరాలను బహిరంగంగా ప్రకటించకపోయినా.. భూమి, ఆకాశం, సముద్ర మార్గాల్లో నిరంతరం నిఘా ఉంచే త్రిముఖ అణు దాడి సామర్థ్యాన్ని దేశం బలోపేతం చేసుకుంటూ వస్తోందని విశ్లేషకులు స్పష్టం చేశారు.

గాల్లోంచి విరుచుకుపడే ఫైటర్ జెట్లు

భారత వైమానిక దళంలో అణుబాంబులను మోసుకెళ్లగల సత్తా ఉన్న యుద్ధ విమానాలు ప్రధాన పాత్ర పోషిస్తున్నాయి.

ఫ్రాన్స్ నుంచి కొనుగోలు చేసిన మిరాజ్-2000 (Mirage 2000) జెట్‌లు ప్రధాన న్యూక్లియర్ స్ట్రైక్ బాధ్యతలను నిర్వర్తిస్తుండగా, జాగ్వార్ (Jaguar) ఎయిర్‌క్రాఫ్ట్‌లు సెకండరీ మిషన్‌లో ఉన్నాయి.

భవిష్యత్తులో ఆధునిక రఫేల్ (Rafale) యుద్ధ విమానాలు ఈ బాధ్యతలను పూర్తిగా స్వీకరించే అవకాశం ఉందని నివేదిక పేర్కొంది.

Also Read | యావత్ ప్రపంచానికే నువ్వు హీరోవి : స్మిత్‌కు ఇజ్రాయెల్ అత్యున్నత పురస్కారం ప్రకటించిన నెతన్యాహు

అగ్ని క్షిపణుల తిరుగులేని నెట్‌వర్క్

భారత్ సొంతంగా డీఆర్‌డీవో (DRDO) ద్వారా అభివృద్ధి చేసిన అగ్ని క్షిపణి శ్రేణి మన రక్షణ వ్యవస్థకు వెన్నెముకగా నిలిచింది. ఇందులో ప్రధానంగా 6 రకాల బాలిస్టిక్ క్షిపణులు ప్రస్తుతం సేవలందిస్తున్నాయి.

అగ్ని-1: సుమారు 700 కి.మీ రేంజ్

అగ్ని-2: 2,000 కి.మీ పైగా

అగ్ని-3,  అగ్ని-4: 3,200 నుండి 3,500 కి.మీ పరిధి

అగ్ని-5: సుమారు 6,000 కి.మీ రేంజ్

ఈ శ్రేణిలో అత్యంత శక్తిమంతమైన అగ్ని-5 ద్వారా మొత్తం చైనా, పాకిస్థాన్, సెంట్రల్ ఆసియా, రష్యాలోని అత్యధిక భాగాలు, యూరప్‌లోని కీలక ప్రాంతాలను భారత్ సులభంగా చేరుకోగలదు. అంతే కాకుండా ఒకే క్షిపణి ద్వారా బహుళ లక్ష్యాలను ఒకేసారి చేధించే మిర్వ్ (MIRV - Multiple Independently Targetable Re-entry Vehicle) టెక్నాలజీని కూడా భారత్ పరీక్షించి విజయవంతమైంది. దీనికితోడు 'క్యానిస్టర్' ఆధారిత వ్యవస్థ వల్ల నిమిషాల వ్యవధిలోనే క్షిపణిని ప్రయోగించే వెసులుబాటు మన సైన్యానికి దక్కింది.

సముద్ర గర్భంలో మౌన సైన్యం: తిరుగులేని 'సెకండ్ స్ట్రైక్'

అణుయుద్ధంలో అత్యంత కీలకమైనది సముద్ర మార్గం. శత్రువు మొదటి దాడి చేసినప్పటికీ, సముద్రంలో దాగి ఉండే న్యూక్లియర్ సబ్‌మెరైన్లు చెక్కుచెదరకుండా ఉండి ప్రతిదాడి చేయగలవు.

Also Read | మీడియా స‌మావేశంలో కుర్చీ కోసం లొల్లి.. జిల్లా మాజీ అధ్య‌క్షుడి చెంప చెల్లుమ‌నిపించిన నేత‌

భారత్ ఇప్పటికే రంగంలోకి దించిన ఐఎన్ఎస్ అరిహంత్, ఐఎన్ఎస్ అరిఘాత్‌లతో పాటు, ఐఎన్ఎస్ అరిధమన్ (INS Aridhaman) చేరికతో మన నావికాదళం మరింత పటిష్టమైంది.

సబ్‌మెరైన్ల నుంచి ప్రయోగించే సుదూర శ్రేణి 'కె-4' (K-4) క్షిపణులను కూడా త్వరలోనే విస్తృతంగా మోహరించనున్నారు.

'నో ఫస్ట్ యూజ్'.. కానీ ప్రతిదాడి విధ్వంసకరం

భారత్ మొదటి నుంచీ 'నో ఫస్ట్ యూజ్' (ముందుగా అణ్వాయుధాలను ప్రయోగించం) సిద్ధాంతానికే కట్టుబడి ఉంది. అయితే, తమపై అణుదాడి జరిగితే మాత్రం శత్రుదేశం కోలుకోలేనంతగా విరుచుకుపడే 'సెకండ్ స్ట్రైక్' సామర్థ్యాన్ని దేశం పూర్తిగా సిద్ధం చేసుకుంది. మిస్సైల్ మ్యాన్ ఏపీజే అబ్దుల్ కలాం ఒక సందర్భంలో అన్నట్లు.. అగ్ని క్షిపణి కేవలం పేలుడు పదార్థాలనే కాదు, శాంతిని చాటే సామర్థ్యాన్నీ కలిగి ఉంటుంది. అయితే అవతలి వారి ఆలోచనను బట్టి దాని ప్రయోగం ఆధారపడి ఉంటుంది.

Also Read | రాజ‌కీయాల్లోకి సీబీఐ మాజీ డైరెక్ట‌ర్‌.. ఎస్ఎస్‌పీ జాతీయ‌ అధ్య‌క్షుడిగా బాధ్య‌తలు

మొత్తంగా చూస్తే.. ఆకాశంలో రఫేల్, నేలపై అగ్ని క్షిపణులు, సముద్రపు లోతుల్లో అరిహంత్ శ్రేణి సబ్‌మెరైన్లు.. వెరసి భారత రక్షణ కవచం శత్రువుల ఏ దుస్సాహసాన్నైనా క్షణాల్లో తిప్పికొట్టేలా రూపుదిద్దుకుంది.