Hijack Alert | టేకాఫ్‌కు ముందు.. ఎయిర్ ఇండియా విమానానికి హైజాక్ అల‌ర్ట్‌

Hijack Alert | త్రినేత్ర న్యూస్ : కోల్‌క‌తాలోని నేతాజీ సుభాష్ చంద్రబోస్ అంతర్జాతీయ విమానాశ్రయంలో (Kolkata Airport) ఎయిర్ ఇండియా విమానానికి హైకాజ్ అల‌ర్ట్ (Hijack Alert) క‌ల‌క‌లం రేపింది. విమానంలోని టాయిలెట్ అద్ధంపై హైజాక్‌కు సంబంధించిన బెదిరింపు సందేశం రాసి ఉన్న‌ట్లు సిబ్బంది గుర్తించారు. విమానం టేకాఫ్‌కు సిద్ధ‌మ‌వుతున్న స‌మ‌యంలో ఈ బెదిరింపు సందేశం సిబ్బంది కంట ప‌డింది. అప్ర‌మ‌త్త‌మైన‌ పైలట్ వెంటనే ఈ విష‌యాన్ని ఎయిర్ ట్రాఫిక్ కంట్రోల్‌కు స‌మాచారం అందించారు.

సిబ్బంది వెంట‌నే అక్క‌డికి చేరుకొని ప్ర‌యాణికుల‌ను దించేసి విమానాన్ని ఐసొలేషన్ బేకు తరలించారు. అక్కడ సెంట్రల్ ఇండస్ట్రియల్ సెక్యూరిటీ ఫోర్స్ (సీఐఎస్‌ఎఫ్), ప్రత్యేక భద్రతా సిబ్బంది ముమ్మరంగా తనిఖీలు చేపట్టారు. కాగా, ఈ విమానం కోల్‌క‌తా ఎయిర్‌పోర్టు నుంచి ఇవాళ ఉద‌యం 10:20కి ముంబైకి టేకాఫ్ అవ్వాల్సి ఉంది. బెదిరింపు సందేశంలో 11:10కి విమానాన్ని హైజాక్ చేస్తామ‌ని ఉన్న‌ట్లు అధికారులు తెలిపారు.

దీని వెనుక ఎవరి హస్తం ఉందనే కోణంలో పోలీసులు, భ‌ద్ర‌తా ద‌ళాలు ద‌ర్యాప్తు చేప‌ట్టారు. విమానాశ్ర‌యంతోపాటూ విమానం లోప‌ల ఉన్న సీసీటీవీ ఫుటేజ్‌ల‌ను ప‌రిశీలిస్తున్నారు. హైజాక్ ఘ‌ట‌న‌తో విమానాశ్ర‌యంలో కాసేపు గంద‌రగోళ ప‌రిస్థితులు త‌లెత్తాయి. ప్ర‌యాణికులు తీవ్ర భ‌యాందోళ‌న‌కు గుర‌య్యారు.

Also Read..

టెకీల‌కు ఐబీఎం షాక్‌.. హెచ్-1బీ వీసాలు, గ్రీన్ కార్డ్ స్పాన్సర్‌షిప్‌లను నిలిపివేసిన టెక్ దిగ్గజం

బీజేపీతో పోరాడే శక్తి కాంగ్రెస్ పార్టీకి మాత్రమే ఉంది..

ప్రతి ఇంటా ఉసిరి.. ప్రతి గుడిలో బిల్వం