Ranabaali Vijay Deverakonda | రాజమౌళితో సినిమా చేస్తే తప్ప.. నా సినిమాలకు టికెట్ ధరలు పెంచను

• బ్రిటీష్ పాలనలో సంభవించిన కరువులు, మరుగునపడిన చారిత్రక వీరుల త్యాగాల నేపథ్యంలో 2 గంటల 50 నిమిషాల నిడివితో తెరకెక్కిన పీరియాడిక్ మూవీ 'రణబాలి'
• ఈ రోల్ కోసం దాదాపు మూడు నెలల పాటు రాయలసీమ యాస, హార్స్ రైడింగ్‌పై ప్రత్యేకంగా కసరత్తు చేసిన విజయ్ దేవరకొండ
• 'జయమ్మ' పాత్రలో రశ్మిక నటన ప్రత్యేక ఆకర్షణగా నిలుస్తుందని, తమ కాంబినేషన్ వల్ల ఆ ఎమోషన్‌కు మరింత బలం చేకూరిందని వ్యాఖ్య
• తన చిత్రాలకు ఎట్టి పరిస్థితుల్లోనూ టికెట్ ధరలు పెంచేది లేదని స్పష్టీకరణ

Ranabaali Vijay Deverakonda | త్రినేత్ర న్యూస్ : హీరో విజయ్ దేవరకొండ, దర్శకుడు రాహుల్ సంకృత్యన్ కాంబినేషన్‌లో తెరకెక్కిన భారీ పీరియాడిక్ యాక్షన్ చిత్రం "రణబాలి(Ranabaali)". రశ్మిక మందన్న(Rashmika Mandanna) హీరోయిన్‌గా నటించిన ఈ ప్రతిష్టాత్మక ప్రాజెక్ట్‌ను మైత్రీ మూవీ మేకర్స్, టీ-సిరీస్ సంయుక్తంగా నిర్మించాయి. ఈ నెల 16న విజయదశమి సందర్భంగా సినిమా ప్రపంచవ్యాప్తంగా థియేటర్లలోకి రాబోతున్న వేళ.. హీరో విజయ్ దేవరకొండ మూవీ విశేషాలు, కథ వెనుక ఉన్న చారిత్రక ప్రాధాన్యాన్ని ప్రత్యేక ఇంటర్వ్యూలో పంచుకున్నారు.

ఒక బాధ్యతతో తీసిన సినిమా

'పెళ్లి చూపులు' తర్వాత ఎక్కడా కంగారు లేకుండా, పూర్తి సంతృప్తితో ప్రమోషన్స్ చేస్తున్న చిత్రం రణబాలి అని విజయ్ (Vijay Deverakonda) పేర్కొన్నారు. "ఇందులో భారీ స్థాయిలో సీజీ వర్క్ (CG work) ఉండటంతో ఫిబ్రవరిలోనే గ్రాఫిక్స్ పూర్తి చేశాం. ఇది ఏదో సరదాగా చేసిన సినిమా కాదు.. సమాజానికి ఒక పర్పస్ చెప్పేందుకు రూపొందించాం. చరిత్రలో బ్రిటిష్ వారు మన సంపదను ఎలా దోచుకున్నారు, ఆ సమయంలో ప్రజలు అనుభవించిన ఆకలి కేకలు ఎలాంటివో ఇందులో నిజాయతీగా చూపించాం. మన చరిత్రలోని వాస్తవాలను వెలికితీసే బాధ్యతతో ఈ ప్రాజెక్ట్‌ను తెరకెక్కించాం" అని వివరించారు.

చరిత్రలో మరుగునపడిన వీరుల కథ

మన దేశంలో రైల్వే లైన్లు వేసింది మన రవాణా సౌకర్యాల కోసం కాదని, ప్రధాన నౌకాశ్రయాల ద్వారా మన దేశ సంపదను, ఆహార ధాన్యాలను విదేశాలకు తరలించుకుపోయేందుకేనని విజయ్ గుర్తుచేశారు. "1876-78 మధ్య మద్రాస్ ప్రెసిడెన్సీలో వచ్చిన కరువు వల్ల సుమారు 80 లక్షల మందికి పైగా ఆకలితో అలమటించి చనిపోయారు. కరువు ప్రాంతాల్లోనూ బ్రిటిష్ వారు రెట్టింపు పన్నులు వసూలు చేసి, కట్టలేని వారిని కఠిన శ్రమదోపిడీకి గురిచేశారు. అలాంటి అన్యాయాలను ఎదిరించి మూడు పదుల వయసులోనే ప్రాణాలర్పించిన ఎందరో వీరుల చరిత్ర ఆధారంగానే రణబాలి రూపొందింది. పాఠ్యపుస్తకాల్లో యుద్ధాల తేదీలు చెప్పారే తప్ప, ప్రజలు పడ్డ బాధలను రికార్డ్ చేయలేదు" అని ఆవేదన వ్యక్తం చేశారు.

రాయలసీమ యాస, రియలిస్టిక్ యాక్షన్

ఈ సినిమాలో కనిపించే పాత్రల సంభాషణలు, యాక్షన్ చాలా సహజంగా ఉంటాయని విజయ్ స్పష్టం చేశారు. సినిమా దాదాపు 2 గంటల 50 నిమిషాల రన్‌టైమ్‌తో సాగుతుంది. పుట్టపర్తిలో పదేళ్ల పాటు చదువుకోవడంతో తనకు రాయలసీమ యాసపై కాస్త పట్టు ఉందని, ఈ పాత్ర కోసం రెండు నుంచి మూడు నెలలు సాధన చేసి డైలాగ్స్ పలికానని చెప్పారు. అలాగే కథకు ఎంత అవసరమో అంతవరకే సహజసిద్ధమైన, రా అండ్ రస్టిక్ యాక్షన్‌ను డిజైన్ చేసినట్లు వెల్లడించారు.

రష్మిక 'జయమ్మ' పాత్ర.. ప్రత్యేక ఎమోషన్

ఈ చిత్రంలో రశ్మిక మందన్న 'జయమ్మ' పాత్రలో కనిపించనుంది. దర్శకుడు రాహుల్ ఆమె పేరును సూచించగానే తాను వెంటనే అంగీకరించానని విజయ్ తెలిపారు. "గతంలో మా కాంబినేషన్ ప్రస్తావన కొన్ని కథలకు వచ్చినా.. రణబాలి వంటి బలమైన ఎమోషన్ ఉన్న కథలోనే మళ్లీ కలిసి చేయాలని ఆగాం. మా ఇద్దరి మధ్య ఉన్న డ్రామా, సీన్లు ప్రేక్షకులకు గొప్ప ఎమోషనల్ ఫీల్‌ను ఇస్తాయి" అని అన్నారు.

ఇకపై టికెట్ రేట్ల పెంపు ఉండదు!

కాలేజీ రోజుల్లో పెరిగిన సినిమా టికెట్ ధరల వల్ల తాను ఎన్నో చిత్రాలు చూడలేక ఇబ్బంది పడ్డానని విజయ్ దేవరకొండ గుర్తుచేసుకున్నారు. "ఒక సాధారణ ప్రేక్షకుడు థియేటర్‌కు వచ్చి సినిమా చూసేలా ఉండాలి. అందుకే రణబాలి నుంచి నా తదుపరి చిత్రాలకు ఎక్కడా టికెట్ రేట్ల పెంపు (Ticket hikes) ఉండదు. భవిష్యత్తులో దర్శకుడు ఎస్.ఎస్. రాజమౌళి గారితో సినిమా చేస్తే తప్ప, నా చిత్రాలకు టికెట్ ధరలు పెంచేదే లేదు" అని విజయ్ స్పష్టం చేశారు. హాలీవుడ్ నటుడు ఆర్నాల్డ్ వోస్లూ కీలక పాత్రలో మెప్పించనున్న ఈ చిత్రం థియేటర్లలో ప్రేక్షకులకు సరికొత్త అనుభూతిని ఇస్తుందని ధీమా వ్యక్తం చేశారు.

Also Read | స‌ద్ది గ‌ట్టి…సెల‌క‌ల తొవ్వ బ‌ట్టి – తెలంగాణ ప‌ల్లె ప‌దాల‌తో చంద్ర‌బోస్ మ్యాజిక్ – ‘ఏగిలివారంగ’ సాంగ్ లిరిక్స్‌ ఇవిగో…