Hyderabad Police Overstaying Foreigners | వీసా గడువు ముగిసినా హైదరాబాద్‌లోనే అక్రమంగా ఉంటూ విదేశీయులు ఏం చేస్తున్నారంటే?

• హైదరాబాద్‌లో అక్రమ విదేశీయులపై పోలీసుల ఉక్కుపాదం
• 49 మంది గుర్తింపు
• 12 మంది డిపోర్ట్
• వెలుగులోకి నకిలీ నోట్లు, డ్రగ్స్ దందా

Hyderabad Police Overstaying Foreigners | త్రినేత్ర న్యూస్ : భారత్‌లో వీసా గడువు ముగిసినప్పటికీ గ్రేటర్ హైదరాబాద్ పరిధిలో అక్రమంగా తిష్టవేసి చట్టవ్యతిరేక కార్యకలాపాలకు పాల్పడుతున్న విదేశీయులపై నగర పోలీసులు తీవ్ర నిఘా పెట్టారు. హైదరాబాద్ సిటీ పోలీస్ స్పెషల్ బ్రాంచ్ (ఫారెనర్స్ మానిటరింగ్ సెల్), ఫారెనర్స్ రీజినల్ రిజిస్ట్రేషన్ ఆఫీస్ (FRRO), ఐటీ సెల్, స్థానిక శాంతిభద్రతల పోలీసులు కలిసి ఆగస్టు 31 నుంచి సంయుక్త కార్డన్ అండ్ సెర్చ్ ఆపరేషన్ నిర్వహిస్తున్నారు. ఈ తనిఖీల్లో ఇప్పటివరకు 49 మంది అక్రమ విదేశీయులను గుర్తించగా, వారిలో 12 మందిని ఇప్పటికే తమ సొంత దేశాలకు డిపోర్ట్ (దేశ బహిష్కరణ) చేసినట్లు నగర పోలీస్ కమిషనరేట్ శనివారం ప్రకటించింది.

మిగిలిన 37 మందిని ప్రత్యేకంగా ఏర్పాటు చేసిన హోల్డింగ్ సెంటర్లలో ఉంచి, త్వరలోనే వారి స్వదేశాలకు పంపించేందుకు ఏర్పాట్లు చేస్తున్నారు.

ఏ ప్రాంతంలో ఎంతమంది దొరికారు?

పోలీసులు వెల్లడించిన వివరాల ప్రకారం.. నగరంలోని పలు ప్రాంతాల్లో తనిఖీలు చేపట్టగా ఒక్క టోలిచౌకి ఏరియాలోనే అత్యధిక కేసులు నమోదయ్యాయి.

టోలిచౌకి: 30 మంది

లంగర్ హౌస్: 06 మంది

మెహదీపట్నం: 06 మంది

రాజేంద్రనగర్: 03 మంది

బంజారాహిల్స్: 02 మంది

సైఫాబాద్: 01 వ్యక్తి

గుడిమల్కాపూర్: 01 వ్యక్తి

విచారణలో బట్టబయలైన అక్రమ కార్యకలాపాలు

కేవలం వీసా ఉల్లంఘనే కాకుండా, పట్టుబడిన పలువురు విదేశీయులు అనేక నేరాలకు పాల్పడుతున్నట్లు దర్యాప్తులో నిర్ధారణ అయింది.

ఫేక్ కరెన్సీ, మోసాలు: గడువు ముగిసిన కొందరు నకిలీ కరెన్సీ చెలామణి చేస్తూ ప్రజలను మోసగిస్తున్నట్లు తేలింది.

గంజాయి, మాదకద్రవ్యాల వినియోగం: ఒకరి వద్ద 250 గ్రాముల గంజాయిని పోలీసులు స్వాధీనం చేసుకున్నారు. రాజేంద్రనగర్‌లో స్టూడెంట్ వీసాపై వచ్చి ఏళ్ల తరబడి అక్రమంగా ఉంటున్న ముగ్గురు సౌత్ సుడాన్ పౌరులకు డ్రగ్ స్క్రీనింగ్ చేయగా ‘గంజాయి పాజిటివ్’ వచ్చింది. మరొకరు దగ్గు మందు (కోల్డ్ సిరప్) లో ఆల్ప్రాజోలమ్ మాత్రలు కలిపి మత్తు కోసం వాడుతూ పట్టుబడ్డాడు.

ఆసుపత్రుల వద్ద దోపిడీ: స్టూడెంట్ వీసాపై వచ్చి గడువు తీరిపోయిన కొందరు విదేశీయులు.. హైదరాబాద్‌కు చికిత్స కోసం వచ్చే ఇతర దేశాల రోగులకు ట్రాన్స్‌లేటర్లుగా, మధ్యవర్తులుగా మారి భారీ ఫీజులు వసూలు చేయడమే కాకుండా, హాస్పిటల్ బిల్లులో 15% వరకు కమీషన్లు దండుకుంటున్నట్లు తేలింది.

వ్యభిచారం: టూరిస్ట్ వీసాపై వచ్చి అక్రమంగా ఉంటున్న ఒక కెన్యా మహిళ వ్యభిచార కార్యకలాపాలు నిర్వహిస్తుండగా పోలీసులు రెడ్‌హ్యాండెడ్‌గా పట్టుకున్నారు.

ఇదీ చదవండి : Tiger | అమ్రాబాద్ టైగ‌ర్ రిజ‌ర్వ్‌లో పెద్ద పులి ద‌ర్శ‌నం..

ఇంటి యజమానులు, హోటల్ నిర్వాహకులకు సీరియస్ వార్నింగ్

విదేశీయులు నిబంధనల ప్రకారం చెల్లుబాటు అయ్యే వీసా, పాస్‌పోర్టులతో నగరంలో నివసించడాన్ని తాము స్వాగతిస్తామని, అయితే చట్టవిరుద్ధంగా వ్యవహరిస్తే కఠిన చర్యలు తప్పవని పోలీస్ కమిషనర్ హెచ్చరించారు. విదేశీయులకు ఆశ్రయం కల్పించే ఇళ్ల యజమానులు, హోటళ్లు, సర్వీస్ అపార్ట్‌మెంట్ నిర్వాహకులకు స్పష్టమైన ఆదేశాలు జారీ చేశారు.

రూమ్ లేదా ఫ్లాట్ అద్దెకు ఇచ్చే ముందే ఒరిజినల్ పాస్‌పోర్ట్, వీసా డాక్యుమెంట్లను పరిశీలించాలి.

విదేశీయుల వివరాలను వెంటనే ఫారమ్ III/C (Form C) ద్వారా అధికారులకు రిపోర్ట్ చేయాలి.

నేపాల్, భూటాన్ పౌరులు, ఓసీఐ (OCI) కార్డుదారులకు వసతి ఇచ్చే సమయంలోనూ చట్టపరమైన నిబంధనలు పాటించాలి.

వీసా గడువు ముగిసినా ఉంటున్న వారి వివరాలు లేదా ఏదైనా అనుమానాస్పద కదలికలు కనిపిస్తే ఆలస్యం చేయకుండా వెంటనే స్థానిక పోలీసులకు సమాచారం ఇవ్వాలి.

ఈ నిబంధనలను పాటించకపోతే ఆశ్రయం ఇచ్చిన వారిపై కూడా చట్టపరమైన చర్యలు తప్పవని నగర పోలీసులు స్పష్టం చేశారు. ఈ ప్రత్యేక తనిఖీ ఆపరేషన్ మున్ముందు కూడా నిరంతరాయంగా కొనసాగుతుందని తెలిపారు.