Parliamentary Committee on Defence 2026 | పార్లమెంట్ రక్షణ కమిటీ పునర్వ్యవస్థీకరణ: తెలంగాణ నుంచి దామోదర్ రావు, ఏపీ నుంచి కేశినేని చిన్నికి చోటు.. చైర్మన్‌గా రాధా మోహన్ సింగ్

Parliamentary Committee on Defence 2026 | త్రినేత్ర న్యూస్ : దేశ రక్షణ రంగానికి సంబంధించి అత్యంత కీలకమైన పార్లమెంటరీ రక్షణ శాఖ స్థాయీ సంఘాన్ని (Parliamentary Standing Committee on Defence) పునర్వ్యవస్థీకరించారు. లోక్‌సభ, రాజ్యసభల నుంచి మొత్తం 31 మంది సభ్యులతో కూడిన ఈ కమిటీ చైర్‌పర్సన్‌గా బీహార్‌లోని మోతీహరి లోక్‌సభ ఎంపీ, మాజీ కేంద్ర మంత్రి రాధా మోహన్ సింగ్ తిరిగి నియమితులయ్యారు. ఈ కమిటీలో తెలుగు రాష్ట్రాలైన తెలంగాణ, ఆంధ్రప్రదేశ్ ఎంపీలకు కీలక బాధ్యతలు దక్కాయి.

తెలంగాణ నుంచి రాజ్యసభ ఎంపీ దామోదర్ రావుకు చోటు

రక్షణ కమిటీలో తెలంగాణ ప్రాతినిధ్యం విషయానికొస్తే.. రాజ్యసభ సభ్యులు దీవకొండ దామోదర్ రావు (Damodar Rao Divakonda) ఈ ప్రతిష్టాత్మక స్థాయీ సంఘంలో సభ్యుడిగా నియమితులయ్యారు. తెలంగాణ నుంచి లోక్‌సభ సభ్యులెవరూ ఈ జాబితాలో లేనప్పటికీ, పెద్దల సభ (రాజ్యసభ) నుంచి దామోదర్ రావు చోటు దక్కించుకోవడం విశేషం.

ఏపీ నుంచి కేశినేని చిన్నికి అవకాశం

ఆంధ్రప్రదేశ్ నుంచి విజయవాడ లోక్‌సభ సభ్యులు కేశినేని శివనాథ్ (కేశినేని చిన్ని) రక్షణ కమిటీలో స్థానం సంపాదించారు. లోక్‌సభ కోటా కింద ఆయనను సభ్యుడిగా ఎంపిక చేశారు.

కమిటీలో రాహుల్ గాంధీ, కమల్ హాసన్ సహా ప్రముఖ నేతలు

ఈ కమిటీలో దేశవ్యాప్తంగా వివిధ పార్టీలకు చెందిన పలువురు ప్రముఖ జాతీయ నేతలు, మాజీ ముఖ్యమంత్రులు, కేంద్ర మంత్రులు సభ్యులుగా ఉన్నారు.

లోక్‌సభ నుంచి ప్రముఖులు: కాంగ్రెస్ అగ్రనేత రాహుల్ గాంధీ, కర్ణాటక మాజీ సీఎం బసవరాజ్ బొమ్మై, కేంద్ర మాజీ మంత్రి ధర్మేంద్ర ప్రధాన్, కార్తీ చిదంబరం, రవి కిషన్, మహువా మోయిత్రా, మీసా భారతి, జగదీష్ శెట్టార్, తిరుమావళవన్ తోల్కప్పియన్ తదితరులు ఉన్నారు.

రాజ్యసభ నుంచి ప్రముఖులు: ప్రముఖ సినీ నటుడు, రాజ్యసభ ఎంపీ కమల్ హాసన్, కాంగ్రెస్ నేత పవన్ ఖేరా, డాక్టర్ సుధాన్షు త్రివేది, పార్థ్ అజిత్ పవార్, ఉజ్వల్ నికమ్, నరేష్ బన్సల్ తదితరులకు చోటు దక్కింది.

మొత్తంగా 21 మంది లోక్‌సభ సభ్యులు, 10 మంది రాజ్యసభ సభ్యులతో ఈ పార్లమెంటరీ డిఫెన్స్ ప్యానెల్ ఏర్పాటయింది. సైనిక సంక్షేమం, రక్షణ రంగ వ్యయం, సైన్యం ఆధునీకరణ తదితర అంశాల పరిశీలనలో ఈ కమిటీ అత్యంత కీలక పాత్ర పోషించనుంది.

BJP Lok Sabha MP from Bihar's Motihari, Radha Mohan Singh, appointed Chairperson of the Defence Committee of Parliament again. pic.twitter.com/VJJ1a0m8Zl

— ANI (@ANI) October 3, 2026