IndiGo Flight Emergency Landing Hyderabad | విమానంలో పేలిన పవర్ బ్యాంక్.. హైదరాబాద్‌లో ఇండిగో ఫ్లైట్ అత్యవసర ల్యాండింగ్

IndiGo Flight Emergency Landing Hyderabad | త్రినేత్ర న్యూస్ : ఢిల్లీ నుంచి చెన్నై బయలుదేరిన ఇండిగో విమానంలో ఆదివారం ఊహించని ప్రమాదం తప్పింది. విమాన ప్రయాణ సమయంలో ఓ ప్రయాణీకుడికి చెందిన పవర్ బ్యాంక్ ఓవర్‌హీట్ అయి పేలడంతో లగేజ్ కంపార్ట్‌మెంట్‌లో మంటలు చెలరేగాయి. ఈ ఘటనతో ప్రయాణీకులు తీవ్ర భయాందోళనకు గురయ్యారు. అయితే అప్రమత్తమైన సిబ్బంది, పైలట్ చూపిన సమయస్ఫూర్తితో పెను ప్రమాదం తప్పింది. విమానాన్ని హైదరాబాద్‌లోని శంషాబాద్ ఎయిర్‌పోర్టులో అత్యవసరంగా ల్యాండ్ చేశారు.

ఇండిగో విమానం (ఫ్లైట్ నంబర్ 6E 6115) ఢిల్లీ నుంచి చెన్నైకి బయలుదేరిన కొద్దిసేపటి తర్వాత ఈ ఘటన చోటుచేసుకుంది.

ప్రయాణికుల భయానక వీడియో వైరల్

లగేజ్ కంపార్ట్‌మెంట్‌లో మంటలు చెలరేగిన సమయంలో తోటి ప్రయాణీకులు తీవ్ర భయానికి గురయ్యారు. కొంతమంది ప్రయాణీకులు తమ బ్యాగులతో మంటలను ఆర్పడానికి ప్రయత్నించిన భయానక దృశ్యాలు మొబైల్ ఫోన్లలో రికార్డయ్యాయి. ప్రస్తుతం ఈ వీడియో సోషల్ మీడియాలో వైరల్ అవుతోంది.

అప్రమత్తమైన క్రూ.. సురక్షిత ల్యాండింగ్

పరిస్థితిని గమనించిన క్యాబిన్ క్రూ వెంటనే అప్రమత్తమై ఫైర్ ఎక్స్‌టింగూషర్ సహాయంతో మంటలను పూర్తిగా అదుపులోకి తెచ్చారు. ఏవైనా పెను ప్రమాదాలు మున్ముందు జరగకుండా ఉండేందుకు పైలట్ వెంటనే విమానాన్ని హైదరాబాద్‌లోని రాజీవ్ గాంధీ అంతర్జాతీయ విమానాశ్రయానికి (RGIA) మళ్లించారు. అక్కడ విమానం సురక్షితంగా ల్యాండ్ అయింది.

An IndiGo flight operating from Delhi to Chennai reportedly made an emergency landing at Rajiv Gandhi International Airport in Shamshabad after a passenger's 𝐩𝐨𝐰𝐞𝐫 𝐛𝐚𝐧𝐤 caught fire on board. The incident involved flight 6E6115, according to the sources.

#IndiGo #ShamshabadAirport #Powerbank

— Sudhakar Udumula (@sudhakarudumula) October 11, 2026

ఈ ఘటనలో ప్రయాణీకులు, సిబ్బంది అందరూ క్షేమంగా ఉన్నారని, ఎవరికీ ఎలాంటి గాయాలు కాలేదని ఎయిర్‌లైన్స్ వర్గాలు స్పష్టం చేశాయి. విమాన ప్రయాణాల్లో ఎలక్ట్రానిక్ గాడ్జెట్లు, పవర్ బ్యాంకుల వాడకంపై నిబంధనలను మరింత కఠినతరం చేయాల్సిన అవసరం ఉందనే అభిప్రాయం వ్యక్తమవుతోంది.

Also Read | కాళ్లకు ఇనుప గొలుసులు కట్టి తాళం.. నదిలో నవ దంపతుల శవాలు: అసలేం జరిగింది?