Bharat Taxi | ర్యాపిడో, ఉబెల్, ఓలాకి షాక్.. జనవరి 1 నుంచి భారత్ ట్యాక్సీ వచ్చేస్తోంది

ఓలా, ఉబెల్, ర్యాపిడో.. ఇవి బైక్, ఆటో, కారు టాక్సీలు. నగరాల్లో ఇవి లేకుంటే పూట గడవదు. పబ్లిక్ ట్రాన్స్పోర్ట్లో వెళ్లలేని వాళ్లకు ఈ క్యాబ్ టాక్సీ యాప్స్ సుపరిచితమే. కానీ.. ఈ టాక్సీ యాప్స్ కమిషన్ ఎక్కువగా తీసుకుంటాయి. అందుకే వీటిని ఉపయోగించి ప్రయాణం చేయడానికి కొందరు కస్టమర్లు భయపడుతున్నారు. అందులోనూ వీటిపై ఎలాంటి నియంత్రణ లేదు. ప్రభుత్వాలు కూడా ఈ యాప్స్ను పట్టించుకోకపోవడం వల్ల ఆయా యాప్స్ తమకు నచ్చినట్లుగా వినియోగదారుల నుంచి ఫేర్ వసూలు చేస్తున్నాయి. అందుకే కేంద్రం ఈ విషయంలో ముందడుగు వేసి దేశీయ టాక్సీ యాప్ భారత్ టాక్సీని లాంచ్ చేయబోతోంది. జనవరి 1, 2026 నుంచి ఈ టాక్సీ యాప్ ప్రజలకు అందుబాటులోకి రానుంది. ప్రస్తుతం ఢిల్లీలో ఈ యాప్ను లాంచ్ చేస్తారు. ఆ తర్వాత గుజరాత్, అనంతరం దేశంలోని 20 నగరాల్లో ఈ యాప్ను కేంద్రం ప్రారంభించనుంది. జీరో కమిషన్ మోడల్ దీని ప్రత్యేకత ఈ యాప్ ద్వారా రైడ్ బుక్ చేసుకుంటే వినియోగదారుడు ఎలాంటి కమిషన్ చెల్లించాల్సిన అవసరం ఉండదు. సాధారణంగా ఆ రైడ్కి ఎంత చార్జ్ అయితే అంత చెల్లించాలి. అలాగే రైడర్గా ఈ యాప్ ద్వారా రిజిస్టర్ చేసుకున్న వాళ్లు యాప్ యాజమాన్యానికి ఎలాంటి కమిషన్ చెల్లించాల్సిన అవసరం ఉండదు. కార్లు, ఆటోలు, బైక్స్ ఈ యాప్ ద్వారా అందుబాటులో ఉంటాయి. రాత్రి పూట అయినా, డిమాండ్ ఎక్కువగా ఉన్న సమయంలో అయినా సరే.. ఈ యాప్ ద్వారా ఎలాంటి అదనపు రుసుము చెల్లించాల్సిన అవసరం ఉండదు. ఈ టాక్సీ యాప్ను సహకార్ టాక్సీ కోఆపరేటివ్ లిమిటెడ్ ఆధ్వర్యంలో ఆపరేట్ చేయనున్నారు. 56 వేల రిజిస్ట్రేషన్లు ఇప్పటికే ఈ యాప్లో 56 వేల మంది డ్రైవర్లు రిజిస్టర్ చేసుకున్నారు. ఈ యాప్ ద్వారా డ్రైవర్లకు ఎక్కువ ఆదాయం వస్తుందని, ఒక రైడ్ పూర్తి కాగానే 80 శాతం ఫేర్ నేరుగా డ్రైవర్లకే వెళ్తుందని, ప్రైవేట్ టాక్సీ యాప్స్ కంటే కూడా ఈ యాప్ ద్వారా చాలా బెటర్గా పని చేసే పరిస్థితులు ఉంటాయని తెలుస్తోంది.