RTC Driver Suicide Attempt | ఆర్టీసీ సమ్మెలో విషాదం: నర్సంపేటలో డ్రైవర్ ఆత్మహత్యాయత్నం.. ఎంజీఎంకు తరలింపు

RTC Driver Suicide Attempt | త్రినేత్ర.న్యూస్ : తెలంగాణ రాష్ట్రంలో తమ డిమాండ్ల సాధన కోసం ఆర్టీసీ కార్మికులు చేస్తున్న సమ్మె తీవ్ర కలకలం రేపుతోంది. గత రెండు రోజులుగా రాష్ట్రవ్యాప్తంగా నిరసనలు, ధర్నాలు జరుగుతున్నప్పటికీ ప్రభుత్వం నుంచి ఎలాంటి స్పందన రాకపోవడంతో ఓ కార్మికుడు బలవన్మరణానికి యత్నించడం రాష్ట్రవ్యాప్తంగా సంచలనంగా మారింది.

బస్టాండ్ ఎదుటే ఒంటిపై పెట్రోల్ పోసుకుని..

వరంగల్ జిల్లా నర్సంపేట ఆర్టీసీ డిపోలో బస్సు డ్రైవర్‌గా పనిచేస్తున్న కోలా శంకర్ గౌడ్.. గత రెండు రోజులుగా తోటి కార్మికులతో కలిసి సమ్మెలో చురుగ్గా పాల్గొంటున్నారు. ఆర్టీసీని ప్రభుత్వంలో విలీనం చేయకపోవడం, తమ సమస్యల పరిష్కారం పట్ల ప్రభుత్వం స్పష్టమైన హామీ ఇవ్వకపోవడంతో ఆయన తీవ్ర మనస్తాపానికి గురయ్యారు. ఈ క్రమంలోనే గురువారం నర్సంపేట బస్టాండ్ ఎదురుగా తన వెంట తెచ్చుకున్న పెట్రోల్ ఒంటిపై పోసుకుని నిప్పంటించుకున్నాడు.

ఎంజీఎంలో అత్యవసర చికిత్స

మంటల్లో కాలిపోతున్న శంకర్ గౌడ్‌ను చూసిన వెంటనే అక్కడున్న తోటి ఆర్టీసీ సిబ్బంది స్పందించారు. మంటలను ఆర్పి, ప్రాణాపాయ స్థితిలో ఉన్న ఆయనను హుటాహుటిన వరంగల్ ఎంజీఎం ఆస్పత్రికి తరలించారు. పెట్రోల్ పోసుకుని నిప్పంటించుకోవడంతో శంకర్ గౌడ్ తీవ్ర గాయాల పాలయ్యారు. ప్రస్తుతం ఎంజీఎం డాక్టర్లు ఆయనకు అత్యవసర చికిత్స అందిస్తున్నారు. పరిస్థితి విషమంగా ఉన్నట్లు సమాచారం.

కట్టలు తెంచుకున్న కార్మికుల ఆగ్రహం

నిరసనలు చేస్తున్నా రాష్ట్ర ప్రభుత్వం కనీసం పట్టించుకోవడం లేదన్న ఆవేదనతోనే తమ తోటి కార్మికుడు ఆత్మహత్యాయత్నం చేశాడని ఆర్టీసీ సంఘాలు మండిపడుతున్నాయి. ఈ ఘటనతో సమ్మె చేస్తున్న ఆర్టీసీ కార్మికులు మరింత ఆగ్రహానికి గురవుతున్నారు.

ఇప్పటికే గత రెండు రోజులుగా పలు ప్రాంతాల్లో పోలీసులకు, ఆర్టీసీ సిబ్బందికి మధ్య తీవ్ర వాగ్వాదాలు, ఉద్రిక్త పరిస్థితులు నెలకొన్నాయి. కొన్ని చోట్ల పోలీసులు అత్యుత్సాహం ప్రదర్శిస్తూ నిరసనకారులను అడ్డుకుంటున్న వీడియోలు సోషల్ మీడియాలో వైరల్ అవుతుండటంతో ప్రభుత్వంపై, పోలీసుల తీరుపై తీవ్ర విమర్శలు వెల్లువెత్తుతున్నాయి. డ్రైవర్ ఆత్మహత్యాయత్నం ఘటనతో సమ్మె మరింత ఉధృతం అయ్యే అవకాశాలు కనిపిస్తున్నాయి.