Telangana RTC Strike 2026 | ఆత్మబలిదానాలు వద్దు.. ఆ పార్టీల ట్రాప్‌లో పడొద్దు: ఆర్టీసీ కార్మికులకు మంత్రి కోమటిరెడ్డి విజ్ఞప్తి

Telangana RTC Strike 2026 | త్రినేత్ర.న్యూస్ : రాష్ట్రవ్యాప్తంగా ఉధృతంగా సాగుతున్న ఆర్టీసీ సమ్మె, నర్సంపేట డిపో డ్రైవర్ ఆత్మహత్యాయత్నం ఘటనలపై రాష్ట్ర మంత్రి కోమటిరెడ్డి వెంకట్ రెడ్డి స్పందించారు. సచివాలయంలో ఆయన మీడియాతో మాట్లాడుతూ.. సమ్మె చేస్తున్న కార్మికులకు కీలక విజ్ఞప్తి చేశారు. ప్రాణాలు చాలా విలువైనవని, ఆవేశపడి ఆత్మబలిదానాలకు పాల్పడవద్దని ఆయన కోరారు. ఒక బాధ్యతాయుతమైన సీనియర్ మంత్రిగా, తెలంగాణ ఉద్యమకారుడిగా కార్మికులు మరోసారి ఆలోచించుకోవాలని విజ్ఞప్తి చేశారు.

రాజకీయ లబ్ధి కోసం రెచ్చగొడుతున్నారు.. అప్రమత్తంగా ఉండండి

ప్రతిపక్ష పార్టీల తీరుపై మంత్రి కోమటిరెడ్డి తీవ్ర స్థాయిలో మండిపడ్డారు. "కొంత మంది నాయకులు తమ రాజకీయ లబ్ధి కోసం అమాయక కార్మికులను రెచ్చగొడుతున్నారు. వారి పట్ల మీరు అప్రమత్తంగా ఉండాలి. తెలంగాణ ఉద్యమంలో మనం అందరం కలిసి కొట్లాడాం. కానీ, తెలంగాణ వచ్చాక గత ప్రభుత్వంలో (బీఆర్ఎస్) ఆర్టీసీ కార్మికులు 58 రోజుల పాటు సమ్మె చేశారు. ఆ ఆందోళనల్లో ఏకంగా 36 మంది కార్మికులు ప్రాణాలు కోల్పోయారు. అయినా అప్పటి ప్రభుత్వం కనీసం పట్టించుకోలేదు," అని గత పాలకుల తీరును ఎండగట్టారు.

ఆర్టీసీ బలోపేతానికే మా కృషి.. పది వేల కోట్లు ఇచ్చాం

కాంగ్రెస్ ప్రభుత్వం ఏర్పడిన నాటి నుంచి సంస్థను బలోపేతం చేసే దిశగా అడుగులు వేస్తోందని మంత్రి తెలిపారు. ముఖ్యమంత్రి రేవంత్ రెడ్డి నాయకత్వంలో ఆర్టీసీని మరింత బలోపేతం చేసేందుకు నిరంతరం పనిచేస్తున్నామని చెప్పారు. తమది ప్రజా ప్రభుత్వమని, ప్రజల సంక్షేమం, సమస్యల పరిష్కారం కోసమే ఈ ప్రభుత్వం పనిచేస్తుందని స్పష్టం చేశారు. అధికారంలోకి వచ్చిన వెంటనే కాంగ్రెస్ ప్రభుత్వం ఆర్టీసీకి ఏకంగా రూ. 10,000 కోట్లు చెల్లించి ఆదుకుందని గుర్తు చేశారు.

ఉచిత ప్రయాణం మీ వల్లే సక్సెస్

రాష్ట్ర ప్రభుత్వం ప్రతిష్టాత్మకంగా ప్రవేశపెట్టిన 'మహిళలకు ఉచిత బస్సు ప్రయాణం' పథకం విజయవంతం కావడంలో ఆర్టీసీ కార్మికుల శ్రమ ఎంతో ఉందని మంత్రి కోమటిరెడ్డి కొనియాడారు. వారి సహకారం వల్లే ఈ పథకం ద్వారా లక్షలాది మంది మహిళలు లబ్ధి పొందుతున్నారని ప్రశంసించారు.

శంకరయ్య గౌడ్ త్వరగా కోలుకోవాలి

డిమాండ్ల సాధన కోసం నర్సంపేటలో ఒంటిపై పెట్రోల్ పోసుకుని ఆత్మహత్యాయత్నానికి పాల్పడిన బస్సు డ్రైవర్ శంకరయ్య గౌడ్ త్వరగా కోలుకోవాలని మంత్రి కోమటిరెడ్డి ఆకాంక్షించారు. ఆర్టీసీ కార్మికులకు ప్రజా ప్రభుత్వం ఎల్లప్పుడూ పూర్తి అండగా ఉంటుందని, ఆందోళన విడిచిపెట్టి ప్రభుత్వంతో సహకరించాలని కోరారు.