Telangana RTC strike 2026 | సమ్మె బాట వీడండి.. లేదంటే కఠిన చర్యలు తప్పవు: ఆర్టీసీ కార్మికులకు టీజీఎస్‌ఆర్టీసీ హెచ్చరిక

Telangana RTC strike 2026 | త్రినేత్ర.న్యూస్ : తెలంగాణ రాష్ట్ర రోడ్డు రవాణా సంస్థ (TGSRTC) లో సమ్మె సైరన్ మోగిన వేళ యాజమాన్యం కీలక ప్రకటన విడుదల చేసింది. కార్మికులు సమ్మెను తక్షణమే విరమించుకోవాలని, సోషల్ మీడియాలో వచ్చే మాయ మాటలను, అనధికారిక పిలుపులను నమ్మవద్దని టీజీఎస్‌ఆర్టీసీ వైస్ ఛైర్మన్ అండ్ మేనేజింగ్ డైరెక్టర్ (VC & MD) వై. నాగిరెడ్డి, IPS విజ్ఞప్తి చేశారు.

సమ్మె చేస్తే చట్టరీత్యా నేరమే

పారిశ్రామిక వివాదాల చట్టం-1947 (Industrial Disputes Act, 1947) ప్రకారం సమ్మెలో పాల్గొనడం చట్టవిరుద్ధమని యాజమాన్యం స్పష్టం చేసింది. వివిధ కార్మిక సంఘాలు ఇచ్చిన సమ్మె నోటీసుల నేపథ్యంలో, ఇప్పటికే ఐఏఎస్ అధికారులతో కూడిన కమిటీ ద్వారా చర్చల ప్రక్రియ ప్రారంభమైందని తెలిపింది. "జాయింట్ కమిషనర్ ఆఫ్ లేబర్" వద్ద ఈ వివాదంపై ప్రస్తుతం చర్చలు కొనసాగుతున్నాయని, ఈ తరుణంలో చట్టంలోని సెక్షన్ 22(1)(d) ప్రకారం సమ్మెకు దిగడం చట్టరీత్యా ఏమాత్రం చెల్లదని అధికారులు తేల్చి చెప్పారు.

వేతన కోత.. కఠిన చర్యలు

నిబంధనలు ఉల్లంఘించి చట్టవిరుద్ధమైన సమ్మెలో పాల్గొంటే తీవ్ర పరిణామాలు ఎదుర్కోవాల్సి వస్తుందని యాజమాన్యం కార్మికులను హెచ్చరించింది. సమ్మెలో పాల్గొని విధులకు హాజరుకాని సిబ్బందికి "వేతన కోత" (Pay cut) విధించడంతో పాటు, ఉద్యోగ నిబంధనల ప్రకారం కఠినమైన క్రమశిక్షణా చర్యలు తీసుకుంటామని స్పష్టం చేసింది. ఇలాంటి చర్యల వల్ల కార్మికుల భవిష్యత్తుతో పాటు, వారి కుటుంబాలపై తీవ్ర ప్రభావం పడే అవకాశం ఉందని ఆవేదన వ్యక్తం చేసింది.

సమస్యల పరిష్కారానికి సిద్ధం

ప్రయాణికులకు సురక్షితమైన సేవలు అందించడమే సంస్థ ప్రథమ కర్తవ్యమని, సంస్థ ప్రతిష్ఠను కాపాడాల్సిన బాధ్యత అందరిపైనా ఉందని ఎండీ నాగిరెడ్డి గుర్తుచేశారు. "సంస్థ, కార్మికుల సంక్షేమం దృష్ట్యా, చర్చల ద్వారా సమస్యలను పరిష్కరించుకోవడానికి యాజమాన్యం ఎల్లప్పుడూ సిద్ధంగా ఉంది. దయచేసి యూనియన్ నాయకులు లేదా సోషల్ మీడియాలో వచ్చే అనధికారిక పిలుపులను నమ్మి మోసపోవద్దు. సమ్మెను విరమించుకుని కార్మికులంతా యథావిధిగా విధులకు హాజరు కావాలి" అని ఆయన పిలుపునిచ్చారు.

ప్రజల రవాణా సౌకర్యానికి ఎలాంటి ఆటంకం కలగకుండా నిరంతరాయంగా బస్సులను నడిపి సంస్థను కాపాడుకుందామని కార్మికులకు టీజీఎస్‌ఆర్టీసీ యాజమాన్యం హితవు పలికింది.