Harish Rao – Peddi Sudarshan Reddy | నా ప్రాణాలు కాపాడిన చేతులే విగతజీవిగా.. ఆనాటి ఘటన తలచుకొని కన్నీరుమున్నీరైన హరీశ్ రావు

Harish Rao - Peddi Sudarshan Reddy | త్రినేత్ర.న్యూస్ : మాజీ మంత్రి, బీఆర్ఎస్ సీనియర్ నాయకుడు హరీశ్ రావు కన్నీటి పర్యంతమయ్యారు. ఉమ్మడి వరంగల్ జిల్లా నల్లబెల్లిలో జరిగిన నర్సంపేట మాజీ ఎమ్మెల్యే పెద్ది సుదర్శన్ రెడ్డి దశదిన కర్మ, సంస్మరణ సభకు హాజరైన ఆయన.. సుదర్శన్ రెడ్డితో తనకున్న పాతికేళ్ల అనుబంధాన్ని గుర్తుచేసుకుంటూ తీవ్ర భావోద్వేగానికి లోనయ్యారు. తన ప్రాణాలు కాపాడిన మిత్రుడిని, చివరికి అదే హాస్పిటల్‌లో విగతజీవిగా చూడాల్సి వస్తుందని కలలో కూడా ఊహించలేదంటూ గద్గద స్వరంతో మాట్లాడారు.

ఆ హాస్పిటల్.. ఆ పాత జ్ఞాపకం..

"మొన్న పెద్ది హాస్పిటల్‌లో పడితే నేను, కేటీఆర్ గారు ఆగమేఘాల మీద పరిగెత్తుకుంటూ వెళ్లాం. ఆ హాస్పిటల్ చూడగానే నాకొక పాత జ్ఞాపకం గుర్తొచ్చింది. ఉద్యమ సమయంలో వరంగల్ లోని అమరవీరుల స్థూపం వద్ద పోలీసులతో జరిగిన ఘర్షణలో నేను డీసీఎం (DCM) పైనుంచి కింద పడిపోయాను. ఆ రోజు సుదర్శన్ రెడ్డి నన్ను పట్టుకోకపోతే నేరుగా భూమి మీద పడేవాడిని. నన్ను ఆయన పట్టుకుని, వెంటనే హాస్పిటల్‌కు తీసుకువెళ్లి ప్రాణాలు కాపాడాడు. నాడు ఏ హాస్పిటల్‌లో అయితే నన్ను చేర్పించాడో, పాపం సుదర్శన్ రెడ్డి చివరి దశలో అదే హాస్పిటల్‌లో ఉన్నాడు. నేను ఆయనను అక్కడే చివరి చూపు చూస్తానని కలలో కూడా అనుకోలేదు" అని హరీశ్ రావు కన్నీరు పెట్టుకున్నారు.

నర్సంపేట అభివృద్ధికి కేరాఫ్ అడ్రస్

తెలంగాణ కోసం ప్రాణాలు, ఆస్తులు లెక్కచేయకుండా పోరాడిన గొప్ప ఉద్యమకారుడు పెద్ది సుదర్శన్ రెడ్డి అని హరీశ్ రావు కొనియాడారు. మానుకోట సంఘటన నుంచి పరకాల, స్టేషన్ ఘనపూర్ ఉపఎన్నికల వరకు ప్రతి పోరాటంలో ఆయన ముందున్నారని గుర్తుచేశారు. ఎమ్మెల్యేగా ఓడిపోయినా.. ఆయన పోరాట స్ఫూర్తిని మెచ్చిన కేసీఆర్ క్యాబినెట్ ర్యాంక్‌తో సివిల్ సప్లైస్ కార్పొరేషన్ ఛైర్మన్‌గా అవకాశం ఇచ్చారని తెలిపారు.

నర్సంపేట అభివృద్ధి పట్ల ఆయనకున్న తపన అసాధారణమైనదన్నారు. ముఖ్యంగా కేసీఆర్‌ని ఒప్పించి రామప్ప, పాకాల, లక్నవరం చెరువులకు దేవాదుల జలాలు సాధించిన ఘనత ఆయనదే అని స్పష్టం చేశారు. అలాగే, జిల్లా కేంద్రం కాని చోట మెడికల్ కాలేజీ (Medical College) సాధించిన ఏకైక నియోజకవర్గం నర్సంపేట మాత్రమేనని, ఇదంతా సుదర్శన్ రెడ్డి కృషే అని ప్రశంసించారు.

కేసీఆర్‌కు ఆయనంటే అపారమైన ప్రేమ

పెద్ది సుదర్శన్ రెడ్డి ప్రాణాలు కాపాడేందుకు అమెరికా, లండన్ నుంచి డాక్టర్లను రప్పించడానికి ఎంత ఖర్చయినా పర్వాలేదని కేసీఆర్ చెప్పారని హరీశ్ రావు వెల్లడించారు. భౌతికంగా ఆయన మన మధ్య లేకపోయినా.. ఆయన జ్ఞాపకాలు ఎప్పటికీ పదిలమేనన్నారు. సుదర్శన్ రెడ్డి కుటుంబానికి, నర్సంపేట ప్రజలకు కేసీఆర్, బీఆర్ఎస్ పార్టీ ఎల్లప్పుడూ అండగా ఉంటుందని హరీశ్ రావు భరోసా ఇచ్చారు.

పెద్ది సుదర్శన్ రెడ్డి గారి ఉద్యమ పోరాటాలు, ప్రజాసేవలు ఎప్పటికీ చిరస్మరణీయం.

తెలంగాణ ఉద్యమ సమయంలో వరంగల్‌లోని అమర వీరుల స్తూపం వద్ద పోలీసులతో జరిగిన ఘర్షణలో నాకు దెబ్బ తగిలినప్పుడు..
నన్ను ఆసుపత్రికి తీసుకెళ్లిన పెద్ది సుదర్శన్ రెడ్డి గారిని, అదే ఆసుపత్రిలో చివరి చూపు చూస్తానని… pic.twitter.com/j7c3Xlx5DN

— BRS Party (@BRSparty) August 10, 2026