Viral Post | ఎస్‌బీఐ పీవో నెల జీతం రూ.1.25 లక్షలు.. సోషల్ మీడియాలో వైరల్‌గా మారిన శాలరీ స్లిప్

Viral Post | సాధారణంగా బ్యాంకుల్లో ఉద్యోగం అంటే భద్రతతో పాటు మంచి జీతం ఉంటుందని అందరికీ తెలుసు. అయితే, ఎస్‌బీఐలో ప్రొబేషనరీ ఆఫీసర్ (PO)గా చేరిన కొద్ది కాలంలోనే ఇంత భారీ స్థాయిలో జీతం ఉంటుందని మాత్రం చాలా మంది ఊహించలేరు. ఎస్‌బీఐ పీవోగా పనిచేస్తున్న శ్వేత అనే యువతి తన ఇన్‌స్టాగ్రామ్ ఖాతాలో తన శాలరీ వివరాలను పంచుకున్నారు. ఆమె వెల్లడించిన వివరాల ప్రకారం.. నెలకు చేతికి వచ్చే జీతం రూ. 95,000 కాగా, లీజు రెంటల్ రూ. 18,500, ఇతర అలవెన్సులు సుమారు రూ. 11,000 వరకు వస్తాయట. అంటే, అన్ని అలవెన్సులు కలుపుకుంటే ఆమె నెలకు దాదాపు రూ. 1.25 లక్షల వరకు సంపాదిస్తున్నారు.

ఇంత భారీ జీతం ఎలా సాధ్యం?

రెండున్నర ఏళ్ల సర్వీసులోనే రూ. 95,000 జీతం ఎలా వస్తుందని నెటిజన్లు ఆశ్చర్యం వ్యక్తం చేయగా, శ్వేత దానికి క్లారిటీ ఇచ్చారు. ఆమెకు లభిస్తున్న ఐదు ఇంక్రిమెంట్లు ఈ భారీ వేతనానికి ప్రధాన కారణం. ఇందులో రెండు వార్షిక ఇంక్రిమెంట్లు కాగా, మిగిలిన మూడు ఇంక్రిమెంట్లు ఆమె బ్యాంకింగ్ ప్రొఫెషనల్ సర్టిఫికేషన్లు అయిన JAIIB, CAIIB పరీక్షలలో ఉత్తీర్ణత సాధించినందుకు లభించాయి.

సోషల్ మీడియాలో చర్చ

ఈ వీడియోపై నెటిజన్ల నుంచి భిన్నాభిప్రాయాలు వ్యక్తమవుతున్నాయి. బ్యాంకింగ్ పరీక్షలకు సిద్ధమయ్యే అభ్యర్థులు దీనిని "గ్రేట్ మోటివేషన్" అని అంటుండగా, మరికొందరు బ్యాంకింగ్ రంగంలో ఉండే విపరీతమైన పని ఒత్తిడిని గుర్తు చేస్తున్నారు. "జీతం బాగున్నా.. ఉదయం నుంచి రాత్రి వరకు ఉండే పని భారం, టార్గెట్లు మానసిక ప్రశాంతతను దెబ్బతీస్తాయి" అని కొందరు కామెంట్ చేస్తున్నారు.

మొత్తానికి, బ్యాంక్ ఉద్యోగాల్లో కేవలం జీతమే కాదు, నిరంతరం నేర్చుకుంటూ పరీక్షలు రాస్తే వేగంగా ఆర్థిక వృద్ధి సాధించవచ్చని శ్వేత ఉప్పల్ వీడియో నిరూపిస్తోంది.