MrBeast | రూ.9 కోట్ల కోసం.. మొత్తం గ్రాసరీ స్టోర్ తినేయాలట..

MrBeast | యూట్యూబ్ క్రియేటర్ జిమ్మీ డొనాల్డ్‌సన్ మిస్టర్‌బీస్ట్ గా ప్రపంచవ్యాప్తంగా గుర్తింపు పొంద‌గా, తాజాగా మరో భారీ ఛాలెంజ్‌తో ప్రేక్షకుల ముందుకు వచ్చాడు. ఈసారి ఏకంగా ఒక పూర్తి గ్రాసరీ స్టోర్‌లోని ఆహారాన్ని తినే పోటీని నిర్వహిస్తూ, విజేతకు 10 లక్షల డాలర్లు అంటే భారత కరెన్సీలో సుమారు రూ.9 కోట్లకు పైగా నగదు బహుమతిని అందించనున్న‌ట్లు ప్ర‌క‌టించాడు. మిస్టర్‌బీస్ట్ ఈట్ ఎవ్రీథింగ్ ఇన్ ఎ గ్రాసరీ స్టోర్ విన్ 1,000,000 డాలర్స్ పేరుతో రూపొందించిన ఓ వీడియోను ప్రకటించారు. ఈ వీడియో శనివారం ప్రీమియర్ కానుంది. సాధారణ యూట్యూబ్ ఛాలెంజ్‌లా కాకుండా దీన్ని ఒక మినీ మూవీగా రూపొందిస్తున్నట్లు మిస్టర్‌బీస్ట్ తెలిపాడు.

విజేత‌కు 10 ల‌క్షల డాల‌ర్లు..

ఈ ఛాలెంజ్‌కు సంబంధించిన ప్రచార చిత్రాల్లో పూర్తిగా సరుకులతో నిండిన గ్రాసరీ స్టోర్, పండ్లు, కూరగాయలతో నింపిన భారీ బ్యారెల్స్, నగదుతో నిండిన భారీ షాపింగ్ కార్ట్ కనిపిస్తున్నాయి. అయితే పోటీలో ఎంత మంది పాల్గొంటారు, పూర్తి నియమాలు ఏమిటన్న విషయాన్ని ఇంకా వెల్లడించలేదు. ప్రధానంగా పోటీదారులు స్టోర్‌లోని వీలైనంత ఎక్కువ ఆహారాన్ని తినాల్సి ఉంటుంది. ఈ పోటీలో విజేతకు 10 లక్షల డాలర్ల బహుమతి లభిస్తుంది. మిస్టర్‌బీస్ట్‌కు భారీ గుర్తింపు తెచ్చిన ఫార్ములానే ఈ కొత్త ప్రాజెక్ట్‌లోనూ కొనసాగిస్తున్నాడు. భారీ నగదు బహుమతులను అసాధారణమైన శారీరక, మానసిక, సహన పరీక్షలతో కలిపి ప్రేక్షకులను ఆకట్టుకోవడం అత‌ని వీడియోల ప్రత్యేకతగా మారింది.

గ‌తంలోనూ అనేక పోటీలు..

గతంలో కూడా మిస్టర్‌బీస్ట్ మిలియన్ డాలర్లతో అనేక విభిన్న పోటీలను నిర్వహించాడు. 50 యూట్యూబర్స్, స్ట్రీమర్స్ ఫైట్ ఫర్ 1,000,000 డాలర్స్, 30 సెలబ్రిటీస్ ఫైట్ ఫర్ 1,000,000 డాలర్స్, ఐ హిడెన్ 1,000,000 డాలర్స్ ఇన్ దిస్ వాల్ట్ వంటి వీడియోలు భారీగా ప్రేక్షకులను ఆకట్టుకున్నాయి. అత‌ను నిర్వహించిన క్రియేటర్ పోటీల్లో ఎలిమినేషన్ రౌండ్లు కూడా ఉంటాయి. చివరికి ఒక్క విజేత మాత్రమే మిగిలేలా పోటీని రూపొందిస్తాడు. 50 మంది క్రియేటర్లతో నిర్వహించిన మిలియన్ డాలర్ల పోటీలో ప్రపంచంలోని ప్రముఖ ఆన్‌లైన్ వ్యక్తులు పాల్గొన్నారు. వారిని భారీ పారదర్శక క్యూబ్‌లో ఉంచి పలు రౌండ్లలో పోటీ నిర్వహించారు. చివరికి విజేతకు లభించిన 10 లక్షల డాలర్లను తన సబ్‌స్క్రైబర్లకు అందించే అవకాశం కల్పించాడు.

రూ.2.2 ల‌క్ష‌ల కోట్ల సంప‌ద‌..

మిస్టర్‌బీస్ట్ ప్రత్యేకత కేవలం భారీ నగదు బహుమతులకే పరిమితం కాదు. అత‌ని వీడియోల్లో భారీ సెట్లు, భారీ స్థాయి వస్తువులు, విస్తృత నిర్మాణాలు, సినిమాటిక్ స్థాయి చిత్రీకరణను ఉపయోగిస్తుంటారు. దీంతో సాధారణ ఛాలెంజ్‌లను కూడా భారీ వినోద కార్యక్రమాలుగా మార్చడంలో విజయవంతమయ్యారు. అత‌నికి ఉన్న భారీ ఆన్‌లైన్ ఫాలోయింగ్ కూడా ఇలాంటి భారీ నిర్మాణాలకు ప్రధాన కారణంగా నిలుస్తోంది. మిస్టర్‌బీస్ట్ ప్రధాన యూట్యూబ్ ఛానల్‌కు సుమారు 51.8 కోట్ల మంది సబ్‌స్క్రైబర్లు ఉన్నారు. సెలబ్రిటీ నెట్ వర్త్ అంచనా ప్రకారం అత‌ని సంపద సుమారు 260 కోట్ల డాలర్లు, అంటే దాదాపు రూ.2.2 లక్షల కోట్లకు పైగానే ఉంటుంది.

చిన్న క్రియేట‌ర్ల‌కు సైతం గుర్తింపు..

చిన్న క్రియేటర్లకు కూడా భారీ గుర్తింపు తీసుకురావడంలో మిస్టర్‌బీస్ట్ ప్రభావం కనిపించింది. 2020 సెప్టెంబర్‌లో అత‌ను ఓ చిన్న యూట్యూబ్ ఛానల్‌కు ప్రత్యేకంగా ప్రస్తావన ఇవ్వగా, ఆ ఛానల్‌కు కేవలం 24 గంటల్లోనే 10 లక్షలకు పైగా సబ్‌స్క్రైబర్లు పెరిగారు. భారీ బడ్జెట్ నిర్మాణంతోపాటు రూ.9 కోట్లకు పైగా విలువైన బహుమతిని ప్రకటించిన ఈ తాజా గ్రాసరీ స్టోర్ ఛాలెంజ్ ఇప్పుడు ఆసక్తిని రేకెత్తిస్తోంది. చివరకు పోటీదారులు నిజంగానే ఒక పూర్తి గ్రాసరీ స్టోర్‌లోని ఆహారాన్ని తినగలరా? అన్నదే ఈ వీడియోలో అసలు ఆసక్తికరమైన ప్రశ్నగా మారింది.