YouTube | యూట్యూబ్, గూగుల్ సెర్చ్ సేవల్లో అంతరాయం.. వినియోగదారులకు ఇబ్బందులు..

YouTube | ప్రముఖ వీడియో స్ట్రీమింగ్ వేదిక యూట్యూబ్, యూట్యూబ్ మ్యూజిక్, గూగుల్ సెర్చ్ సేవల్లో అంతరాయం ఏర్పడినట్లు వినియోగదారులు ఫిర్యాదు చేశారు. సమస్యను పరిష్కరించేందుకు తమ సాంకేతిక బృందం పనిచేస్తోందని యూట్యూబ్ అధికారికంగా వెల్లడించింది.

స‌మ‌స్య ఎప్పుడు మొదలైంది..?

యూట్యూబ్ సేవల్లో సమస్యలు తలెత్తడంతో పలువురు వినియోగదారులు వీడియోలను వీక్షించ‌లేకపోయారు. సేవల అంతరాయాలను గుర్తించే డౌన్‌డిటెక్టర్ ప్రకారం, భార‌త కాల‌మానం ప్ర‌కారం బుధ‌వారం రాత్రి 8.22 గంటలకు యూట్యూబ్ పనిచేయడం లేదంటూ 28 ఫిర్యాదులు నమోదయ్యాయి. రాత్రి 8.52 గంటల సమయంలో మరోసారి 23 ఫిర్యాదులతో సమస్యల తీవ్రత కనిపించింది. అంతకుముందు రోజు ఉదయం నుంచే ఈ సమస్యలపై ఫిర్యాదులు రావడం ప్రారంభమయ్యాయి. అమెరికా పసిఫిక్‌ కాలమానం ప్రకారం ఉదయం 7.30 గంటల నాటికి 5,100కు పైగా ఫిర్యాదులు నమోదైనట్లు జీడబ్ల్యూవైర్‌ పేర్కొంది. వినియోగదారుల్లో 42 శాతం మంది యూట్యూబ్‌ అప్లికేషన్‌లో, 34 శాతం మంది వీడియో స్ట్రీమింగ్‌లో, 15 శాతం మంది సర్వర్‌ కనెక్షన్‌లో సమస్యలు ఎదుర్కొన్నట్లు నివేదికలు వెల్లడించాయి.

వినియోగ‌దారులు ఏం ఫిర్యాదు చేశారు..?

యూట్యూబ్‌ అప్లికేషన్‌ లేదా వెబ్‌సైట్‌లో వీడియోలను ప్లే చేసేందుకు ప్రయత్నించినప్పుడు లోపం సంభవించింది, దయచేసి తర్వాత మళ్లీ ప్రయత్నించండి.. అనే సందేశం కనిపించినట్లు వినియోగదారులు తెలిపారు. పేజీని రిఫ్రెష్‌ చేయడం, అప్లికేషన్‌ను మూసి తిరిగి ప్రారంభించడం వంటి చర్యలు తీసుకున్నప్పటికీ సమస్య పరిష్కారం కాలేదని విండోస్‌ రిపోర్ట్‌ పేర్కొంది. తొలుత సమస్యను ఎదుర్కొంటున్న వినియోగదారులను సంప్రదించిన యూట్యూబ్‌.. వారు ఉపయోగిస్తున్న పరికరం, యాక్సెస్‌ చేస్తున్న విధానం గురించి వివరాలు కోరింది. కుకీలు, క్యాష్‌ను తొలగించడం, అప్లికేషన్‌ను తాజా వెర్షన్‌కు అప్‌డేట్‌ చేయడం, పేజీని రిఫ్రెష్‌ చేయడం వంటి సాధారణ పరిష్కారాలను కూడా సూచించింది.

యూట్యూబ్ ఏమ‌ని స‌మాధానం చెప్పింది..?

యూట్యూబ్ త‌న అధికారిక ఎక్స్‌ ఖాతా ద్వారా స్పందిస్తూ సేవలు లోడ్‌ కావడంలో సమస్యలు ఉన్నట్లు గుర్తించామని, వాటిని పరిష్కరించేందుకు ప్రయత్నిస్తున్నామని వెల్లడించింది. వీడియో అందుబాటులో లేదనే సందేశం కనిపించడం, వీడియోలు లోడింగ్‌ లేదా బఫరింగ్‌ దశలోనే నిలిచిపోవడం, వీడియో ప్లేయర్‌ కనిపించాల్సిన చోట నల్లని తెర రావడం వంటి సమస్యలు ఎదురవుతున్నాయని వివరించింది. పరిస్థితిపై మరింత సమాచారం అందిన వెంటనే అధికారిక సహాయ పేజీలో అప్‌డేట్లు ఇస్తామని పేర్కొంటూ వినియోగదారుల సహనానికి కృతజ్ఞతలు తెలిపింది. మరోవైపు యూట్యూబ్‌ ఇండియా అధిపతి ప్రకారం.. సృజనాత్మక దృష్టితో రూపొందించిన కృత్రిమ మేధస్సు కంటెంట్‌కు కూడా ఆదాయం పొందే అవకాశం ఉందన్న అంశంపై చర్చ కొనసాగుతున్న నేపథ్యంలో, ప్రస్తుతం ఈ సేవల అంతరాయం వినియోగదారుల దృష్టిని ఆకర్షించింది.