Jagannath Rath Yatra 2026 | జగన్నాథ రథయాత్ర: పూరీలోనే కాదు.. దేశంలో రథోత్సవం ఘనంగా జరిగే అద్భుత ప్రదేశాలివే!

Jagannath Rath Yatra 2026 | త్రినేత్ర.న్యూస్ : జగన్నాథ రథయాత్ర అనగానే మనందరికీ ముందుగా గుర్తొచ్చేది ఒడిశాలోని పూరీ (Puri). ప్రతి ఏడాది లక్షలాది మంది భక్తులు విశ్వాసంతో, భక్తితో ఈ వేడుకలో పాల్గొంటారు. అయితే, ఈ గ్రాండ్ ఫెస్టివల్ (Grand festival) కేవలం పూరీకే పరిమితం కాలేదు. భారతదేశంలోని మరికొన్ని నగరాలు, పట్టణాల్లో కూడా తమకంటూ ప్రత్యేకమైన సంప్రదాయాలతో రథయాత్రను ఘనంగా జరుపుకుంటారు. ఒకవేళ మీరు పూరీ కాకుండా ఇతర ప్రదేశాల్లో రథయాత్ర (Rath Yatra) ఎక్స్‌పీరియన్స్ పొందాలనుకుంటే.. ఈ ప్రాంతాలను మీ ట్రావెల్ లిస్ట్‌లో కచ్చితంగా చేర్చుకోండి.

పూరీ (Puri), ఒడిశా

ప్రపంచంలోనే అత్యంత ప్రసిద్ధి చెందిన జగన్నాథ రథయాత్ర జరిగేది పూరీలోనే. ఆషాఢ శుక్ల ద్వితీయ రోజున జగన్నాథ స్వామి, తన అన్న బలభద్రుడు, సోదరి సుభద్రా దేవిలతో కలిసి మూడు భారీ చెక్క రథాలపై జగన్నాథ ఆలయం నుంచి గుండిచా ఆలయానికి ప్రయాణమవుతారు. ఈ రథాలను ప్రతి ఏడాదీ పాత పద్ధతుల్లోనే సరికొత్తగా నిర్మిస్తారు. లక్షలాది మంది భక్తులు ఈ రథాలను లాగుతుంటే.. శంఖనాదాలు, మంత్రోచ్ఛారణలతో ఆ ప్రాంతమంతా భక్తి పారవశ్యంలో మునిగిపోతుంది.

అహ్మదాబాద్ (Ahmedabad), గుజరాత్

పూరీ తర్వాత దేశంలోనే అత్యంత భారీ స్థాయిలో (Second-largest) రథయాత్ర జరిగేది అహ్మదాబాద్‌లోనే. 1878లో ప్రారంభమైన ఈ యాత్ర జమాల్‌పూర్‌లోని చారిత్రక జగన్నాథ ఆలయం నుంచి మొదలై సుమారు 14 కిలోమీటర్ల మేర సాగుతుంది. అందంగా ముస్తాబు చేసిన ఏనుగులు, ఒంటెలు, సంప్రదాయ మార్షల్ ఆర్ట్స్, భక్తి గీతాల నడుమ సాగే ఈ యాత్ర కనులవిందుగా ఉంటుంది.

బరిపడ (Baripada), ఒడిశా

బరిపడలో రథయాత్ర చాలా ప్రత్యేకం. 1575 నుంచి ఇక్కడ ఈ ఉత్సవాలను నిర్వహిస్తున్నారు. అయితే ఇక్కడి స్పెషాలిటీ ఏంటంటే.. 1975 (అంతర్జాతీయ మహిళా సంవత్సరం) నుంచి సుభద్రా దేవి రథాన్ని పూర్తిగా మహిళలే లాగుతున్నారు. ఐదు దశాబ్దాలుగా కొనసాగుతున్న ఈ సంప్రదాయం బరిపడ రథయాత్రకు ఒక ప్రత్యేకమైన గుర్తింపును తెచ్చిపెట్టింది.

రాజ్-రాన్‌పూర్ (Raj-Ranpur), ఒడిశా

భువనేశ్వర్‌కు కొద్ది దూరంలో ఉండే రాజ్-రాన్‌పూర్‌లో 250 ఏళ్లుగా రథయాత్రను నిర్వహిస్తున్నారు. ఇక్కడి జగన్నాథ ఆలయం 14వ శతాబ్దం నాటిది. పూరీలో ఉండేంత భారీ రద్దీ ఇక్కడ ఉండదు. కాబట్టి, ఒడిశా సంప్రదాయాలను చాలా ప్రశాంతమైన వాతావరణంలో, దగ్గరుండి చూడాలనుకునేవారికి ఇది బెస్ట్ ప్లేస్.

మహేష్ (Mahesh), పశ్చిమ బెంగాల్

బెంగాల్‌లోని హుగ్లీ జిల్లాలో ఉన్న మహేష్ రథయాత్రకు ఎంతో చరిత్ర ఉంది. 1396లో ప్రారంభమైన ఈ యాత్ర.. పూరీ వెలుపల జరిగే అత్యంత పురాతన రథయాత్రగా పరిగణిస్తారు. మిగతా చోట్ల చెక్క రథాలను ఉపయోగిస్తే.. ఇక్కడ ఏకంగా 50 అడుగుల ఎత్తైన ఇనుప రథాన్ని (Iron chariot) ఉపయోగించడం విశేషం.

రాంచీ (Ranchi), జార్ఖండ్

జార్ఖండ్‌లోని అతిపెద్ద మతపరమైన పండుగలలో రాంచీ రథయాత్ర ఒకటి. దీనికి 300 ఏళ్ల చరిత్ర ఉంది. పూరీ ఆలయ స్ఫూర్తితో 1691లో నాగవంశీ రాజులు ఇక్కడి ఆలయాన్ని నిర్మించారు. ఈ ఉత్సవంలో గిరిజన, గిరిజనేతర వర్గాల వారు కలిసికట్టుగా పాల్గొనడం ఈ వేడుకకు మరింత విశిష్టతను తెస్తుంది.

ఇంఫాల్ (Imphal), మణిపూర్

మణిపూర్‌లో రథయాత్రను 'కాంగ్ చింగ్బా' (Kang Chingba) అని పిలుస్తారు. ఇంఫాల్‌లోని ప్రసిద్ధ శ్రీ గోవిందాజీ ఆలయం నుంచి ఈ యాత్ర మొదలవుతుంది. జగన్నాథ సంప్రదాయాలకు, మణిపురి కల్చర్‌కు ఇది అద్భుతమైన కలయిక. రథయాత్రతో పాటు స్థానిక భక్తి సంగీతం, సంప్రదాయ నృత్య ప్రదర్శనలు ఇక్కడ ప్రధాన ఆకర్షణ.

భారతదేశంలో ఏ ప్రాంతంలో జరిగినా.. ఈ రథయాత్రల అంతరార్థం ఒక్కటే అయినా.. వాటిని జరుపుకునే విధానాలు, స్థానిక సంప్రదాయాలు మాత్రం ప్రతి ప్రదేశానికీ భిన్నంగా, ఎంతో అద్భుతంగా ఉంటాయి.