నబీన్ మార్క్ ‘షాక్ థెరపీ’… తెలంగాణ బీజేపీకి ఢిల్లీ పీఠంలో ‘జీరో’ దక్కడానికి 5 కారణాలు ఇవే!

                                               ఢిల్లీలో క్లాస్ పీకిన తర్వాత… తెలంగాణకు బిగ్ జీరో!

                                     బీజేపీ జాతీయ కార్యవర్గంలో స్థానం లేకుండా చేసిన 5 కారణాలు

 

బీజేపీ జాతీయ అధ్యక్షుడు నితిన్ నబీన్ ప్రకటించిన కొత్త జాతీయ కార్యవర్గ (National Office-Bearers) జాబితా తెలంగాణ నేతలకు పెద్ద షాక్ ఇచ్చింది. ఆంధ్రప్రదేశ్, కర్ణాటక, తమిళనాడు, కేరళ… దక్షిణాది రాష్ట్రాలన్నీ ప్రాతినిధ్యం సాధించగా, తెలంగాణకు మాత్రం ‘బిగ్ జీరో’. గతంలో కీలక హోదాల్లో వెలిగిన డి.కె. అరుణ, బండి సంజయ్, కె. లక్ష్మణ్ స్థానాల్లో కొత్తవారికి కూడా అవకాశం ఇవ్వకపోవడం శ్రేణుల్లో తీవ్ర చర్చనీయాంశమైంది.

వాస్తవానికి, ఈ పరిణామాల వెనుక ఇటీవల ఢిల్లీలోని బీజేపీ జాతీయ కార్యాలయంలో జరిగిన తెలంగాణ కోర్ గ్రూప్ భేటీ ఒక ప్రధాన కారణంగా కనిపిస్తోంది. జాతీయ నాయకత్వం, రాష్ట్ర ప్రతినిధులు, కేంద్ర మంత్రులు కిషన్ రెడ్డి, బండి సంజయ్ సమక్షంలో జరిగిన ఆ సమీక్షలో.. "వర్గపోరు పక్కన పెట్టకపోతే తీవ్ర పరిణామాలు ఉంటాయి" అని అధిష్టానం గట్టిగానే క్లాస్ పీకింది. "ఇతర పార్టీల నుంచి వచ్చే నేతలు తమ పదవికి రాజీనామా చేసి వస్తేనే ఆహ్వానిస్తాం" అనే వినూత్న షరతులతో పాటు రాబోయే అసెంబ్లీ, మున్సిపల్ ఎన్నికల రోడ్‌మ్యాప్‌పై దిశానిర్దేశం చేసిన ఆ సమావేశంలోనే అంతర్గత తీరుపై తీవ్ర ఆగ్రహం వ్యక్తమైంది.

ఆ సమీక్షా సమావేశంలో హెచ్చరించినట్లే, తాజాగా వెలువడిన కేంద్ర కార్యవర్గంలో స్థానం కల్పించకపోవడం వెనుక ఐదు ప్రధాన విశ్లేషణాత్మక కారణాలు ఉన్నాయని పొలిటికల్ వర్గాలు భావిస్తున్నాయి:

రీజన్ - 1: "ఢిల్లీ ఫిర్యాదుల సంస్కృతికి… పొలిటికల్ చెక్ పాయింట్!"

కాంగ్రెస్ ప్రభుత్వంపై క్షేత్రస్థాయిలో ఉమ్మడి పోరాటాలు చేయాల్సింది పోయి, చిన్నపాటి అంతర్గత విషయాలకు కూడా ఢిల్లీ విమానం ఎక్కి ఒకరిపై ఒకరు ఫిర్యాదులు చేసుకోవడంపై హైకమాండ్ తీవ్ర ఆగ్రహంతో ఉంది. "వ్యక్తిగత ఆధిపత్యం కోసం పార్టీ ప్రతిష్టను దెబ్బతీసే ధోరణి వీడనంత వరకు కేంద్రంలో హోదాలు ఇచ్చేది లేదు" అని స్పష్టం చేసేందుకే ఈ నిర్ణయం తీసుకున్నట్లు తెలుస్తోంది.

రీజన్ - 2: "పాత-కొత్త నేతల కుర్చీలాట… జీరో ప్రాతినిధ్యం!"

దశాబ్దాలుగా పార్టీ సిద్ధాంతాన్ని నమ్ముకున్న పాత కార్యకర్తలకు, ఇతర పార్టీల నుంచి వచ్చిన కొత్త నేతలకు మధ్య తీవ్రమైన ఆధిపత్య పోరు నడుస్తోంది. నియోజకవర్గాల్లో పట్టు కోసం సాగుతున్న ఈ గ్రూపు రాజకీయాల వల్ల ఒకరికి జాతీయ పదవి ఇస్తే మరొక వర్గం అసమ్మతి బావుటా ఎగరేస్తుంది. ఈ సమస్యకు పరిష్కారంగా "ఎవరికీ ఇవ్వకుండా అందరికీ షాక్ ఇవ్వడమే" ఉత్తమ మార్గమని అధిష్టానం భావించింది.

రీజన్ - 3: "8 ఎంపీలు గెలిపించినా… క్షేత్రస్థాయిలో జీరో!"

2024 లోక్‌సభ ఎన్నికల్లో 8 ఎంపీ స్థానాలను గెలుచుకున్నప్పటికీ, ఆ రాజకీయ మైలేజ్‌ను కేడర్ బలోపేతానికి, గ్రామీణ స్థాయిలో విస్తరణకు నాయకులు వాడుకోలేకపోయారనేది అధిష్టానం ప్రాథమిక అంచనా. పైగా కిషన్ రెడ్డి, బండి సంజయ్‌లకు కేంద్ర మంత్రివర్గంలో చోటు కల్పించినందున, కేవలం హోదాలకే పరిమితమయ్యే నేతల కంటే పనితీరు చూపే వారికే ప్రాధాన్యమని సంకేతమిచ్చారు.

రీజన్ - 4: "ఆంధ్రప్రదేశ్ విజయం ఒక మోడల్… తెలంగాణకు కఠిన హెచ్చరిక!"

పక్కనే ఉన్న ఆంధ్రప్రదేశ్‌లో వ్యూహాత్మక కూటమితో అధికారం సాధించి మెరుగైన ఫలితాలు చూపడం వల్లనే దగ్గుబాటి పురందేశ్వరి, విష్ణువర్ధన్ రెడ్డిలకు జాతీయ కమిటీలో ప్రాతినిధ్యం దక్కింది. అధికారంలోకి వచ్చే అవకాశాలు పుష్కలంగా ఉన్న తెలంగాణలో మాత్రం నేతల స్వయంకృతాపరాధం, వర్గవిభేదాల వల్ల అవకాశాలను చేజేతులా పాడుచేసుకుంటున్నారనే ఆక్రోశం హైకమాండ్‌లో ఉంది.

రీజన్ - 5: "కోర్ గ్రూప్ క్లాస్‌కు… సర్జికల్ స్ట్రైక్!"

ఢిల్లీ భేటీలో పీకిన క్లాస్ కేవలం మాటలకే పరిమితం కాదని, ఆచరణలో కూడా కఠినంగా ఉంటామని నిరూపించేందుకే ఈ నిర్ణయం తీసుకున్నారు. పార్టీ ప్రయోజనాల కంటే వ్యక్తిగత ఇమేజ్ ముఖ్యమనుకునే నాయకత్వానికి ఇది జాతీయ నాయకత్వం పంపిన ఖచ్చితమైన 'డైరెక్ట్ వార్నింగ్'.

ఢిల్లీ పెద్దలు తీసుకున్న ఈ నిర్ణయం కేవలం పదవుల నిరాకరణ మాత్రమే కాదు… తెలంగాణ బీజేపీకి పంపిన చివరి హెచ్చరిక. ఇకనైనా గ్రూపు రాజకీయాలు వీడి క్షేత్రస్థాయిలో ఐక్యంగా పోరాడతారా? లేక ఈ ‘జీరో’ దెబ్బతో మరింత బలహీనపడతారా? రాబోయే రోజుల్లోనే సమాధానం తేలనుంది.