Aroori Ramesh Resignation BJP | బీజేపీకి ఆరూరి రమేష్ రాజీనామా.. మళ్లీ ‘కారు’ ఎక్కనున్న మాజీ ఎమ్మెల్యే

Aroori Ramesh Resignation BJP | తెలంగాణ రాజకీయాల్లో కీలక మార్పులు చోటుచేసుకుంటున్నాయి. వరంగల్ జిల్లా వర్ధన్నపేట మాజీ ఎమ్మెల్యే ఆరూరి రమేష్ భారతీయ జనతా పార్టీకి గుడ్ బై చెప్పారు. ఈ మేరకు ఆయన తన రాజీనామా లేఖను విడుదల చేశారు. గత కొద్దికాలంగా బీజేపీ కార్యకలాపాలకు దూరంగా ఉంటున్న ఆయన, చివరికి పార్టీని వీడాలనే నిర్ణయానికి వచ్చారు.

బీఆర్ఎస్ ఆహ్వానంతో మళ్లీ సొంత గూటికి

రాజీనామా అనంతరం ఆరూరి రమేష్ మాట్లాడుతూ, భారత్ రాష్ట్ర సమితి (BRS) అధిష్టానం నుంచి తనకు ఆహ్వానం అందినట్లు తెలిపారు. తన రాజకీయ ఎదుగుదలకు తోడ్పడిన బీఆర్ఎస్ పార్టీలోకి తిరిగి వెళ్లాలని నిర్ణయించుకున్నట్లు ఆయన స్పష్టం చేశారు. త్వరలోనే తన ముఖ్య అనుచరులు, కార్యకర్తలు, అభిమానులతో కలిసి భారీ బహిరంగ సభ ద్వారా బీఆర్ఎస్ పార్టీలో చేరనున్నట్లు వెల్లడించారు.

గత పరిణామాలు

గతంలో బీఆర్ఎస్ పార్టీలో జిల్లా అధ్యక్షుడిగా, ఎమ్మెల్యేగా పనిచేసిన ఆరూరి రమేష్, కొన్ని రాజకీయ సమీకరణాల వల్ల బీజేపీలో చేరారు. అయితే, ప్రస్తుతం రాష్ట్రంలో మారుతున్న రాజకీయ పరిస్థితులు, తన నియోజకవర్గ అభివృద్ధిని దృష్టిలో ఉంచుకుని ఆయన మళ్లీ కారు ఎక్కేందుకు సిద్ధమయ్యారు. ఆయన రాకతో ఉమ్మడి వరంగల్ జిల్లాలో బీఆర్ఎస్ శ్రేణుల్లో కొత్త ఉత్సాహం నెలకొంది.