Economic Survey 2026 | కేంద్ర ఆర్థిక సర్వే 2026 : కేసీఆర్ పాలనలో ‘తెలంగాణ మోడల్’కు జై

• కేసీఆర్ పాలనలో తెలంగాణ మోడల్‌కు జాతీయ గుర్తింపు
• కాంగ్రెస్, బీజేపీ దుష్ప్రచారాలకు చెక్
• బీఆర్ఎస్ పదేళ్ల పాలనపై కేంద్రం ప్రశంసలు

Economic Survey 2026 | కేంద్ర ప్రభుత్వం విడుదల చేసిన తాజా 'ఎకనామిక్ సర్వే 2026' (Economic Survey 2026).. కేసీఆర్ నాయకత్వంలో గత బీఆర్ఎస్ ప్రభుత్వం సాధించిన శరవేగమైన వృద్ధిని ప్రశంసించింది. ఈ నివేదిక కాంగ్రెస్, బీజేపీలు చేస్తున్న ప్రచారాలను పటాపంచలు చేస్తూ, తెలంగాణ అభివృద్ధి నమూనాను (Telangana Model) ఎత్తి చూపింది.

వ్యవసాయ రంగంలో చారిత్రక వృద్ధి

తెలంగాణలో సాగు విస్తీర్ణం గణనీయంగా పెరిగిందని ఎకనామిక్ సర్వే గణాంకాలతో సహా వెల్లడించింది. 2014లో 1.31 కోట్ల ఎకరాలుగా ఉన్న సాగు విస్తీర్ణం.. 2023 నాటికి 2.20 కోట్ల ఎకరాలకు పెరిగిందని ఆర్థిక సర్వే స్పష్టం చేసింది. దాదాపు 90 లక్షల ఎకరాల అదనపు భూమిని సాగులోకి తీసుకురావడం ఒక అసాధారణ విజయం. ఈ ఘనత వెనుక కేసీఆర్ ప్రభుత్వం చేపట్టిన దూరదృష్టితో కూడిన సాగునీటి ప్రాజెక్టుల పెట్టుబడులే కారణమని సర్వే పేర్కొంది.

ముఖ్యంగా.. కాళేశ్వరం ఎత్తిపోతల పథకం (Kaleshwaram Lift Irrigation Project), మిషన్ కాకతీయ (చెరువుల పునరుద్ధరణ), ఇతర భారీ, మధ్య తరహా సాగునీటి ప్రాజెక్టుల ద్వారానే సాగునీటి లభ్యత పెరిగిందని, పంటల సరళి స్థిరీకరించబడిందని, వ్యవసాయ ఉత్పాదకత మెరుగుపడిందని సర్వే స్పష్టంగా పేర్కొంది.

మహిళా నేతృత్వంలో అభివృద్ధి.. WE-Hub కు గుర్తింపు

మహిళా పారిశ్రామికవేత్తలను ప్రోత్సహించడంలో బీఆర్ఎస్ ప్రభుత్వం ఏర్పాటు చేసిన 'WE-Hub'ను జాతీయ స్థాయిలో ఉత్తమ ఆచరణగా (National Best Practice) ఎకనామిక్ సర్వే గుర్తించింది. WE-Hub అనేది మహిళా పారిశ్రామికవేత్తలను స్టార్టప్ ఎకోసిస్టమ్స్, పెట్టుబడిదారులతో అనుసంధానిస్తోంది. వినూత్న పబ్లిక్-ప్రైవేట్ భాగస్వామ్య నమూనాల ద్వారా శ్రామిక శక్తిలో మహిళల భాగస్వామ్యాన్ని పెంచుతోంది.

తయారీ రంగం, ఉపాధి: సామర్థ్యానికి మించి సత్తా

దేశ జనాభాలో తెలంగాణ వాటా 3 శాతం కంటే తక్కువ ఉన్నప్పటికీ, భారతదేశ తయారీ రంగ ఉపాధిలో (Manufacturing Employment) తెలంగాణ వాటా దాదాపు 5 శాతం ఉండటం విశేషం. ఇది రాష్ట్ర పారిశ్రామిక సాంద్రతకు, ఉత్పాదకతకు నిదర్శనం. పెద్ద రాష్ట్రాల సరసన, అత్యధిక తయారీ సామర్థ్యం ఉన్న టాప్-7 రాష్ట్రాల జాబితాలో తెలంగాణను చేర్చడం ద్వారా, రాష్ట్రం తన స్థాయికి మించి పనితీరు కనబరుస్తుందని సర్వే స్పష్టం చేసింది. బీఆర్ఎస్ 10 ఏళ్ల పాలనలోనే తెలంగాణలో తయారీ రంగ ఉపాధి, ఉత్పాదకత పెరగడం గమనార్హం.

సేవా రంగంలోనూ అగ్రగామి (Services Powerhouse)

భారతదేశ సేవా రంగంలో (Services Sector) కర్ణాటక, మహారాష్ట్ర, తమిళనాడుతో పాటు తెలంగాణ కూడా టాప్-4 రాష్ట్రాల్లో ఒకటిగా నిలిచింది. ఈ నాలుగు రాష్ట్రాలు కలిపి దేశ సేవా రంగ ఉత్పత్తిలో దాదాపు 40 శాతం వాటాను కలిగి ఉన్నాయి. ఈ వృద్ధికి ప్రధాన కారణాలు.. ఐటీ, డిజిటల్ సేవలు, ఫైనాన్స్ అండ్ ప్రొఫెషనల్ సర్వీసెస్, అధిక విలువ కలిగిన పట్టణ ఉత్పాదకత. అందుకే.. ఆధునిక, అధిక ఉత్పాదకత కలిగిన సేవా ఆర్థిక వ్యవస్థగా తెలంగాణ అవతరించిందని, భారతదేశ వృద్ధి కథనంలో ఇది కీలక పాత్ర పోషిస్తోందని సర్వే పేర్కొంది.

కేసీఆర్ హయాంలో తెలంగాణ సాధించిన అద్భుత ప్రగతిని కేంద్ర ప్రభుత్వ ఎకనామిక్ సర్వే స్వయంగా ధృవీకరించింది. గణాంకాలతో సహా నమోదైన ఈ అభివృద్ధిని ఎవరూ చెరిపివేయలేరని ఈ నివేదిక స్పష్టం చేస్తోంది.