Economic Survey 2026 | ఎకనామిక్ సర్వే 2026: ‘వికసిత్ భారత్’ వైపు భారత ఆర్థిక వ్యవస్థ.. ఈసారి వృద్ధి రేటు 7.4 శాతం

Economic Survey 2026 | త్రినేత్ర.న్యూస్ : కేంద్ర బడ్జెట్ 2026-27 (Union Budget) ప్రవేశపెట్టడానికి రెండు రోజుల ముందు, కేంద్ర ప్రభుత్వం గురువారం, డిసెంబర్ 29న పార్లమెంట్‌లో 'ఎకనామిక్ సర్వే 2025-26'ను (Economic Survey 2025-26) విడుదల చేసింది. కేంద్ర ఆర్థిక మంత్రి నిర్మలా సీతారామన్ ఈ సర్వేను ఉభయసభల్లో ప్రవేశపెట్టారు. ప్రపంచవ్యాప్తంగా అనిశ్చిత పరిస్థితులు నెలకొన్నప్పటికీ, భారత ఆర్థిక వ్యవస్థ మాత్రం బలంగా పుంజుకుంటోందని, వరుసగా నాలుగో ఏడాది కూడా 'అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థ'గా నిలిచిందని సర్వే స్పష్టం చేసింది. ఈ సర్వేలోని ముఖ్యాంశాలు మీకోసం.

జీడీపీ వృద్ధి రేటు అంచనాలు (GDP Growth Projections)

భారత ఆర్థిక వ్యవస్థ 2025-26 ఆర్థిక సంవత్సరంలో (FY26) 7.4 శాతం వృద్ధి రేటును నమోదు చేస్తుందని సర్వే అంచనా వేసింది. ఇది ముందస్తు అంచనాల కంటే మెరుగ్గా ఉండటం విశేషం. వచ్చే ఆర్థిక సంవత్సరానికి (FY27), వాస్తవ జీడీపీ వృద్ధి రేటు 6.8 శాతం నుంచి 7.2 శాతం శ్రేణిలో ఉండవచ్చని సర్వే పేర్కొంది. దేశీయ డిమాండ్, పెట్టుబడులు వృద్ధి పెరుగుదలకు దోహదం చేశాయి.

ద్రవ్యోల్బణం అదుపులో(Inflation Tamed)

సామాన్యులకు ఊరటనిచ్చే అంశం ఏంటంటే.. దేశంలో రిటైల్ ద్రవ్యోల్బణం (Retail Inflation) గణనీయంగా తగ్గింది. 2025-26 ఆర్థిక సంవత్సరం ఏప్రిల్-డిసెంబర్ కాలంలో రిటైల్ ద్రవ్యోల్బణం 1.7 శాతానికి పడింది. ఇది ఆర్బీఐ నిర్దేశించిన లక్ష్యం కంటే చాలా తక్కువ. ఆహార ద్రవ్యోల్బణం తగ్గడం, ముఖ్యంగా కూరగాయలు, పప్పుధాన్యాల ధరలు అదుపులోకి రావడం ఇందుకు ప్రధాన కారణం. అయితే, బంగారం, వెండి ధరల పెరుగుదల వల్ల కోర్ ఇన్‌ఫ్లేషన్ (Core Inflation) డిసెంబర్ 2025 నాటికి 4.62 శాతం వద్ద ఉందని సర్వే వెల్లడించింది.

రంగాల వారీగా పనితీరు (Sectoral Performance)

సేవా రంగం (Services Sector): భారత ఆర్థిక వృద్ధిలో సేవా రంగం కీలక పాత్ర పోషిస్తోంది. ఈ ఆర్థిక సంవత్సరం ప్రథమార్థంలో సేవా రంగం 9.3 శాతం వృద్ధిని నమోదు చేసింది.

పరిశ్రమలు (Industry): పారిశ్రామిక రంగం కూడా పుంజుకుంది. ప్రథమార్థం FY26లో పరిశ్రమల వృద్ధి రేటు 7.0 శాతంగా నమోదైంది. తయారీ రంగం (Manufacturing) 8.4 శాతం వృద్ధి రేటుతో బలంగా ఉంది.

వ్యవసాయం (Agriculture): వర్షాలు అనుకూలించడంతో వ్యవసాయం, అనుబంధ రంగాలు నిలకడైన పనితీరును కనబరుస్తున్నాయి. FY26లో వ్యవసాయ రంగ వృద్ధి 3.1 శాతంగా అంచనా వేశారు. రాబోయే నాలుగేళ్లలో వ్యవసాయ ఎగుమతులను 100 బిలియన్ డాలర్లకు చేర్చాలని లక్ష్యంగా పెట్టుకున్నారు.

టూరిజం: దేశీయ పర్యాటకం జోరుమీదుంది. 2024లో దేశీయ పర్యాటకుల సంఖ్య 2.9 బిలియన్లకు చేరింది.

ఆటోమొబైల్: గత దశాబ్దంలో ఆటో రంగ ఉత్పత్తి 33% పెరిగింది.

ఆర్థిక లోటు, విదేశీ మారక నిల్వలు (Fiscal Deficit & Forex Reserves)

కేంద్ర ప్రభుత్వం ఆర్థిక క్రమశిక్షణను పాటిస్తోందని సర్వే స్పష్టం చేసింది. FY26లో ద్రవ్య లోటు (Fiscal Deficit) లక్ష్యం 4.4 శాతానికి చేరుకునే దిశగా ప్రభుత్వం ప్రయాణిస్తోందని సర్వే తెలిపింది. భారత విదేశీ మారక నిల్వలు (Forex Reserves) సరికొత్త రికార్డులను సృష్టిస్తున్నాయి. జనవరి 16, 2026 నాటికి ఇవి 701.4 బిలియన్ డాలర్లకు చేరాయి. ఇది 11 నెలల దిగుమతులకు సరిపోతుందని తెలిపింది.

మూడు ప్రధాన రిస్క్‌లు (Three Risk Scenarios)

ప్రపంచ పరిస్థితులపై సర్వే హెచ్చరికలు జారీ చేసింది. ప్రధానంగా మూడు సవాళ్లు భారత్‌కు పొంచి ఉన్నాయని పేర్కొంది. జియోపాలిటికల్ ఉద్రిక్తతల వల్ల పెట్టుబడుల్లో ఒడిదుడుకులు రావొచ్చు. ఆదాయం పెరిగే కొద్దీ దిగుమతులు పెరగడం సహజం, ఇది రూపాయిపై ఒత్తిడి తెస్తుంది. FY26లో డాలర్‌తో పోలిస్తే రూపాయి విలువ 6.5 శాతం తగ్గింది. సంపన్న దేశాల్లో వడ్డీ రేట్ల మార్పులు మూలధన ప్రవాహాలపై (Capital Flows) ప్రభావం చూపవచ్చు. ప్రపంచవ్యాప్తంగా భౌగోళిక రాజకీయ ఉద్రిక్తతలు (Geopolitical tensions), వాణిజ్య పరమైన అనిశ్చితులు ఉన్నప్పటికీ, భారత్ మాత్రం 'వ్యూహాత్మక స్వయంప్రతిపత్తి' (Strategic Autonomy) వైపు అడుగులు వేస్తోందని సర్వే పేర్కొంది.

రికార్డు స్థాయిలో క్రెడిట్ రేటింగ్స్ గత రెండు దశాబ్దాలలో ఎన్నడూ లేని విధంగా, భారత్ మూడు ప్రధాన రేటింగ్ ఏజెన్సీల నుండి అప్‌గ్రేడ్స్ పొందింది. S&P భారత రేటింగ్‌ను 'BBB'కి పెంచడం విశేషం. ఇది విదేశీ మదుపరులకు భారత్‌పై నమ్మకాన్ని పెంచుతుంది.

2026 నాటికి భారత ఆర్థిక విధానం మరింత పటిష్టంగా మారుతుందని, ప్రపంచ ఆర్థిక వ్యవస్థలో భారత్ ఒక కీలక శక్తిగా ఎదుగుతుందని ప్రధాన ఆర్థిక సలహాదారు వి. అనంత నాగేశ్వరన్ అభిప్రాయపడ్డారు.

దేశీయ వినియోగం (Domestic Consumption) జీడీపీలో 61.5 శాతం వాటాతో అత్యధిక స్థాయికి చేరుకోవడం శుభపరిణామంగా సర్వే పేర్కొన్నది. ఈ సర్వే నివేదిక రేపు రాబోయే బడ్జెట్‌పై సానుకూల అంచనాలను పెంచింది. అందుకే, రేపు ప్రవేశపెట్టబోయే బడ్జెట్‌లో ప్రభుత్వం ఎలాంటి వరాలు ప్రకటిస్తుందో, ఏ రంగాలకు పెద్దపీట వేస్తుందో వేచి చూడాలి.