Electric Shock | అర్ధరాత్రి దావ‌త్‌.. పోలీసులను చూసి ప‌రిగెత్తి.. క‌రెంట్ షాక్‌తో ఇద్దరు ఇంజినీరింగ్‌ విద్యార్థుల మృతి

Electric Shock | త్రినేత్ర న్యూస్‌: కొంద‌రు ఇంజినీరింగ్ విద్యార్థులు (Engineering Students) ఓ పొలంలో దావ‌త్ చేసుకుంటున్నారు. అర్ధ‌రాత్రి 2 గంట‌లు అవుతున్న‌ది. అంతా స‌ర‌దాగా మందు తాగుతున్నారు. అదేస‌మ‌యంలో అటుగా పోలీసు పెట్రోలింగ్ వాహ‌నం వ‌చ్చింది. భ‌యంతో ప‌రుగులు పెట్టారు. ఈ క్ర‌మంలో పందుల కోసం పెట్టింటిన విద్యుత్ తీగ‌లు (Electric Shock) త‌గిలి ఇద్ద‌రు విద్యార్థులు మృత్యువాత ప‌డ్డారు. ఈ ఘ‌ట‌న రంగారెడ్డి జిల్లా మొయినాబాద్ (Moinabad) మండలంలో జ‌రిగింది.

చిలుకూరులోని కేజీ రెడ్డి ఇంజినీరింగ్‌ కాలేజీకి చెందిన కొంద‌రు విద్యార్థులు మొయినాబాద్ మండ‌లంలోని పెద్ద‌మంగ‌ళారం స‌మీపంలోని వ్య‌వ‌సాయ పొలంలో మ‌ద్యం సేవిస్తున్నారు. రాత్రి 2 గంట‌ల స‌మ‌యంలో అటుగా పోలీసు పెట్రోలింగ్ వాహ‌నం (Police Patrolling) వ‌చ్చింది. దీంతో పోలీసుల‌కు చిక్క‌కుండా ఉండేందుకు ప‌రుగులు పెట్టారు. దీంతో పొలంలో అడవి పందుల నివారణ కోసం ఏర్పాటు చేసిన తీగలు తగల‌డంతో రాజేంద్రనగర్ సర్కిల్ ఉప్పర్ పల్లికి చెందిన మోక్షచరణ్ (20), బల్కంపేటకు చెందిన యశ్వంత్ (20) మృతి చెందారు.