TGSRTC Commercial Shops For Rent | వ్యాపారం చేయాలనుకుంటున్నారా? అయితే తెలంగాణ ఆర్టీసీ సంస్థ కల్పిస్తున్న ఈ ‘గోల్డెన్ చాన్స్’ మీకోసమే!

TGSRTC Commercial Shops For Rent | త్రినేత్ర.న్యూస్ : సొంతంగా ఏదైనా వ్యాపారం (Business) ప్రారంభించాలనుకుంటున్నారా? లేదా ఉన్న వ్యాపారాన్ని మరింత విస్తరించాలని ప్లాన్ చేస్తున్నారా? అయితే తెలంగాణ రాష్ట్ర రోడ్డు రవాణా సంస్థ (TGSRTC) మీకు ఒక బంపర్ ఆఫర్ అందిస్తోంది. కేవలం ప్రయాణికులను గమ్యస్థానాలకు చేర్చడమే కాకుండా, తన వనరులను సద్వినియోగం చేసుకునే దిశగా ఆర్టీసీ కీలక అడుగు వేసింది. ఇందులో భాగంగా రాష్ట్రవ్యాప్తంగా ఉన్న తమ కమర్షియల్ కాంప్లెక్స్‌లలో (Commercial Complexes) ఖాళీగా ఉన్న షాపులను అద్దెకు ఇవ్వాలని నిర్ణయించింది.

ప్రచార ఖర్చు సున్నా.. కస్టమర్లే వెతుక్కుంటూ వస్తారు

ఏ వ్యాపారానికైనా కస్టమర్ల రాక అనేది చాలా ముఖ్యం. ఆర్టీసీ బస్టాండ్లు నిత్యం వేలాది మంది ప్రయాణికులతో రద్దీగా ఉంటాయి. ఇలాంటి ప్రైమ్ లొకేషన్లలో షాపులు ఏర్పాటు చేసుకోవడం వల్ల వ్యాపారులకు మార్కెటింగ్ (Marketing) ఖర్చులు అసలే ఉండవు. హోటళ్లు, ఫుడ్ కోర్టులు, సూపర్ మార్కెట్లు, బ్రాండెడ్ షోరూమ్‌ల నుంచి చిన్నపాటి మొబైల్ షాపుల వరకు దేనికైనా ఇవి పర్ఫెక్ట్ అడ్రస్‌గా మారనున్నాయి.

దళారీలకు చెక్.. ఆన్‌లైన్‌లోనే పూర్తి వివరాలు

ఈ ప్రక్రియలో పూర్తి పారదర్శకతను (Transparency) పాటించాలని యాజమాన్యం నిర్ణయించింది. ఆర్టీసీ చరిత్రలోనే తొలిసారిగా బస్టాండ్లలోని కమర్షియల్ స్పేస్‌ల (Commercial Spaces) వివరాలను పబ్లిక్ డొమైన్‌లో ఉంచింది.

ఎక్కడెక్కడ ఎన్ని షాపులున్నాయి? ప్రస్తుతం వాటిని ఎవరు రన్ చేస్తున్నారు? వాటి లీజు పీరియడ్ ఎప్పుడు ముగుస్తుంది? వాటి అద్దె ఎంత? ఇలాంటి కీలక వివరాలన్నీ దళారుల ప్రమేయం లేకుండా నేరుగా tgsrtc.telangana.gov.in వెబ్‌సైట్‌లో చెక్ చేసుకోవచ్చు. ప్రస్తుతం ఖాళీగా ఉన్న 694 షాపులకు త్వరలోనే టెండర్లు (Tenders) పిలవనున్నారు.

ఉపాధి కల్పనతో పాటు సంస్థకు ఆదాయం

ఈ నిర్ణయం వల్ల సంస్థ ఆదాయం పెరగడమే కాకుండా, స్థానిక నిరుద్యోగులకు, వ్యాపారులకు ఉపాధి దొరుకుతుందని నిపుణులు చెబుతున్నారు. ఈ పద్ధతి ద్వారా అద్దెదారుల ఎంపికలో డిజిటల్ జవాబుదారీతనం (Digital Accountability) పెరిగిందని ఆర్టీసీ చర్యను పలువురు ప్రశంసిస్తున్నారు.

మీ వ్యాపారాన్ని పెంచుకోండి: ఎండీ వై.నాగిరెడ్డి

"ఆర్టీసీ స్థలాల్లో షాపుల నిర్వహణ ప్రక్రియను ఇప్పుడు మరింత సింపుల్ చేశాం. వ్యాపారులు ఎలాంటి ఇబ్బందులు లేకుండా ఈ అవకాశాన్ని వాడుకోవచ్చు. టీజీఎస్ ఆర్టీసీ కల్పిస్తున్న ఈ సువర్ణావకాశాన్ని సద్వినియోగం చేసుకుని వ్యాపారంలో లాభాలు గడించడమే కాకుండా, మా సంస్థ ప్రగతిలోనూ మీరు భాగస్వాములు కావాలి" అని TGSRTC ఎండీ వై.నాగిరెడ్డి పిలుపునిచ్చారు.