Kamakhya Ambubachi Mela 2026 | యోని ఆకారంలో అమ్మవారు.. కామాఖ్య గుడిలో ‘అంబుబాచి మేళా’ షురూ.. భక్తులకు కొత్త రూల్స్ ఇవే!

• గువాహటిలోని నీలాచల్ కొండలపై ఉన్న కామాఖ్య ఆలయంలో అంబుబాచి మేళా (జూన్ 22-26) ప్రారంభం
• అమ్మవారి రజస్వల సమయంగా భావించే ఈ మూడు రోజులు (జూన్ 23-25) గర్భగుడి తలుపులు మూసి ఉంచుతారు
• జూన్ 26న ఉదయం సంప్రదాయ పూజల అనంతరం భక్తులకు దర్శన భాగ్యం
• దాదాపు 8-10 లక్షల మంది భక్తులు వస్తుండటంతో వీఐపీ (VIP) పాస్‌లను రద్దు చేసి, కఠిన ఆంక్షలు విధింపు

Kamakhya Ambubachi Mela 2026 | త్రినేత్ర.న్యూస్ : అస్సాంలోని గువాహటిలో ఉన్న ప్రసిద్ధ నీలాచల్ కొండలపై (Nilachal Hills) కొలువైన మా కామాఖ్య దేవి ఆలయంలో వార్షిక 'అంబుబాచి మేళా 2026' (Ambubachi Mela 2026) అంగరంగ వైభవంగా ప్రారంభమైంది. జూన్ 22 నుంచి జూన్ 26 వరకు జరిగే ఈ ఆధ్యాత్మిక ఉత్సవానికి దేశవిదేశాల నుంచి లక్షలాది మంది సాధువులు, తాంత్రిక నిపుణులు, భక్తులు భారీగా తరలివస్తున్నారు. "తూర్పు మహా కుంభమేళా" (Mahakumbh of the East) గా పేరుగాంచిన ఈ పండుగ ప్రకృతిలోని స్త్రీ శక్తిని (Divine feminine energy), సంతానోత్పత్తిని గౌరవించే వేడుక.

సంతానోత్పత్తి అనేది భూమి సారాన్ని, ఫలదీకరణను సూచిస్తుందని, వర్షాలు రావడం, చెట్లు, పూలు చిగురించడం అంతా ప్రకృతి మాత ఇచ్చే స్వచ్ఛమైన శక్తి అని అక్కడి భక్తులు చెబుతున్నారు. కామాఖ్య దేవి ఈ విశ్వశక్తికి కేంద్రబిందువు అని, అంబుబాచి మేళా సమయంలో అమ్మవారి శక్తి అనంతంగా ఉంటుందని వారు విశ్వసిస్తారు.

51 శక్తి పీఠాలలో అత్యంత పురాతనమైన ఆలయం

కామాఖ్య దేవాలయం 51 శక్తి పీఠాలలో అత్యంత పురాతనమైనది. ఇక్కడ అమ్మవారు విగ్రహ రూపంలో కాకుండా.. భూమిలోని సహజ సిద్ధమైన యోని ఆకారపు శిల రూపంలో కొలువై ఉంటారు. అంతే కాదు.. భారత్‌లోనే ప్రసిద్ధ తాంత్రిక పూజా విధానాలకు, శక్తి ఆరాధనకు ఈ ఆలయం కేంద్రంగా మారింది. కామాఖ్య ప్రధాన ఆలయంతో పాటు కాళీ, తార, భువనేశ్వరి లాంటి పది మహా విద్యలకు ప్రత్యేకమైన ఆలయాలు ఇక్కడ ఉన్నాయి.

ఈ ఉత్సవం ప్రధానంగా రెండు దశల్లో (Phases) జరుగుతుంది.

ప్రవృత్తి (Pravritti) - ఆలయ మూసివేత

సంప్రదాయం ప్రకారం జూన్ 22 రాత్రి 9:08 గంటలకు ఆలయ ద్వారాలు మూసివేశారు. అమ్మవారు తన వార్షిక రుతుచక్ర (Menstrual cycle) సమయంలో ఉన్నారని భావించి, జూన్ 23 నుంచి 25 వరకు వరుసగా మూడు రోజుల పాటు గర్భగుడిలోనికి ఎవరినీ అనుమతించరు.

నివృత్తి (Nivritti) - ఆలయ పునఃప్రారంభం

మూడు రోజుల తర్వాత, జూన్ 26న తెల్లవారుజామున అమ్మవారికి పవిత్ర స్నానం, నిత్య పూజలు (Snan and Nitya Puja) నిర్వహించిన అనంతరం గుడి తలుపులు తెరుస్తారు. అప్పుడే భక్తులు దర్శనం (Darshan) కోసం లోపలికి ప్రవేశిస్తారు. అత్యంత పవిత్రంగా భావించే అమ్మవారి ఎర్రటి వస్త్రం (Rakta Bastra) ప్రసాదాన్ని ఇక్కడే స్వీకరిస్తారు.

భారీగా భక్తుల రాక.. కఠినంగా నిబంధనలు

ఈ ఏడాది అంబుబాచి మేళాకు దాదాపు 8 నుంచి 10 లక్షల మంది భక్తులు వస్తారని అంచనా. ఈ క్రమంలో అస్సాం ప్రభుత్వం, కామాఖ్య టెంపుల్ మేనేజ్‌మెంట్ కమిటీ క్రౌడ్ కంట్రోల్ కోసం కఠిన నిబంధనలు అమలు చేస్తున్నాయి.

వీఐపీ దర్శనాల్లేవ్ (No VIP Privileges): భక్తులందరికీ సమాన ప్రాధాన్యత ఇవ్వాలన్న ఉద్దేశంతో ఈసారి స్పెషల్ కార్ పాస్‌లు, వీఐపీ లేదా వీవీఐపీ (VVIP) ఎంట్రీలను రాష్ట్ర ప్రభుత్వం పూర్తిగా రద్దు చేసింది.

చెప్పులు లేకుండానే (Footwear Restrictions): భక్తులు నీలాచల్ ఫ్లైఓవర్ కింద ఏర్పాటు చేసిన ప్రత్యేక క్యాంపుల్లోనే తమ చెప్పులు, షూస్ వదిలేసి అక్కడి నుంచి వట్టి కాళ్లతోనే (Barefoot) కొండపైకి నడిచి వెళ్లాలి.

నైట్ టైమ్ ఆంక్షలు (Night Restrictions): రాత్రి 8:30 గంటల తర్వాత టెంపుల్ కాంప్లెక్స్‌లోకి ఎంట్రీ లేదు. అలాగే ఆలయ ప్రాంగణంలో రాత్రి పూట ఎవరూ నిద్రించడానికి లేదా బస చేయడానికి అనుమతి లేదు.

భక్తుల కోసం ఏర్పాట్లు (On-Ground Amenities): లక్షలాదిగా వస్తున్న భక్తుల కోసం జిల్లా యంత్రాంగం పకడ్బందీ ఏర్పాట్లు చేసింది. ఒకేసారి 50,000 మంది ఉండేలా మాలిగావ్‌లోని రంగ్ భవన్‌లో ట్రాన్సిట్ క్యాంపులు (Transit camps) ఏర్పాటు చేశారు. మెడికల్ హెల్త్ క్యాంపులు, తాగునీటి వసతి కల్పించడంతో పాటు, భద్రత కోసం భారీగా సీసీటీవీ (CCTV) కెమెరాలను ఏర్పాటు చేశారు.

తెలుగు రాష్ట్రాల నుంచి ఎలా వెళ్లాలి?

తెలుగు రాష్ట్రాల నుంచి వెళ్లే వాళ్లు ముందుగా గౌహతి రైల్వే స్టేషన్‌కు చేరుకోవాలి. అక్కడి నుంచి కామాఖ్య దేవాలయం 7 కిమీల దూరంలో ఉంటుంది. గౌహతి విమానాశ్రయం నుంచి ఈ గుడి 20 కిమీల దూరంలో ఉంటుంది. ఘాట్ రోడ్డు నుంచి కొండపైకి చేరుకోవడానికి కూడా టాక్సీలు, బస్సులు అందుబాటులో ఉంటాయి.