Telangana | ఉప స‌ర్పంచ్‌ల‌కు ఊర‌ట‌.. చెక్ ప‌వ‌ర్ ర‌ద్దుపై పంచాయ‌తీ రాజ్ శాఖ స్ప‌ష్ట‌త‌

Telangana | త్రినేత్ర‌.న్యూస్ : రాష్ట్ర పంచాయ‌తీ రాజ్ శాఖ ఉప స‌ర్పంచ్‌ల‌ను ఉక్కిరిబిక్కిరి చేసింది. నిన్న కొత్త‌గా ఉప స‌ర్పంచ్‌లుగా ప్ర‌మాణ‌స్వీకారం చేసిన వారికి కాసేపు గుండెల్లో ద‌డ పుట్టించింది. ఉప స‌ర్పంచ్‌ల‌కు చెక్ పవ‌ర్ ర‌ద్దు చేస్తున్న‌ట్లు పంచాయ‌తీ రాజ్ శాఖ ఉత్త‌ర్వులు జారీ చేసింది. క్ష‌ణాల్లోనే ఈ ఉత్త‌ర్వులపై తీవ్ర వ్య‌తిరేక‌త వ్యక్త‌మైంది. దీంతో మొద‌ట జారీ చేసిన ఉత్త‌ర్వుల‌ను స‌వ‌రిస్తూ.. నిమిషాల వ్య‌వ‌ధిలోనే మ‌రో మెమో విడుద‌ల చేసింది పంచాయ‌తీ రాజ్ శాఖ‌.

ఉప స‌ర్పంచ్‌ల‌కు చెక్ ప‌వ‌ర్ ర‌ద్దు చేయ‌లేదంటూ.. అధికారుల త‌ప్పిదం వ‌ల్లే జ‌రిగింద‌ని పంచాయ‌తీ రాజ్ శాఖ వివ‌ర‌ణ ఇచ్చింది. గ‌త బీఆర్ఎస్ ప్ర‌భుత్వంలో మాదిరిగానే ఉప స‌ర్పంచ్‌ల‌కు చెక్ ప‌వ‌ర్ కొన‌సాగిస్తున్న‌ట్లు పేర్కొంది. ఈ మేర‌కు సవరణ చేస్తూ పంచాయ‌తీ రాజ్ శాఖ కొత్త మెమోను విడుద‌ల చేసింది.

ఉప స‌ర్పంచ్ పోస్టుకు ఎందుకంత డిమాండ్..?

2025 పంచాయ‌తీ ఎన్నిక‌ల్లో ఉప స‌ర్పంచ్ పోస్టుకు భారీ డిమాండ్ ఉండే. ఎందుకంటే జాయింట్ చెక్ ప‌వ‌ర్ ఉండ‌డ‌మే ప్ర‌ధాన కార‌ణం. అంటే స‌ర్పంచ్, ఉప స‌ర్పంచ్ సంత‌కం చేస్తేనే బిల్లులు మంజూరీకి అవ‌కాశం ఉండే. ల‌క్ష‌లు ఖ‌ర్చు పెట్టి ఎన్నిక‌ల్లో గెలిచి, ఉప స‌ర్పంచ్ ప‌ద‌విని ద‌క్కించుకున్నామ‌ని, తీరా చూస్తే త‌మ ఆశ‌ల‌పై నీళ్లు చ‌ల్లార‌ని ఆవేద‌న వ్య‌క్తం చేసిన సంగ‌తి తెలిసిందే. మ‌ళ్లీ స‌వ‌ర‌ణ చేయ‌డంతో ఉప స‌ర్పంచ్‌లు ఊపిరి పీల్చుకున్నారు.

జాయింట్ చెక్ ప‌వ‌ర్ అంటే..?

ఈ విధానంలో తెలంగాణ పంచాయతీ రాజ్ చట్టం ప్రకారం, గ్రామాభివృద్ధి పనులకు సంబంధించి నిధుల విడదల, చెల్లింపుల విషయంలో సర్పంచ్‌తో పాటు ఉప సర్పంచ్‌కు కూడా సమానమైన బాధ్యత ఉంటుంది. దీనినే సాధారణంగా 'జాయింట్ చెక్ పవర్' అని పిలుస్తారు.

2018 నుంచి ఉప స‌ర్పంచ్‌ల‌కు చెక్ ప‌వ‌ర్

2014లో అధికారంలోకి వ‌చ్చిన నాటి టీఆర్ఎస్ ప్ర‌భుత్వం.. 2018లో కొత్త పంచాయ‌తీరాజ్ చ‌ట్టాన్ని తీసుకువ‌చ్చింది. ఆ చ‌ట్టంలో స‌ర్పంచ్‌, ఉప స‌ర్పంచ్‌కు జాయింట్ చెక్ ప‌వ‌ర్ క‌ల్పించింది. 2019 జ‌న‌వ‌రి నెల‌లో జ‌రిగిన పంచాయ‌తీ ఎన్నిక‌ల అనంత‌రం జాయింట్ చెక్ ప‌వ‌ర్ విధానం రాష్ట్ర వ్యాప్తంగా పూర్తిస్థాయిలో అమ‌ల్లోకి వ‌చ్చింది.

2018కు ముందు ఇలా..

2018 పంచాయ‌తీ రాజ్ చ‌ట్టానికి ముందు.. గ్రామ పంచాయ‌తీల నిధుల చెల్లింపుల కోసం స‌ర్పంచ్‌తో పాటు పంచాయ‌తీ కార్య‌ద‌ర్శి సంత‌కాలు అవ‌స‌ర‌మ‌య్యేవి. అయితే, అధికారుల కంటే ప్రజల చేత ఎన్నికైన ప్రతినిధులకే ఎక్కువ బాధ్యత ఉండాలనే ఉద్దేశంతో నాటి టీఆర్ఎస్ ప్రభుత్వం పంచాయ‌తీ కార్య‌ద‌ర్శుల‌కు చెక్ ప‌వ‌ర్ తీసేసి, వారి స్థానంలో ఉప స‌ర్పంచ్‌ల‌కు అవ‌కాశం క‌ల్పించారు.