Telangana Budget 2026-27 | రూ.500 కే గ్యాస్ సిలిండర్: 42.90 లక్షల కుటుంబాలకు లబ్ధి.. బడ్జెట్ సమావేశాల్లో భట్టి విక్రమార్క కీలక ప్రకటన

Telangana Budget 2026-27 | త్రినేత్ర.న్యూస్ : తెలంగాణ శాసనసభలో 2026-27 వార్షిక బడ్జెట్‌ను ఉప ముఖ్యమంత్రి, ఆర్థిక శాఖ మంత్రి మల్లు భట్టి విక్రమార్క ప్రవేశపెట్టారు. ఈ సందర్భంగా ప్రజా ప్రభుత్వం మహిళల సంక్షేమం కోసం అమలు చేస్తున్న కీలక పథకాల పురోగతిని, వాటి ద్వారా జరుగుతున్న మేలును ఆయన సభకు సవివరంగా తెలియజేశారు.

మహిళలకు భారీ ఉపశమనం

పెరుగుతున్న వంట గ్యాస్ సిలిండర్ ధరల భారం నుంచి సామాన్య, మధ్యతరగతి మహిళలకు ఉపశమనం కల్పించడమే లక్ష్యంగా రాష్ట్ర ప్రభుత్వం రూ.500 కే గ్యాస్ సిలిండర్ అందించే పథకానికి శ్రీకారం చుట్టిన విషయం తెలిసిందే. ఈ పథకం అభయహస్తం గ్యారెంటీలలో భాగంగా రాష్ట్రంలో అత్యంత విజయవంతంగా అమలవుతోందని మంత్రి స్పష్టం చేశారు.

బడ్జెట్ ప్రసంగంలో మంత్రి వెల్లడించిన అధికారిక గణాంకాల ప్రకారం:

లబ్ధి పొందిన కుటుంబాలు: రాష్ట్రవ్యాప్తంగా ఇప్పటి వరకు 42 లక్షల 90 వేల (42.90 లక్షలు) కుటుంబాలు ఈ పథకం కింద కేవలం 500 రూపాయలకే సిలిండర్‌ను అందుకున్నాయి.

ఆదా అయిన మొత్తం: మార్కెట్లో గ్యాస్ ధర అధికంగా ఉన్నప్పటికీ, మిగతా భారాన్ని రాష్ట్ర ప్రభుత్వం సబ్సిడీ రూపంలో భరిస్తోంది. దీని ద్వారా రాష్ట్రంలోని మహిళలకు ఇప్పటి వరకు సుమారు రూ.752 కోట్ల రూపాయలు ఆదా అయినట్లు ఆర్థిక మంత్రి భట్టి విక్రమార్క సభలో ప్రకటించారు.

రాబోయే రోజుల్లోనూ ఈ పథకాన్ని మరింత పకడ్బందీగా అమలు చేస్తూ, మహిళా సాధికారత, ఆర్థిక స్వావలంబన దిశగా తెలంగాణ ప్రభుత్వం అడుగులు వేస్తుందని ఈ బడ్జెట్ ద్వారా స్పష్టమైన సంకేతాలు ఇచ్చింది.