Telangana Cyber Crime Control | సైబర్ నేరగాళ్ల గుండెల్లో దడ.. కట్టడిలో దేశానికే రోల్ మోడల్‌గా తెలంగాణ

Telangana Cyber Crime Control | త్రినేత్ర.న్యూస్ : రోజురోజుకూ కొత్త పుంతలు తొక్కుతున్న సైబర్ నేరాలను (Cyber crimes) అడ్డుకోవడంలో తెలంగాణ రాష్ట్రం దేశంలోనే అగ్రగామిగా నిలిచింది. డిజిటల్ మోసాలకు చెక్ పెడుతూ.. బాధితులకు సత్వర న్యాయం అందించడంలో తెలంగాణ పోలీస్ శాఖ దేశానికే ఆదర్శంగా నిలుస్తోందని సాక్షాత్తూ ప్రధాన మంత్రి కార్యాలయం (PMO) ప్రశంసించింది. కేంద్ర హోంశాఖ తాజాగా నిర్వహించిన జాతీయస్థాయి ప్రగతి సమీక్షా సమావేశంలో మన రాష్ట్రం నెం.1 (Number 1) స్థానాన్ని కైవసం చేసుకుంది.

తొమ్మిది ప్రమాణాలు.. తిరుగులేని పనితీరు

సైబర్ మోసాల కట్టడి కోసం రాష్ట్రాల సైబర్ సెక్యూరిటీ బ్యూరో (Cyber Security Bureau) పనితీరును కేంద్ర హోంశాఖ నిశితంగా పరిశీలించింది. దీనికోసం ప్రత్యేకంగా 9 ప్రామాణికాలను నిర్దేశించింది. ఇందులో తెలంగాణ పోలీసులు కనబరిచిన అత్యుత్తమ పనితీరును పరిగణనలోకి తీసుకున్న కేంద్రం.. సగర్వంగా తొలి స్థానాన్ని కేటాయించింది.

ప్రధానంగా రాష్ట్రంలో ఏర్పాటు చేసిన అత్యాధునిక S4C కమాండ్ సెంటర్ (S4C Command Center), బాధితులు పోలీస్ స్టేషన్‌కు వెళ్లకుండానే కంప్లైంట్ చేసేలా 'ఈ-జీరో ఎఫ్ఐఆర్' (e-Zero FIR), గ్రీవెన్స్ రిడ్రెస్సల్ (Grievance Redressal), పోగొట్టుకున్న డబ్బును బాధితులకు వెనక్కి ఇప్పించే 'మనీ రెస్టోరేషన్' (Money Restoration) విధానాలు గ్రాండ్ సక్సెస్ అయ్యాయి. వీటితో పాటు సహయోగ్, సమన్వయ పోర్టల్, క్రైమ్ హాట్‌స్పాట్ల గుర్తింపు, అధికారుల సామర్థ్య నిర్మాణం, ప్రజల్లో సైబర్ నేరాలపై విస్తృత ప్రచారం వంటి 9 కీలక అంశాల్లో తెలంగాణ నూటికి నూరు శాతం పర్‌ఫెక్ట్‌గా పనిచేసిందని పీఎంవో స్పష్టం చేసింది.

స్మార్ట్‌ఫోన్ చేతిలో ఉంటే చాలు క్షణాల్లో బ్యాంక్ ఖాతాలు ఖాళీ అవుతున్న ప్రస్తుత తరుణంలో.. తెలంగాణ సైబర్ పోలీసులు తీసుకుంటున్న ఈ సరికొత్త టెక్-ఆధారిత చర్యలు దేశవ్యాప్తంగా ప్రశంసలు అందుకుంటున్నాయి.