Teenmar Mallanna | ఆర్థిక ఇబ్బందుల‌తో ఏ విద్యార్ధీ చ‌దువును మ‌ధ్యలోనే ఆపేయ‌కూడ‌దు: ఎమ్మెల్సీ తీన్మార్ మ‌ల్ల‌న్న‌

Teenmar Mallanna | త్రినేత్ర న్యూస్‌: ఆడ‌బిడ్డ‌ల ఉన్న‌త‌ చ‌దువులు ఆర్థిక ఇబ్బందుల‌తో ఆగిపోకూడ‌ద‌ని ఎమ్మెల్సీ, బీసీ రాజ్యాధికార పార్టీ అధ్య‌క్షుడు తీన్మార్ మల్ల‌న్న (Teenmar Mallanna) అన్నారు. ప్ర‌తి పేద బిడ్డ‌కు నాణ్య‌మైన ఉచిత విద్య అందించ‌డ‌మే త‌మ ల‌క్ష్య‌మ‌ని చెప్పారు. బీసీ రాజ్యాధికార యాత్ర‌లో (Rajyadhikara Yathra) భాగంగా నారాయణపేట జిల్లాలోని కోస్గి మండలం కడంపల్లికి ఎమ్మెల్సీ మ‌ల్ల‌న్న చేరుకున్నారు. ఈ సంద‌ర్భంగా గ్రామానికి చెందిన కావ‌లి శ్రీనివాస్‌, మంగ‌మ్మ దంప‌తుల చిన్న కూతురు అన్న‌పూర్ణ ఉన్న‌త చ‌దువుల‌కు చేయూత అందించారు. ఇంట‌ర్ బైపీసీలో 948 మార్కులు సాధించిన అన్న‌పూర్ణ‌.. బీఎస్సీ ఎంఎల్టీ కోర్సు చేయాల‌నుకుంది. అయితే కుటుంబ ఆర్థిక ప‌రిస్థితుల కార‌ణంగా చ‌దువు ఆపేయాల్సిన ప‌రిస్థితి ఏర్ప‌డింది.

పాద‌యాత్ర సంద‌ర్భంగా విష‌యం తెలుసుకున్న ఎమ్మెల్సీ తీన్మార్ మ‌ల్ల‌న్న‌.. అన్న‌పూర్ణ నివాసానికి వెళ్లి ఆమె ఉన్న‌త చ‌దువుల కోసం రూ.ల‌క్ష ఆర్థిక స‌హాయం (Financial Assistance) అందించారు. వెంటనే కాలేజీలో చేరాలని సూచించారు. అవసరమైతే మ‌రింత స‌హాయం చేస్తాన‌ని కుటుంబ సభ్యులకు హామీ ఇచ్చారు. ఈ సందర్భంగా ఆయ‌న మాట్లాడుతూ.. ప్రతి పేద విద్యార్థికి నాణ్యమైన విద్య ఉచితంగా (Free Education) అందుబాటులోకి రావాలన్నదే తమ పార్టీ లక్ష్యమన్నారు. అందులో భాగంగానే ప్రజల సమస్యలను ప్రత్యక్షంగా తెలుసుకునేందుకు పాదయాత్ర చేస్తున్నట్లు వెల్ల‌డించారు.

ఆర్థిక పరిస్థితులు బాగోలేవనే కారణంతో ఏ విద్యార్థి కూడా చదువును మధ్యలో ఆపాల్సిన పరిస్థితి ఉండకూడదని చెప్పారు. ప్రతి ఒక్కరికీ నాణ్యమైన విద్య అందుబాటులో ఉండే విధానాన్ని తీసుకురావాల్సిన అవసరం ఉందన్నారు. తమ ప్రభుత్వం ఏర్పడితే పేద కుటుంబాల పిల్లలకు ఆర్థిక పరిస్థితులతో సంబంధం లేకుండా నాణ్యమైన ఉచిత విద్య అందేలా చర్యలు తీసుకుంటామని హామీ ఇచ్చారు.